ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 69, 19.05.2018/

//

Фаҗигадән сабак ала беләбезме?

 

Кемероводагы янгында зыян күрүчеләр саны 79га җиткән. Медицина ярдәме сорап табибларга мөрәҗәгать итүчеләр саны артуын дәвам итә, дип белдергәннәр гадәттән тыш хәлдән соң оешкан оператив штабта. Хастаханәдә 12 кеше дәвалана. Тәрәзәдән сикергән 11 яшьлек малай янгында әти-әнисен һәм сеңлесен югалткан. Алга таба малайны әбисе тәрбияләячәк. Кемероводагы хәлләр сезне үзгәрттеме, фаҗигадән сабак ала беләбезме?

4-1

Йосыф хәзрәт ДӘҮЛӘТШИН, Казандагы Кабан арты мәчете имам-хатыйбы:

 
– Мондый хәлдән дә алмагач, без тагын нәрсәдән сабак алырга тиеш инде? Битарафлык булганга тормыш шундый хәсрәтләр биреп тора. Кеше уяулык күр­сәтсә, һәр гамәленә җитдирәк караса, алай килеп чыкмас иде. Битарафлыгыбыз, эшебезне җире­нә җиткереп башкармавыбыз аркасында фа­җигаләр кабатлана. Адәм баласы гафил бит инде ул. Кемероводагы фаҗиганең күңелгә тигән ягы – балаларның күп булуы. Икенче яктан карасаң, дөньяда бер көнгә күпме бала үлемгә дучар ителә, өлкәннәр тарафыннан кыерсытыла, сабыйлар дип тә тормыйлар. Уйланырлык әйберләр күп, монысы бигрәк тә тетрәндергеч булды.

Радик НОВИКОВ, Республика клиник хастаханәсе табибы:

 
– Ничек сабак бирмәсен, бөтендөнья халкы хафага төште. Кеше андый фаҗига килеп чыкканда нәрсә эшләргә, кая барырга белми, күзенә ак-кара күрен­ми. Егылган кеше шунда ятып кала, аны таптап китәләр, алар арасында балалар да булырга мөмкин. Пермьдәге “Хромая лошадь” төн­ге клубында янгын чыкканда яр­дәмгә без дә барган идек. Күпчелек күңел ачу бина­ларының эчке ягы тиз янып бетә торган синтетик материаллардан эшләнә. Алар агулы матдәләр бүлеп чыгара. Шуларны бер тапкыр сулыш алуга кеше үзен бе­лештермәс хәлгә килә. Социаль челтәрләрдә, бәвелгә манчылган чүпрәк иснәү сулыш юлына агулы матдәне үткәрми, дип язалар. Мин, табиб буларак, әлбәттә, андый нәрсә киңәш итә алмыйм. Ә дымлы чүпрәк аша сулыш алганда, чыннан да, зарарлы матдәләр бер­никадәр тоткарлана.

Раушания СӘҮБӘНОВА, Казан халык сәнгате һөнәрләре техникумы директоры:

 
– Әлбәттә, өйрәтте. Бик зур гыйбрәт бу. Безне – техникум директорларын ел саен янгын куркынычсызлыгы кагыйдәләренә өйрәтәләр. Үзебездә елга ике мәртәбә өйрә­нүләр үткәрәбез. Студентлар өчен ачык дәресләр оештырабыз. Элек уку йорты бинасы иске булгач, тиешле таләп­ләргә туры килми иде. Хәзер бик яхшы ремонт ясалган, электр чыбыклары алыштырылган. Кеч­кенә кызым белән сәүдә үзәк­лә­ренә баргач, иң беренче чиратта, эвакуация планына карыйм. Аннан чыгу юллары белән танышып йөрибез. Чит илләрдә дә күр­гәз­мәләрдә еш булырга туры килә. Анда халык бу мәсьәләгә аеруча игътибар бирә. Туктап, эвакуация планнарын караучылар күп. Ә бездә әле халыкның иминлек мәсьәләсендә белеме җитми.

