ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 175, 24.11.2017/

Очко санап кына булмый

 

Спортны ничек итеп чиста килеш саклап калырга? Бу көннәрдә дөньяның йөздән артык иленнән Казанга җыелган түрәләр әнә шул сорауга җавап эзли. Берләшергә кирәк диләр. Коррупция, допинг һәм башка кырын эшләр аркасында спортның асыл сыйфатлары юкка чыкмасын өчен берләшү юллары турында фикер алышалар. Казанда уртак декларация дә кабул итәргә җыеналар. Нишләмәк кирәк, спортта бүген очко санап кына җиңеп булмый.

 2-4
Физик тәрбия һәм спорт өчен җаваплы министрлар һәм югары вазыйфаи затларның алтынчы халыкара конференциясе (МИНЕПС VI) Казанда 13 июльдә башланды. ЮНЕСКО тарафыннан оештырылган бу чараның беренчесе 1976 елда Франциядә узган. Икенчесен 1988 елда Мәскәү кабул иткән. Казаннан алдагысы исә дүрт ел элек Алманиядә булган. Быелгы чарага ЮНЕСКОга кергән 117 илдән түрәләр, барлыгы 630 кеше чакырылган. Кичә узган ачылыш тантанасында кунакларга Россия Президенты Владимир Путинның да сәламен җиткерделәр. Конференциядә катнашучыларга ЮНЕСКО башлыгы Ирина Бокова да мөрәҗәгать итте. Казанны бөтен дөньяның спорт башкаласы дип атаган Бокова Татарстан халкына һәм җитәкчелегенә рәхмәтен җиткерде. «Әле күптән түгел ЮНЕСКОның Бөтендөнья мирасы исемлегенә Успение чиркәве һәм Зөя утрау-шәһәрчеге кертелде. Әлеге объектларның, шулай ук борынгы Болгар шәһәрен Бөтендөнья мирасы исемлегенә кертү толерантлык символы булып тора. Татарстан моның белән горурлана ала, – диде Бокова. –  Толерантлыкны тәрбияләүдә спорт та әһәмиятле”.


Татарстан Президенты кунакларга республикада бу мәсьәләдә ниләр эшләнгәне турында сөйләде. “Соңгы елларда Татарстан башкаласы Европа һәм бөтендөнья дәрәҗәсендәге халыкара спорт ярышы аренасына әверелде. Спортны үстерү – Татарстан сәясәтенең өстенлекле юнәлешләренең берсе. Аның өчен Татарстан актив рәвештә инвесторлар акчасын җәлеп итә. Республикада 10 меңнән артык спорт корылмасы бар, 12 спорт командасы даими рәвештә халыкара турнирларда катнаша. Без халыкара федерацияләр белән хезмәттәшлекне ныгытабыз. Спорт чаралары тамашачының да игътибарын җәлеп итә. Яшьләр Россия һәм бөтендөнья дәрәҗәсендә спортта карьера ясарга мөмкин булуын аңлый башлады. Бу чаралар үткәннән соң иң зур мирас булып кеше капиталы кала,  – диде Рөстәм Миңнеханов. – Әлеге җыелыш исә Татарстан гына түгел, Россия өчен дә мөһим. Башкарган эшебезне, кая таба баруыбызны һәм мөмкинлегебезне күрсәтә алабыз”.


Шунсыз булмый, чөнки соңгы вакытта дөньяда Россия спортына карата нинди мөнәсәбәт булуын күреп-ишетеп торабыз. Допинг куллану тирәсендә килеп чыккан җәнҗал әле бетмәде. Россия Хөкүмәте башлыгы Виталий Мутко әйтүенчә, якын арада тагын һөҗүм башланырга мөмкин. “Бу безнең генә проблема түгел. Аны Россия генә хәл итә алмый. Әйтик, спортчылар 70 процент вакытын чит илдә уздыра. Аларны без тикшермибез бит! Аннары дәүләтне гаеплиләр”, – ди Мутко. Ул вәзгыять үзгәрер дип өметләнә. Бүген спортта кагыйдәләрне халыкара спорт федерацияләре кабул итә. Ә дәүләтләрнең моңа каршы торырлык көче юк. Кыскасы, берләшергә кирәк. “Халыкара оешмалар белән бергә эшләп, алга барасы килә. Без спорт һәм гаделлек өчен бөтен дөнья белән хезмәттәшлек итәргә әзер. Бу чараның әһәмиятен арттырырга кирәк, спорт министрларының фикере ишетелерлек булсын. Допинг куллану, экстремизм, законсыз тотализаторлар – боларны бер генә ил дә үзе генә җиңә алмый. Спорт күп проблемаларны хәл итә. Әмма аңа сәясәт тыкшынырга тиеш түгел”.


Бу мәшәкатьләр башка илләрдә дә бар. Европа Советының генераль сәркатибе урынбасары Габриэла Баттайни-Драгони әйтүенчә, балаларны спортка җәлеп итеп, аларны кагыйдәләрне үтәү, команда белән эшләү, башкаларны хөрмәт итү, үз көчеңә ышану кебек тормыш өчен кирәкле сыйфатларга өйрәтергә тырышабыз. Халыкара дәрәҗәдә чыгыш ясый башлагач, алар бу сыйфатларны бөтен дөньяга тарата. Спортның көче бу. Әмма мәсьәләнең башка ягы да бар. Ул миллиардлар белән эш итә торган бизнеска әверелә, алдау юлы белән нәтиҗәгә ирешергә омтылучылар табыла. “Шуның белән спортка зыян килә, халыкның исә гаделлеккә ышанычы юкка чыга. Җиңәсебез килсә, берләшергә кирәк”, – дип сөйләде Габриэла Баттайни-Драгони.


Конференция эше бүген тәмамлана. Кунаклар Казан Сабан туена да барачак.


(“Ватаным Татарстан”,   /№ 102, 15.07.2017/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Фотохәбәр

5-1

Видеохәбәр

112