ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 42, 23.03.2019/

Тәгәрмәчкә таяк тыгалар. Чистай фермерларына юлга чыгарга ярамый?


Чистай районы фермерлары чаң суга. “Атна-ун көн­нән язгы чәчү эшләре башланырга тора, ә юл хезмәт­кәр­ләре чәчүлек җиренә керү мөмкинлеген өзә. Хәл уңай якка үзгәрмәсә, без быел чәчә алмаячакбыз. Безгә ниш­ләр­гә?” – диләр.

2-3
Килеп туган вәз­гыятьне ачыклар өчен, без фермер Николай Смирнов белән очраштык. Хикмәт шун­да: юл хезмәткәрләре олы юлдан төшеп китүче басу юлларын казып, рекультивация уздырганнан соң тех­никаның чәчү җиренә бару мөмкинлеген кискәннәр. “Әле­ге хәл өченче ел дәвам итә инде. Язын, җәен, көзен юл кисешләрен техника узмаслык итеп казып китәләр. Без, Бахта авылы җирле­ген­дәге унлап фермер, аеруча җәфа чигәбез. Юллар өзелү сәбәпле, көзен җирләр эш­кәртелми калды. Быел, го­мумән, чәчеп тә булмас кебек. Беркемгә бернәрсә ки­рәкми, кая барып төртелмә, кемгә мөрәҗәгать итмә – битарафлык. Фермерлар әлеге вәз­гыятьне җиңә алмый. Зинһар, булышыгыз”, – дип өзгәләнә Николай.


Фермерның 118 гектар җире бар. Ничәмә-ничә ел ул шунда төрле культура чәчеп, фуражга дип якын-тирәдәге хуҗалыкларга сата. “Бөртек сатуда кыенлык тумады, һәр­чак мактап, алып бетерәләр. Әмма быелдан улым белән чимал җитеш­тереп кенә тү­гел, ә аны эшкәртүне башлап җибәрергә иде исәп. Болай булгач, белмим инде, го­му­мән, җир эшен ташларга ту­ры килмәгәе. Президентыбыз фермерлыкны, авылда җи­тештерүне үстерергә ди­гән бер мәлдә төрле дә­рә­җәдәге түрәләр безнең тә­гәр­мәчкә таяк тыга”, – дип уфтана Ни­колай Смирнов.


Юл хәрәкәте иминлеге инспекциясенең Чистай районы бүлекчәсе һәм “Юл хә­рә­кәте иминлеге” дәүләт бюджет оешмасы вәкилләре үт­кәргән тикшерүләрдән соң, Бахта авылы яныннан узучы төбәк трассасыннан басулык­ларга төшүче юлларны “Главтатдортранс” хез­мәт­кәр­ләре өзүе ачыкланды. “Эш­ләми торып булмый, юлчылар казып китә, без чокырларны күмеп, яңадан юл салып, кырга чыгабыз. Болай ярамаганын, закон бозганыбызны да аң­лыйбыз, әмма башка чара юк. Күпме сузылса да, җепнең очы бер чыга. Закон бозасы килми, рәсми рәвештә эшлисе килә”, – ди фермер. Әмма, шунысы хак, әлеге басу юлларын рәс­ми­ләштерү өчен, әлеге дә баягы шул “Юл хәрәкәте иминлеге” ДБОга мөрәҗәгать итәргә кирәк. Алар, килеп туган сорауларны тиешле оешмалар аша җайлап, кирәкле документлар, рөхсәт кәгазьләре ясап бирә икән. Әмма, ул рөхсәтне алгач, фермер юл­ның әлеге участогын үз карамагына алып, аны үз хисабына төзеп, карап һәм җавап биреп торырга тиеш була. “Әле­ге оешмадан миңа 90 мең сумга якын түләргә дигән квитанция килде. Уйлар өчен биш көн вакыт биргәннәр. Минем һәм башка фер­мер­ларның андый акчасы юк шул”, – ди Николай.


Без чистайлылар хәленә кереп, ярдәм итү максатында Чистай районы авыл ху­җа­лыгы идарәсе җитәкчесе  Алек­сандр Ромадановскийга шалтыраттык. “Безгә әлеге мәсьәлә буенча мөрәҗәгать итүче булмады. Шулай да минем  урынбасарым белән сөй­­ләшегез әле, мин биредә яңа кеше”, – дип җавап кайтарды. Илгизәр Нуретдинов  әлеге проблеманы яхшы бел­сә дә, хәлне аңлатудан ары китә алмады. “Көзен район башлыгы Дмитрий Иванов катнашында киңәшмә уздырдык. Анда фермерларның мөрә­җәгате дә каралды. Без­гә “Юл хәрәкәте иминлеге” ДБОга хат язып, язын-көзен фермерлар техникасын кырга керә ала торган рөхсәт  бирергә тиеш, диделәр. Без тагын нәрсә эшли алабыз соң?” – дигән җавап кайтарды ул.


ДБО исеменнән фермерларга хат язучы, әлеге оешма җитәкчесенең беренче урынбасары Әнәс Адыев белән дә элемтәгә кердек. “Без рөхсәт тә бирмибез, каршы да килмибез, без боерык үтәүчеләр генә. Фермерларга техник документация эшләп, заказчы һәм министрлыклар арасындагы аңлашыл­маучан­лык­ны юк итүче генә”, – диде.


Әмма фермерлар кулындагы җавап хатлары киресен сөйли. Әнәс Адыев тәкъдим иткән “Главтатдортранс” дәү­ләт учреждениесе җитәкчесе Эдуард Даниловка шалтыратырга булдык. Ни кызганыч, ул ялда икән. Элемтә өчен тоташтырылган оешманың әйдәп баручы белгече Фә­ридә Гаранина исә, хәлебезне тыңлап та тормыйча: “Рәсми хат языгыз, ай дәвамында җа­вап бирербез”, – диде. Ай дәвамында чәчү эшләре дә төгәлләнә бит инде, дигән дәлил дә йомшарта алмады белгеч йөрәген.


Республикабызның Авыл хуҗалыгы һәм азык-төлек министрлыгында ни уйлыйлар, фермерларга нинди ки­ңәш бирә алырлар икән дип, министрлыкның җаваплы хез­мәткәрләренә мө­рәҗә­гать итеп карадык. Ни кызганыч, алар да фермерлар хәленә керергә ашыкмады.


Министрлык вәкилләре дә әлеге мәсьәләнең очын-кырыен таба алмагач, гади авыл кешесенә ни кала? Яз ишек шакый, ә фермер­лар­ның соравы һаман да һавада эленеп калды. Әлегә...

(“Ватаным Татарстан”,   /№ 40, 16.03.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!