Ким ШАКИРОВ, “ВТ”ның актив хәбәрчесе:

 
– Бала-чага – бик кадерле зат, аларның иминлеге турында гел кайгыртып яшәргә кирәк. Сабый вакытта күргән фаҗигаләр күңел­дә бик тирән эз калдыра. Закон чыгаручылар иминлек мәсьәләсен һәр­вакыт беренче урында тотсын иде. Закон кабул ителгән икән, хокук органнары аның үтәлешен бас­кычлап тикшерсен, халык та бу хакта хәбәр­дар булсын. Яхшы законнар кабул ителгән очракта да, алар үтәлми икән, халыкта хаки­мияткә карата ышанмау барлыкка килә. Минем фикеремчә, өлкән ке­шеләрне ха­кимияттә киңәшче итеп эшләтү кирәк. Олы кешенең реакциясе акрыная, ул яшьләр кебек фикер йөртә алмый. Тормыш яшьләр кулында булып, өлкән кеше үз тәҗ­рибәсеннән чыгып, аңа юл күр­сәтеп торсын. Менә шул вакытта гына тормыш тынычрак булыр.

 
Айсылу ГАЛИЕВА, өч бала әнисе:

 
– Шушы хәлләрдән соң балалар белән гадәттән тыш хәл очрагында үз-үзеңне тоту кагыйдә­ләре турында сөйләштек. Кеше кая бара, шунда барырга, олылар белән урамга чыккач та очрашып буласын аңлаттык. Ни өчен дигәндә, бала әти-әнине югалтам дип, куркып кала. Мәгълүматлар иң беренче интернет чыганаклар аша таралды. Үзәк телевидение бу хакта 27-28е генә ныклап сөйли башлады. Хәзер таныш булмаган урынга кер­гәндә бинаның планы белән танышырга, чыгу юлларын хәтер­дә калдырырга кирәк дигән фикер­гә килдек. Моңа кадәр бу хакта уйлаган да юк иде. Яулык-шарфлар турында безнең балалар бакчаларында да сөйлиләр. Бакчада да, мәктәптә дә елга бер тапкыр эвакуация ясыйлар, күнекмә­ләр үткәрәләр.

Резеда Гасыймова, “Көмеш кыңгырау”  балалар газетасы журналисты:

 
– Моңа кадәр жәмәгать урыннарында иминлек системага салынган, дип саный идек. Бу юлы алай булмавын аңладык. Без үзебезне үзебез кайгыртырга тиеш. Шуңа гадәтләнергә, балаларны да шуңа өйрәтергә кирәк. Бу, билгеле, гарантия түгел, тик Ходай сакланганны саклармын ди­гән.

 

“ВТ“ кайнар линиясе

 

Сорау юллаучылар игътибарына! “ВТ“ кайнар линиясе көн саен бик күп мөрәҗәгать кабул итә. Үзегезне борчыган сорауларны 8843 222-09-67, 222-09-70 һәм 89872076910 телефон номерларына шалтыратып юллый аласыз. Телефон аша гына җиткереп булмаган очракта Казан шәһәре, Академия урамы, 2 нче йорт яки info@­vatantat.ru электрон адре­сына аңлаешлы итеп хат язып салыгыз.

 

Урамда калмаммы?

 

Фатирны ирем белән бергә алдык. Документ эшләре белән ул йөрде. Моннан 20 ел элек булган хәлләр инде бу. Быел фатир кәгазен алып карасам, анда миңа өлеш юк икән. Кат-кат укыдым. Тик ирем аны үзенә генә яздырып куйган булып чыкты. Үзенә әйткәч, мин үлсәм, бу фатир барыбер сиңа кала бит инде, ди. Балаларга да ышаныч юк. Картайган көнемдә урамда калмаммы?

 
Фәнүзә

 

Мондый очракта сезгә никах килешүе төзергә кирәк. Аның өчен ирегез белән нотариуска барырга туры киләчәк. Әгәр фатирыгызда өлешегез юк икән, әлбәттә, ул Сезнеке булып саналмый. Анда тер­кәлеп тору гына берни дә бирми. Шуңа күрә ки­лешү төземичә булмый. Мон­дый очракта фатир ике­гезгә дә тигез итеп бү­ленә.

 

Миңа акча түләрләрме?

 

Югары уку йортында белем алам. Күптән түгел кияүгә чыктым. Тиздән бәбиебез дә булачак. Эш урыным булмагач, миңа бала тапкан өчен пособие түләрләрме?

