ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 42, 23.03.2019/

Авылда да кешеләр яши

 

Владимир Путин белән Рөстәм Миңнеханов арасында ышанычлы мөнәсәбәтләр урнашкан. Республикада яшәүчеләр кулланган батареялар һәм аккумуляторларның яртысыннан күбрәген җыя башламакчылар. Бу хакта Татарстан Министрлар Кабинетында узган брифингта сөйләделәр.

 
“Казанга килеп җитүгә, Владимир Путин иң элек Татарстанның беренче Президенты Минтимер Шәймиевнең хәлен сорашты”, – диде Казан Кремленең рәсми вәкиле Лилия Галимова Илбашының Татарстанга эш сәфәре йомгаклары турында сөйләгәндә. Шунда ук Дәүләт Советы Киңәшчесе белән очрашу турында да килешкәннәр. “РФ Дәүләт Советы Президиумы утырышыннан соң Владимир Путин Рөстәм Миңнеханов белән узган ел нәтиҗәләре турында сөйләште. Соңрак әлеге очрашуга Минтимер Шәймиев тә кушылды. Татарстанның беренче Президенты Илбашына “Яңарыш” фондының хәйриячеләр китабын бүләк итте. Анда Владимир Путинның исем-фамилиясе дә бар”, – диде Казан Кремленең рәсми вәкиле.


Дәүләт җитәкчесенең “Московский” мәдәният үзәгендә ­җә­­­мәгать­челек вәкилләре белән очрашуы барышында яңгыраган сораулар­ның берсе дә  игътибардан читтә калмаячак. “Алар йөк­ләмәләр бер­кетмәсендә урын алачак. Татарстан Президенты Рөстәм Миңнеханов кушуы буенча, махсус документ әзерләнә”, – диде Лилия Галимова. Хәзер бу мәсьәлә белән тармак министрлыклары һәм ведомстволары, Татарстан Президенты аппараты шө­гыльләнә. Лилия Галимова Иннополис шәһәрендә узган РФ Дәүләт Советы Президиумы утырышында яңгыраган һәм Илбашына тәкъдим ителгән төп фикер­ләр­не җит­керде. “Беренчедән – яңа төзелүче торакка ихтыяҗны арттыру. Икенчедән – торак төзелеше социаль инфраструктураны таләп итә, ә моның өчен өстәмә акча кирәк. Өченчедән – эскроу-счет­ларга күчү төзелешнең үзкыйм­мәте 13 процентка артуга ките­рергә мөм­кин”, – диде ул. Казан Кремленең рәсми вәкиле әй­түенчә, республикадагы тө­зелеш оешма­ларының яртысы диярлек финанс­лауның яңа системасына күчүгә бәйле кыенлыклар кичерә. Бер Татарстанга гына хас проблема түгел бу. Утырышта эскроу-счетларга күчүне баскычлап эшләргә, теге яки бу мәйданда төзелешне тәмам­лап килүче оешмаларга элеккеге тәртип буенча эшләү мөмкинлеген калдырырга тәкъдим иткәннәр.


Татарстанга эш сәфәре барышында Владимир Путин Рөстәм Миң­нехановка шаяру катыш бер­ничә кисәтү дә ясаган иде. РФ Дәү­ләт Советы  утырышында Владимир Путин Рөстәм Миңнехановка сүз бирмәкче булган, әмма ул залда күренмәгәч: “Чыккан да киткән. Кая киткән?” – диде. Аңа кадәр дәүләт башлыгы Татарстан Президентын игътибарсызлыкта шелтәләде. “Рөстәм Нургалиевич, Рөстәм Нургалиевич. Сез нәрсә, игътибарыгызны читкә юнәлтмәгез. Ул безне тыңламый”, – дип борчылуын белдерде Владимир Путин. Кайбер мәгълүмат чаралары моны артык күпертеп күрсәтергә тырышкангамы, мәсьәләгә дәүләт башлыгы матбугат сәркатибе Дмитрий Песков нокта куйган. “Владимир Путинның Рөстәм Миңнеханов адресына шаярулары алар арасында яхшы мөнәсәбәтләр булуын күрсәтә, бу дәгъва билгеләре түгел, – дигән ул. – Бу – матбугат чаралары бөтен хә­рефләрне дә белеп, сүзне әйтә алмаган очрак. Чыннан да, Владимир Путин белән Рөстәм Миңне­ханов арасында ышанычлы мөнә­сә­бәтләр. Россия Президенты Татарстанда эш ничек алып барылуыннан канәгать”.


Тормыш дәвам итә. 14-15 фев­ральдә Сочида Россия инвестиция форумы уза. Аның эшендә Президент Рөстәм Миңнеханов җитәкче­легендәге республика делегациясе дә катнаша. “Рөстәм Миңнеха­нов­ның Карелия Республикасы башлыгы Артур Парфенчиков, Новгород өлкәсе губернаторы Андрей Никитин, Пенза өлкәсе губернаторы Иван Белозерцев, шулай ук танылган бизнес оешмалары вәкил­ләре белән очрашулар билге­ләнгән”, – диде Лилия Галимова. Мәсәлән, республикада химик батареялар һәм аккумуляторларны юкка чыгару системасын үстерүдә  Duracell тәҗрибәсен файдаланырга җыеналар. Татарстан Хөкүмәте белән компания арасында төзел­гән килешү нигезендә, республикада яшәүчеләр кулланган батареялар һәм аккумуляторларның 60 процентын җыя башлаячаклар дип көтелә. Моның өчен Татарстанда 2 меңнән артык махсус җыю пунктлары урнаштыру күздә тотыла.


“Зур торак пунктларны тәр­типкә китергәннән соң, безнең план­нар алга таба да дәвам ит­терелергә тиеш. Авылда да безнең кешеләр яши бит. Иң тырыш халык нигездә шунда. Аларга бәхет өчен күп тә кирәкми: поликлиника, ФАП, мәктәп һәм юл”, – диде Рөстәм Миң­неханов Сочида шәһәр мохитенең уңайлылыгы һәм тирә-юньне төзекләндерүгә багышланган чара барышында. Ул Татарстанда бу юнәлештә алып барылган эш турында да сөйләде. Бүген Рөстәм Миңнеханов ил Премьер-ми­нис­тры Дмитрий Медведев үткә­рәчәк очрашуда катнашачак дип көтелә. “Ә атна ахырында Татарстан Президенты Берләш­кән Гарәп Әмир­лек­ләренә эш сә­фәре кылачак”, – диде Лилия Галимова.

(“Ватаным Татарстан”,   /№ 22, 15.02.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!