ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 83, 19.06.2018/

“Кореягә бармадык, шул акчага телевизор алдык”

 

Бу атнада Татарстанда тагын бер Олимпия медаленә өмет иттеләр. Хатын-кызлар җыелма командасында өч якташыбыз чыгыш ясады. Әмма бронза медальгә бер адым җитмәде. Җиңелү ачысын ничек кичерүләре һәм үзләрен ничек юатулары турында “Кәшәкәле Месси” кушаматы алган Фәнүзә Кадыйрованың Кукмара районындагы Сәрдекбаш авылында гомер кичерүче көрәшче әтисе Фәһим белән сөйләштек.

6-1
– Уен алдыннан да, аннары да йоклап булмады. Дару да эчеп карадым, анысы да ярдәм итмәде. Өметләр зурдан иде, җиңәрбез шикелле тоелды, тик килеп чыкмады шул, – дип сөйли Фәһим әфән­де. – Бу җиңелүне авыр ки­че­рсәм дә, хәзер юандым инде. Кы­зы­быз­ның Олимпиадага баруы да зур вакыйга булды безнең өчен. Дүр­тенче урын да начар түгел. Моның кадәр күтәрелгәннәре юк иде. Олимпиада алдыннан зур тур­нирларда катнаштылар. Җиңү­ләр дә булгач, өметләнгән идек. Тренер да башкача уйнатыр дип уйладык. Әмма бу юлы язмаган икән.


– Бронза отарга нәрсә комачау итте икән?


– Бронза безнең өчен алтынга тиң булыр иде. Баш тренер үз уенчыларына артык игътибар бирмә­де микән? Әйтик, Россия берен­че­легендә Башкортстанның “Агыйдел” командасы беренче урында бара. Ә Кореягә аннан Әлмәт кызы Сосинаны гына чакырганнар. Без­нең кызны да бозга күп чыгармады. Чыкканнарның аннан бер артык җире дә юк. Хәер, анысын тренер үзе хәл итә инде. Бәлки, тактика җитеп бетмәгәндер.


– Кечкенә чагында Фәнүзәгә кызык өчен генә кәшәкә тоттырганда, Олимпиада турында уйладыгызмы, дип сорап та тормыйм инде...


– Кая инде Олимпиада турында уйлау? Ә хәзер сөенеп утырам. Тырышсаң, нәтиҗәсе була икән дип шатланам. Үзем ясаган хоккей мәйданында уйный башлаган кыз Кореягә барып җитте. Лиана да спортка шулай кереп киткән. Аның Актаныш районындагы Иске Байсар авылында яшәп ятучы әти-әнисе белән аралашып торабыз. Бу көннәрдә, яшермим, безгә игътибар артты. Бөтен авыл белән хоккей карадык.


– Бәлки әле хатын-кызлар хоккеена да игътибар артыр?


– Үзебездә профессиональ команда төзелүне өзелеп көтәбез. Була дисәләр, Татарстан кызларыннан көчле бер команда җыяр­га мөмкин. Хатын-кызлар аш бүл­мә­сен­дә генә утыра алмый бит инде. Бу хакта Казан гына түгел, Мәс­кәүдә дә уйларга вакыт җитте. Ахыр чик­тә Олимпия уеннарында медаль китерә торган спорт төре бит. Ә медальләрнең ничек авыр элә­гүен үзегез күреп торасыз.


– Ир-егет хоккейчыларның чыгышын күзәтәсезме? Ике ге­нә каладан җыелгач, быел бу командага мөнәсәбәт төрле булды.


– НХЛ уенчылары булмагач, составлар көчле түгел. Шуңа алтын отарлар дигән өмет бар. Әмма җиңел булмаячак. Вакыт булганда башка ярышларны да күзәтәм. Ижау­дан чыккан татар кызына өметләр зур. Кызыбыз Кореягә барырга да тәкъдим иткән иде. Әмма Олимпиада алдыннан кәефне тө­шерделәр. Башта әләм белән барыр­га рөхсәт бирмәделәр, аннары команданы кыскартып бе­тер­де­­ләр. Чит илгә барасы акчага зур гына телевизор алып куйдык та ярыш­ларны шуннан күзәтәбез хәзер.

(“Ватаным Татарстан”,   /№ 27, 23.02.2018/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Фотохәбәр

Видеохәбәр