 
Гөлназ

 

Эшләсәгез дә, эшләмә­сә­гез дә, бала тапкан өчен бер тапкыр бирелә торган пособиене алырга хакыгыз бар. 2018 елда әлеге сумма 16 мең 759 сум 9 тиенне тәшкил итә.  Укыган урыннан академик ял рәс­миләш­терергә туры ки­ләчәк. Анысын да алдан хәл итеп куегыз. Калган барлык пособие­ләрне уку йорты түләячәк. Бу акча бюджетта укучыларга да, түләүле бү­лектә белем алучыларга да бирелә.

 

Идарәче оешма җавап тотамы?

 
Ишегалдына кергәндә, машинамны борырга өлгер­мичә калдым. Юл бозлавык булганга, машинаның арты таш диварга бәрелде. Идарәче оешма вакытында юлларны чистартмаганга шулай булгандыр  дип уйлыйм. Мин алардан машинаны төзәтү өчен акча таләп итә аламмы?

 
Рәшит

 

Сезнең сүзегезгә генә ышанып, идарәче оешма машинагызны төзек­лән­дер­мәя­чәк. Моның өчен судка мө­рәҗәгать итәргә кирәк булачак. Анда барганчы, документлар җые­гыз. ЮХИДИ хез­мәт­кәр­ләре биргән бе­леш­мә, авария урынында тө­ше­релгән фо­тосурәтләр һәм видеоязма, шаһитларның сүз­ләре – үзегезнең хокукыгызны як­лар өчен болар­ның берсе дә комачау ит­мәячәк.

 

Туганнар табылса, нишләргә?

 
Ике бүлмәле фатирымны кызыма васыять итеп калдырмакчы булам. Тик күңелгә шом керде әле. Мин үлгәч, туганнарым кызымнан үзләренә өлеш сорый башласалар, ул нишләр? Андый очраклар да булып тора бит. Кызыма зыян килмәсен өчен, нишләргә икән?

 
Сәлимә

 

Васыятьнамәне ике оч­ракта гына суд аша юкка чыгарырга була. Беренчесе – әгәр документны тө­зегән ке­шенең ул вакытта үз акылында булмаганлыгы ачык­ланса, икенче­сен­дә – варис булып калган кешенең фатир хуҗа­сына начарлык эш­ләгәне билгеле булса. Әгәр фатиры­гызның бары тик кызыгызга гына калуын телисез икән, аны бүләк итеп бирегез. Бу очракта салым тү­ләргә дә туры килмәячәк.

 

Боз кичүе кайчан ябылачак?

 

Көннәр җылыта башлады. Моңарчы Түбән Камадан авылыбызга гел боз кичүе аша кайтып йөри идек. Кичүләр кайчан ябылачак?

 
Венера

 

Татарстанда Алабуга, Мамадыш, Яшел Үзән һәм Югары Ослан районнарында дүрт боз кичүе бар. Татарстанның кечкенә суд­нолар буенча баш дәү­ләт инспекторы Юрий Венедиктов сүзләренә караганда, әлегә аларда боз калынлыгы 60 сантиметрны тәш­кил итә. “Әгәр боз ки­чү­ләрендә тигезсез­лекләр, ярылган урыннар барлыкка килсә, хәрәкәт туктатылачак. Алар киләсе атнада ук ябылыр дип уйлыйм”, – диде ул. Боз кичүләре ябыл­гач, “Бозга керү куркыныч” дигән ки­сәтү бил­геләре куелачак. Казанда, Чаллыда, Яшел Үзән, Лаеш, Чистай, Тукай, Кама Тамагы, Минзәлә районнарында сигез кизү-кот­кару посты оештырыла.

 

Бирерләрме икән?

 
Ирем урын өстендә ята. Аңа тиешле подгузникларны әле дә ала алган юк. Социаль яклау бүлегенә дә барып карадык. Көтәргә кушалар. Кая мөрәҗәгать итәргә?

 
Рәмзия.
Казан

 

Протез һәм ортопедия җайланмаларын төзеклән­дерү, коляскалар бирү,  ши­фаханәләргә юллама алу, дәваланырга барганда юлда йөрү өчен тү­ләүләр Социаль иминият­ләштерү фонды аша башкарыла. Инвалидлар, үз­ләренә кирәкле ташламалардан файдаланыр өчен, гариза язарга тиеш. Подгузниклар проблемасын социаль яклау бүлекләре хәл итә. Татарстан Социаль иминиятләштерү фон­ды­ның кайнар линия телефоны: 8(843) 221-50-99.

(“Ватаным Татарстан”,   /№ 44, 30.03.2018/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!