ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 70, 22.05.2018/

Путин өчен иң күп тавышны – Нурлатта, иң азын Түбән Камада биргәннәр


Җиденче тапкыр Президент сайладык. Ил тарихында мондый сайлауның булганы юк иде әле. Владимир Путин калган бөтен көндәшләре бергә җый­ганнан өч ярым тапкыр күбрәк тавыш туплады. Сәяси чара сайлаучылар­ның активлыгы белән дә истә калачак. Татарстан – илнең гамәлдәге җитәк­чесе өчен иң күп тавыш бирүчеләр арасында.

1-2
 

 

 

 

 

business-gazeta.ru

 

Сайлау бюллетень­нәре­нең 99,8 процентын эшкәрт­кәч, Владимир Путинның 76,69 процент тавыш җый­ганы ачыкланды, дип хәбәр итте Россия Үзәк сайлау комиссиясе. Илдә яшәүче 56 миллион кеше Путинны сайлаган. Икенче урында – КПРФтан кандидат Павел Грудинин. Ул 11,77 процент тавыш җыйган. Сүз уңаен­нан, быелгы Президент сайлавы – КПРФ өчен иң уңыш­сызы. Моннан алты ел элек узган сәяси чарада Илбашы кәнәфиенә дәгъва кылган Геннадий Зюганов 17 процент тавыш җыйган иде. Өченче урында – Владимир Жириновский. Илдә яшәү­че­ләрнең 5,65 проценты ЛДПР вәкилен сайлаган.  Алдан алынган мәгълүмат­лар­га караганда, ил күлә­мендә сайлауда катнашу күрсәткече 67,4 процент тәшкил иткән.


Татарстан Үзәк сайлау комиссиясе рәисе Мидхәт Шаһиәхмәтов әйтүенчә, республикада халыкның 77,45 проценты сайлауда катнашкан. Владимир Путин барлык тавышның 82,09 процентын җыйган. “Шә­һәр­ләр арасында Казанда да, Чаллыда да сайлаучылар актив. Казан буенча тавыш бирү – 61,47, Чаллыда – 79,54, Әл­мәттә – 76,51, Тү­бән Камада – 71,83 процент. Авылларда тавыш бирүче­ләр 80 проценттан да артык”, – диде ул Татарстан Иҗтимагый па­лата­сының мәгълүмати-эксперт үзә­ген­дә узган очрашуда. КНИТУ-КХТИ кафедрасы җи­тәкчесе, социология фән­нәре докторы Андрей Тузиков әйтүенчә, бу саннарга артык гаҗәплә­нергә кирәкми. “Президент сайлауда катнашу күрсәт­кече һәрвакыт югарырак була”, – диде ул.


Кар-бураны белән дә истә калган 18 март көнендә тавыш бирүчеләрне төрле­чә җәлеп итәргә тырыштылар анысы. Сайлау участок­лары янәшәсендә оештырылган ярминкәләр үзе генә дә ни тора! Башкалада гына сайлау көнне 242 сәүдә мәйданы эшләгән. Казан мэриясе мәгълүмат­ла­рына караганда, ярминкә­ләрдә очсыз бәядән 132 тонна ит, 81 тонна сөт, 50 тонна май, 78 тонна шикәр комы, 35 тонна он, 157 тонна ярма, 44 тонна бәрәңге, 270 тонна яшелчә сатканнар. Мисал өчен, 900 граммлы бер кап карабодай 17 сум торган. Социаль чел­тәр­ләрдә кыяр-помидорга озын чиратлар турында да яздылар. Чаллыда исә камыр ризыкларын кырып-себереп алып бетергәннәр.


Сәяси фәннәр докторы Андрей Большаков әйтүен­чә, сайлау участоклары янында ярминкәләр оеш­тыруның бернинди дә гө­наһы юк. Белгеч моның сайлауда катнашу күрсәткечен арттыру өчен эшләнүе бе­лән дә килеште. “Исеме танылган артистлар чакыру яки очсыз бәядән азык-төлек сатып алу мөмкинле­ген тәэмин итү кебек адымга барган өчен хакимиятне ватанпәрвәрлек булмауда гаепләячәкләр. Ә социологик сораштырулардан кү­рен­гәнчә, илдә яшәүчеләр­нең күбесе алдан ук тавыш бирергә җыенуын белдер­гән. Аларга ярминкәләр оеш­тыру турындагы мәгъ­лүмат ничектер тәэсир ит­кәндер дип уйламыйм. Ә очсыз бәядән ит, бәрәңге сатып алуның бернинди начарлыгы да юк. Чөнки арабызда, сер түгел, җитешсез тормышта яшәүчеләр дә бар. Минемчә, бу ватанпәр­вәрлеккә берничек тә тәэсир итми”, – ди Андрей Большаков.


Ватанпәрвәрлек дигән­нән, Чүпрәле районының Иске Задур авылында яшәү­че 86 яшьлек Закир Шә­рәпов сайлау участогына чаңгыда килгән әнә. “Үз гомеремдә икенче тапкыр сайлау көнне бу кадәр күп итеп кар яуды. Сайлау учас­тогына барып җитү өчен, чаңгыга басарга туры килде хәтта”, – дип сөйләгән ул. Ә Нурлат районының Чулпан авылында гомер итүче Наи­лә белән Әнвәр Насыйбуллиннар сайлау участогына чын каретага утырып кил­гән. Бергә гомер итү­ләренә кырык ел тулу уңаеннан, былтыр кул эше остасы Ән­вәр абый хатынына әнә шун­дый бүләк ясаган булган. Арба­ның кирәге дә чыккан. Дөрес, ишеп кар яву аркасында, ат урынына трактор “җигәргә” туры килгән. Яшел Үзәндә кияү белән кәләш ЗАГСтан туп-туры сай­лау участогына киткән. “Туй көнен махсус сайлауга туры китердек. Безнең өчен бүген ике зур җаваплы бәйрәм булды”, – ди Камилә һәм Артур Суровцевлар. Яшьләр сайлауда беренче тапкыр катнашкан. Түбән Камада сайлаучылар тавыш биргәннән соң ГТО тапшырган. Кукмарада Россия Президентын сайлау белән бергә кышны да озатканнар. Тик аның китәсе генә килми.


Татарстан Үзәк сайлау комиссиясе мәгълүмат­ла­рына караганда, Татарстанда Владимир Путинга иң күп тавышны Нурлат районында бир­гәннәр. Бу районда әлеге күрсәткеч 98,14 процентны тәшкил итә. Түбән Кама шәһәрендә исә илнең гамәл­дәге җитәкче­сен халыкның 70,87 проценты гына хуплый икән. Павел Грудинин иң күп тавышны – Азнакай шәһә­рендә (21,57 процент), ә иң кимен  Нурлатта (0,88 процент) җыйган. Владимир Жириновскийны күбрәк Түбән Кама шәһәрендә (5,31 процент) сайлаганнар. Нурлат районында ЛДПР вә­килен хуплаучылар нибары 0,43 процент тәшкил иткән. Кандидатлар арасында бер­­дәнбер хатын-кыз Ксения Собчак өчен Казанда (2,93 процентка кадәр) һәм Зәй шәһәрендә (1,99 процент) күбрәк тавыш бир­гәннәр. Иң түбән күр­сәткеч Әлкидә (0,17 процет) тер­кәлгән. Андрей Тузиков фикеренчә, Ксения Собчак өчен тавыш бирүчеләрне кискен үзгә­решләргә әзер булучылар, дип тә кабул итәргә мөмкин. Күпчелек исә бү­генге кебек көчле дәүләт, актив тышкы сәясәт һәм мөс­тәкыйльлек юлыннан бару яклы, дигән фи­кердә белгеч. Сайлау уңаен­нан, “Казан-Арена” янында үткәрелгән концертта чыгыш ясаган Валерий Меладзены тыңларга Татарстан Президенты Рөс­тәм Миңнеханов та килде. Урамда 15 градус салкын булуга да карамастан, тамаша кылырга килүчеләр шактый җыелган. Рөстәм Миң­не­ханов сайлауда катнашучыларга рәхмәтен белдерде. “Без киләчәгебезне сайладык”, – диде республика башлыгы.


Татарстанда сайлауга бәйле килеп ирешкән шика­ятьләрнең берсе дә расланмаган. Мидхәт Шаһиәхмә­тов әйтүенчә, һәр очрак буенча урынга барып тикшер­гәннәр. Мәсәлән, бер очракта урнага күпләп бюллетень салулары турында әйт­кән­нәр. Баксаң, әби беренче тапкырдан бюллетеньне урнадагы  ярыкка төшерә алмаган. Күзәтүчеләр әнә шуны аңлап бетермәгән. Төбәк сайлау комисси­ялә­ренең эшенә йомгак ясау җыелышында Россия Үзәк сайлау комиссиясе рәисе Элла Памфилова, Татарстанда сайлау тиешле дәрә­җәдә узды, дип белдергән. Бу сүз­ләрне күзәтүчеләр дә кабатлады. Сүз уңаеннан, Татарстанда сайлау барышын 3 меңгә якын иҗти­магый вә­кил күзәтеп торды. Чит илдән исә 35 халыкара белгеч килде.


Ә яңа сайланган Президенттан эш турында да кызыксына башлаганнар инде. “Хөкүмәттә нинди үзгә­решләр булачак?” – дип сораганнар аннан. Владимир Путин исә инаугурация уз­ганны көтәргә киңәш иткән. Ул 2030 елда узачак Президент сайлавында катнашырга җы­енмый. Сорауга җавап бир­гәндә: “Миңа 100 яшькә кадәр идарә итәргә кушасызмы әллә?” – дигән Илбашы. Ир­тәгесен кем белә. Шунысы хак: сайлаудан соң да тормыш бар.

(“Ватаным Татарстан”,   /№ 39, 20.03.2018/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!