ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 42, 23.03.2019/

Күлмәк тегү – сәнгать ул

 

20 – 24 майда  башкалада  Ворлдскиллс  VII илкүләм чемпионаты узачак. Анда Һава Гагиева мода технологиясе, дизайны һәм сәнгате өлкәсендә үз көчен сынарга җыена. Бүген ул сайлап алу турына әзерләнә. Максаты – беренче урын алу.

4-4  
Һава – Кавказдан, Ингу­ше­тиядә туып үскән. Казанга 2015 елда килә. Казан технология һәм дизайн көл­лиятенә укырга керә. Аңа 21 яшь, үзе укыган көллияттә лаборант булып эшли.


Һава кечкенәдән курчак­ларга күлмәкләр тегәргә, төрле кием рәсемнәре ясарга ярата. Үсә төшкәч, милли киемнәргә күчә. Каләм белән төрле бизәкләр тө­шерергә өйрәнә. “Иптәшләрем буш вакытларын интернетта  уз­дырса, минем кулымда һәр­вакыт карандаш иде. Ходай биргән сәләт бу”,  – ди. Сә­ләткә генә кайтарып калырга ярамый, бертуктаусыз тырышырга кирәк, дип өстәп куя.


Әлеге  чемпионатта катнашып, тәҗрибә туплыйсы, үзенең иҗа­тын башкаларга  тәкъдим итәсе килә аның.  Хәзерге вакытта сайлап алу турына әзерләнә. Ул ике этаптан торачак. Беренчесе – техник эскиз. Кеше бер карауга нәрсә икәнлеген аң­лар­лык итеп рәсем ясау. Икенчесе – яңа модалы ха­тын-кыз блузкасы уйлап табу.


Һава көн саен тренировкалар үтә, аның буш вакыты бөтенләй  юк диярлек. Тырышмыйча булмый, үзенә чемпионатта беренче урын алу максатын куйган. Тик теләгенә ирешә алмаса да, борчылмаячак. Бу аның иҗатының тагын бер яңа бас­кычы булачак.


Без дә аңа уңышлар теләп калабыз, яраткан хезмәте бары шатлык китерсен!

P.S. Чемпионат ярыш­ларының төп мәйданчыгы “Казан Экспо” халыкара күр­гәзмә үзәге булачак. Чарада сигез федераль округтан 1,6 мең яшь профессионал катнашачак. Моннан тыш,  чемпионатка 1,5 мең­нән артык белгеч киләчәк. Ярыш­ларның финалында эшлә­ячәк баш экспертлар – Татарстан, Чиләбе, Новосибирск һәм Мәскәү, Свердловск өл­кә­ләре вәкилләре.

(“Ватаным Татарстан”,   /№ 38, 16.03.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!