ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 56, 17.04.2019/

"Бу команда һәрвакытта йөрәгемдә калачак". Билалетдинов Казаннан ник китә?

 

“Ак барс”ның беренче мәртәбә Гагарин Кубогы яулаганына кичә 10 ел тулды. Ике көн элек исә Зиннәттула Билалетдинов Казан командасыннан китүен игълан итте. Үзе теләп. Мондый хәл бер тапкыр булды инде. Анысында татар остазы Сочида Россия командасы белән алтын яуларга тиеш иде. Килеп чыкмады һәм ул кире кайтты. Билалетдиновны кабат көтәргәме?

 bars120419
Әйтүләренә караганда, Зиннәтулла әфәнде “Ак барс»тан китү теләген әле сезон тәмамлангач ук белдергән. Әмма аңа ашыкмаска киңәш биргәннәр. Татарстан Президенты Рөстәм Миңнеханов та, март башында журналистлар белән очрашкач, оттырсалар да, клубка карата мөнәсәбәте үзгәрмәгәнен әйткән иде. “Җиңсәләр дә, җиңелсәләр дә, бу – безнең команда. Хискә бирелергә ярамый, аларга теләктәшлек күрсәтергә кирәк. “Ак барс” – Россия генә түгел, Европа дәрәҗәсендә җитди клуб, – диде ул. – Мин күбрәк Сәфәров һәм Песошин эшчәнлеген анализлыйм. “Ак барс» өчен башкалар җаваплы”.


Пәнҗешәмбе кичендә исә Рөстәм Миңнеханов Зиннәтулла Билалетдинов белән Казан Кремлендә очрашты. Очрашуда “Ак барс»ның президенты Наил Мәганов та катнашты. Аның сүзләренә караганда, клубта Зиннәтулла Билалетдиновның китүен үкенеч белән кабул иткәннәр. Рөстәм Миңнеханов та тренерның шундый карар кабул итүенә үкенүен белдергән, әмма бу адымга хөрмәт белән каравын әйткән. Татарстан Президенты “Ак Барс“ хоккей командасының казанышлары һәм илдә иң көчле командага әверелүе, хоккейчылар әзерләү системасы булдырганы өчен Зиннәтулла Билалетдиновка рәхмәтен җиткергән. “Сезнең исемегез “Ак барс“ клубы тарихында мәңгегә уелып калачак», – дигән республика башлыгы һәм танылган остазны зурлап озатырга кушкан. Сүз уңаеннан, Зиннәтулла Билалетдинов “Ак Барс»ның Моисеев исемендәге Хоккей академиясендә мактаулы президент булып калачак.


Команда белән 2006 елда суперлиганы откан, ә аннары өч тапкыр Гагарин Кубогын яулаган тренер исә тамашачыларга клубның рәсми сайты аша мөрәҗәгать итте. «2004нче елда «Ак барс»ка килгәннән бирле бу команданың минеке икәнен аңладым. Казанда уздырган 14 ел дәвамында республика, шәһәр, команда һәм безнең искиткеч җанатарларыбыз җаныма якын булды. Бергәләп ирешкән уңышларыбызны беркайчан да онытмаячакмын, – дигән баш тренер, хоккей сөючеләргә мөрәҗәгать итеп. – Нәкъ менә Казаннан мине Россия җыелма командасына чакырдылар. Авыр вакытта да биредә теләктәшлек күрдем. Ә хәзер нәрсәнедер үзгәртергә кирәклеген аңладым. 18 яшемнән бирле хоккейда инде мин. Соңгы 22 елымны тренерлык эшендә уздырдым. Гаиләм, якыннарым, клуб белән киңәшләшеп «Ак барс»ның баш тренеры эшеннән китәргә булдым. Бу команда һәрвакытта йөрәгемдә калачак. «Ак барс»ны яхшы киләчәк көтә. Мин моңа шикләнмим».


Журналистларга ул арыганлыгын, беренче чиратта рухи яктан алҗыганын әйткән. “100 процентка бирелеп эшли алмыйм. Ә бөтен көчемне бирмичә эшли белмим”, – дигән ул. Тренер сүзләренә караганда, аның китүе быелгы сезонның уңышсыз тәмамлануына бәйле түгел. Моннан бер ай элек узган матбугат очрашуында исә Билалетдинов “Ак барс”та эшләргә көч җитәрлек булуын әйткән иде. Ни өчен фикере үзгәргән? Билалетдинов сүзен һәрвакыт үлчәп сөйләве һәм хискә бирелмәскә тырышуы белән аерылып торды. Казанда эшләргә җыенуын әйтүе команда тирәсендә кирәкмәгән ыгы-зыгы тудырмаска тырышуга бәйле булырга да мөмкин.


Билалетдинов әлегә ял итәргә җыена. Кайбер басмалар алга таба Зиннәтулла әфәнденең оныгына зуррак игътибар бирәсен фаразлый. Кызының улы Александр Романов ЦСКАда чыгыш ясый. 18 яшьлек сакчы өметле уенчылардан санала. Бабасының кулы астында исә әнә шул өметләрне акларга җиңелрәк булачак.


“Ак барс”тагы үзгәрешләрне “Рубин”да булган хәлләр белән чагыштыручылар да бар. Корбан Бәрдыев җитәкчелегендә беренче лига командасыннан ил чемпионына әверелгән һәм Чемпионнар лигасында таныла башлаган футбол клубында, бу остаз киткәч, зур үзгәрешләр башланды һәм ахыр чиктә зур кризиска әверелде. “Рубин”да көч-хәл белән футболчыларга хезмәт хакы түлиләр. Бәрдыев кире кайтты, әмма команда белән алга таба ни буласы әле дә билгеле түгел. “Ак барс” исә тотрыклылык белән алдыра. Татарстанның төп хоккей командасы “Татнефть” канаты астында яши. Озак еллар дәвамында барлыкка килгән система баш тренер алмашынган өчен генә җимерелә торган түгел.


Бәрдыев димәктән, хоккей сөючеләр хәтерли булыр: Билалетдинов та “Ак барс”тан бер китеп кайтты инде. Сочи Олимпиадасы алдыннан Россия җыелма командасына алтын яулый алырлык тренер кирәк иде. Бу эшкә Зиннәтулла әфәндене кодаладылар. Мәсьәлә исә Россия Президенты дәрәҗәсендә хәл ителдде. Җыелма команда дөнья чемпионатын отты, ә менә Олимпиадада берни майтара алмады. Ул вакытта Билалетдиновка бик күп тәнкыйть ишетергә туры килде. Мәскәүдән ул Казанга кайтты. Икенче елны аны янә баш тренер итеп билгеләделәр. Бу юлы да кабат әйләнеп кайтмас дип кем әйтә ала? Аңа әле – 64 кенә яшь.


Анысы инде Билалетдиновка гына түгел, “Ак барс”ка да бәйле булачак. Казан командасы яңа тренер кулы астында нәрсә эшли алыр? Бу вазифага Дмитрий Квартальнов белән Вячеслав Быковны кодалыйлар. Илнур Гыйззәтуллин белән Әнвәр Гатиятуллин исемнәре дә ишетелә. Беренче икесенең тәