ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 69, 19.05.2018/

Нигә алай түгел, нигә болай?


Мәктәпләрдә дәрес­лекләр саны кыскарачак, ә укучыларга әдәби әсәрләрне күбрәк укырга туры киләчәк. Балаларга бердәм шартлар тудырырга җыенган Россия мәгариф һәм фән министры Ольга Василье­ваның бу тәкъдимен хуп­ламаучылар да бар. Яңа стандартлар буенча янә бәхәс купты. 

2-2
Бүген федераль исем­лек­тә 1400гә якын дәреслек исәп­ләнә, шуның 405е башлангыч сыйныф укучылары өчен язылган. Билгеле булганча, министр  басмалар­ның күп булуына каршы чык­кан иде. Бердәм дәрес­лекләр укучы­лар­ның белемен арттырырга булышачак. Бала, бер мәк­тәптән икенчесенә күчкәндә, китап эзләргә мәҗбүр булмаячак. Бу инде – барысы да бер­төрле программа буенча укыячаклар дигән сүз. Дә­рес­лекләрне иләк аша у­з­дыргач, сыйфаты түбән булганнар федераль исем­лектән төшеп калачак.  Матур әдәбият тәрбия сыйфатын арттырачак, дип фикер йөртә министр.


Урыс теле һәм әдәбияты укытучыларының “Гильдия словесников” дип аталган  бер­леге  педагогларга сайлау иреге калдырылмауга, шул ук вакытта 5-9 нчы сыйныф уку­чыларының 235 әсәр укырга мәҗбүр булуына каршы чыкты. Бу бик күп икән! Балаларга өстәмә йөк булачак. Укытучылар әй­түенчә, мәҗбүрилек укучыларны китап укудан бө­тенләй биздерергә мөмкин. Ә укучының бер мәктәптән икенчесенә күчүен белемен арттырырга тели дип кабул итәргә кирәк.


– Бердәм дәреслекләр булуга каршы түгел. Югыйсә, тик­шерүчеләр, беренче чиратта, китапларга бәйләнә башлый. Нигә алай түгел, нигә болай? Дәреслек ул федераль исемлектә булырга тиеш. Басмалар бик  күп. Һәр мәктәп үзенчә мө­гез чыгарырга ярата. Урыс теленнән кайчак бер яхшы күнегү табып булмый. Нәр­сә эш­лә­тергә дип аптырап утыра­сың. Тәкъдим ителә торган әсәрләрнең исемлеген яхшылап карарга кирәк. Дө­рес, замана балалары хә­зер калын “Сугыш һәм солых” әсәрен тулысынча мәңге укымый. Әсәрләрнең көн кадагына туры килүе дә мө­һим. Әйтик, Некрасов­ның “Кому на Руси жить хорошо?” дигән әсәре тормыш таләпләренә җавап бирми. Салтыков-Щед­рин­ның “Гос­пода Головлевы” әсә­ренең дәреслектә булмавы, кире­сенчә, борчый. Балаларны тәрбияли торган әсәр­ләр кирәк, – ди Казандагы 149 нчы лицейның урыс теле һәм әдәбияты укытучысы Лима Суянгулова.


– Әсәрләр санын арттыру файдага гына булырмы икән? Замана яшьләре интернеттан  барыбер кыскача эчтәлеген генә укыячак.  Урыс теле буенча белем җитәрлек. Әмма әдәбиятны кызыклырак итеп укытырга кирәк. Китапка мә­хәббәт тәрбияләү укытучыдан гына түгел, әти-әнидән дә тора. Мин үзем әтидән күреп, китап укый башладым. Хәзер мине, китап күп укыйсың, дип сүгәләр. Укымыйча булмый, урыс теле укытучысы булырга җые­нам бит, – ди КФУның  беренче курс студенты Илүзә Мәхмүтова.

(“Ватаным Татарстан”,   /№ 43, 28.03.2018/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!