ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 120, 16.08.2017/

Һәр эшнең дә җае бар


Татарстан Президенты Рөстәм Миңнеханов ике йөз елдан артык тарихы булган “Казан дары заво­ды”н яклады. Баксаң, Идел буенда хәвеф-хәтәр килеп чыгарга мөмкин булган җитештерү оешмалары арасында иң күп шелтәне республикадагы дары заводына белдерә­ләр икән. Былтыр гына да биредә өч авария теркәлгән.

2-9
Хөкүмәт йортында Экологик, технологик һәм атомга күзәтчелек федераль хез­мәтенең Идел буе идарәсе­нең узган елга эш нәтиҗәләре турында сөйләштеләр. Ике сәгатькә якын дәвам иткән киңәшмә барышында “Казан дары заводы”н кат-кат телгә алдылар. “Узган ел предприя­тиедә өч авария теркәлгән. Гомумән, бу – иң проблемалы оешмаларның берсе. Заводта гадәттән тыш хәлләр ел саен диярлек чыгып тора”, – диде “Ростехнадзор”ның Идел буе идарәсе җитәкчесе Борис Петров. Хәер, завод җи­тәк­че­ле­ге башын комга яшер­ми. Генераль директор Хәлил Гыйниятов сүзләренә караганда, соңгы биш елда “Казан дары заводы”нда 137 тикшерү булган. Барлыгы 2 мең 125 тәртип бозу очрагы ачыкланган, шуның 2 меңен төзәткәннәр.


Шелтәләр саны күп булу­ның сәбәбен дә әйтте ул: заводтагы җиһазлар бик нык искергән. Аларның кайбер­ләре Икенче бөтендөнья сугышыннан ук калган. Җитеш­терүдә заманча технология­ләр куллану мөмкинлеге чикле булганлыктан, таякның авыр башы хезмәткәрләргә төшә. Гадәттән тыш хәлләр еш кына эшчеләрнең саксызлыгы аркасында килеп чыга, диделәр киңәшмәдә. Хәтер­ләсәгез, узган елның җәендә заводта синтетик эчке кием аркасында янгын чыгу турында хәбәр иткән идек. Хез­мәткәр эш таләпләрен бозган. Нәтиҗәдә синтетик ки­емнән барлыкка килгән статик электрдан дары тузаны яна башлаган. Экологик, технологик һәм атомга күзәт­че­лек федераль хезмәте җи­тәк­чесе урынбасары Светлана Родионова авария очракларын булдырмау юнәлешендә эшне көчәйтергә кушты.


Тик Хәлил Гыйниятовны Рөстәм Миңнеханов яклады. “Күзәтчелек органнары ава­рияләрне җентекләп тикшерде. Заводның иске булуын да истән чыгармаска ки­рәк. Биредә җитештерү тех­нологияләре бик гади, шуңа күрә иминлек кагыйдәләрен тәэмин итү шактый кыен. Тик бу – аклану түгел. Оешманың эшчәнлеге илнең оборона көченә дә турыдан-туры бәй­ле. Без барлык кисәтү­ләрне исәпкә алачакбыз. Шунысын да әйтергә телим: мин Хөкү­мәттә егерме елдан бирле эшлим, әгәр без бу директорны югалтсак, дары заводы­ның язмышы да кыл өстендә калачак”, – диде республика башлыгы. Аның фикеренчә, оборона предприятиесе буларак дәүләт алдындагы бурычын тиешенчә үтәү өчен заводка ярдәм итәргә кирәк.


Кичә Рөстәм Миңнеханов Хөкүмәт йортында Экологик, технологик һәм атомга күзәт­челек федераль хезмәте җи­тәкчесе Алексей Алешин белән дә очрашты. Яклар экологик, технологик һәм атом күзәтчелеге, Татарстан пред­приятиеләре һәм оешмалары тарафыннан сәнәгать һәм энергетика иминлеген тәэ­мин итү, шулай ук зур проектларны гамәлгә ашырганда техник һәм оештыру таләп­ләрен тәэмин итү юнәлешен­дә хезмәттәшлек мәсьәләлә­ре турында фикер алышты, дип хәбәр итә Президентның матбугат хезмәте.

(“Ватаным Татарстан”,   /№ 39, 21.03.2017/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Фотохәбәр