ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 42, 23.03.2019/

//

Ишле гаиләләргә ничек ярдәм итәргә?

 

Ишле, тулы булмаган һәм фәкыйрь гаиләләрдә тәрбияләнүче балалар дәүләт хисабына ил курортларында ял итә алачак. Моның өчен махсус “ял сертификаты”н гамәлгә кертергә җыеналар. Хәзерге вакытта бу эш белән Россия Мәгариф министрлыгы шөгыльләнә. Яңа программа кысасында ел саен 1 миллион гаиләне диңгез буена ял итәргә җибәрү каралган. Юллама ике атнага биреләчәк дип фаразлана. Рәсми мәгълүматларга караганда, илдә айлык кереме яшәү минимумыннан да түбәнрәк булган 1,5 миллион гаилә яши. Аларның 80 проценттан да күбрәгендә балигъ булмаган балалар тәрбияләнә. Диңгезле ял, иң беренче чиратта, әнә шундыйларга эләгәчәк, дигәннәр. Ә сез ишле, тулы булмаган һәм фәкыйрь гаиләләргә тагын ничек ярдәм итәр идегез?

2-1

Вероника МЕЛЬНИКОВА, кыен хәлдә калган гаиләләргә ярдәм хезмәте волонтеры:

 
– Ярдәмнең артыгы булмый, әлбәттә. Безгә күп балалы әниләр ешрак мөрәҗәгать итә. Һәр өч гаиләнең икесендә диярлек торак мәсьәләсе көн кадагында тора. Без аларга фатир алып бирә алмыйбыз, әлбәттә. Бушлай юридик яр­дәм күрсәтергә тырышабыз. Беләсезме, кайбер очракта мәсьәләне хәл итү өчен шул да җитә. Өченче балага дәү­ләттән җир биргәнче, торак сатып алырга булышсыннар иде, диләр. Ник дисәгез, буш җирдә йорт салырга тагын әллә никадәр акча кирәк. Өстәвенә үз йортың белән яшәгәндә төзелешнең бетәсе юк. Әле бер яктан акча кирәк, әле икенче яктан. Ә ишле гаи­ләнең чыгымнары болай да күп аның.

Лилия САФИУЛЛИНА, күп балалы ана (Чистай шәһәре):

 
– Мин иң элек Ана капиталына машина сатып алу мөмкинлеге булдырыр идем. Күп балалы гаиләләр өчен бу – бик мөһим мәсьәлә. Тәкъ­дим­нәр күп булды, әмма депутатлар әлегә карар кабул итә алмый. “Беренче автомобиль”, “Гаилә автомобиле” дәүләт программаларына кушып, тагын Ана капиталын беренче кертем итеп кулланып булса, менә дигән ярдәм булыр иде.

Чулпан ХӘМИДОВА, социаль челтәрдә татар әти-әниләре төркеме әгъзасы:


– Балалар бакчаларында каралган ташламалар авыр, фәкыйрь гаиләләр өчен ки­ңәй­телсен иде. Шулай ук хас­таханәләрдә дарулар исемлеген, массаж һәм башка төр хезмәт күрсәтүләрнең арттырылуын теләр идем. Бассейнга бушлай абонементлар би­рергә мөмкин. Мәктәпләрдә бушлай түгәрәкләр бар, әмма алар күп түгел. Татарча эшли торган түгәрәкләр дә кәгазьдә генә калмасын иде. Бүген балаларга ярдәм бар, әмма әти-әниләр читтә кала. Алар мә­шәкатьтән талчыга. Әгәр әти-әни сәламәт булса, аның баласын, гаиләсен кайгыртырга да көче җитәчәк.

Ландыш ӘХМӘТГАЛИЕВА, тернәкләндерү үзәге хезмәткәре:


– Мондый гаиләләргә ничек кенә ярдәм итсәң дә, аз булыр кебек. Ялга җибәрү яхшы яңалык анысы. Әмма тагын күңелгә шик килә. Бу юлламалар тиешле кешегә элә­герме соң? Авыр хәлдә калган гаиләгә иң элек бушлай туклануны оештырыр идем мин. Балага, диңгез суына караганда, тәмле ризык кирәк. Күп ке­нә танышларым кыш буе акча җиткезә алмагач, яшелчә-җи­меш тә ашый алмый. Тулы булмаган гаилә­ләргә акчалата ярдәмне арттырыр идем. Кызымның сыйныфында ятимнәр күп. Көн саен шуларны кызганып кайта. Кайсының театрга барырга акчасы юк, берсенең китаплары ертылган, ди. Кемдер рәхәт яшәсә, хәерчеләр күп. Дәүләтнең ятимнәрне, мох­таҗ­ларны уйлавына сөенеп куйдым әле.

Айдар НУРГАЛИЕВ, тамада:


– Миңа калса, ярдәм чараларының гамәлдәгеләре дә бик җиткән. Ишле, тулы булмаган һәм фәкыйрь гаи­лә­ләргә болай да гел булышып торалар. Ә яшьләргә берни юк. Бала үз бәхете белән туа дисәләр дә, матди мөмкин­лекләрең турында онытырга ярамый дип саныйм. Ашарга ипиең, яшәргә торагың булмаган килеш, ике, өч, дүрт бәби алып кайтудан ни файда? Дус-ишләрем арасында да болай фикер йөртүчеләр күп.

(“Ватаным Татарстан”,   /№ 40, 16.03.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!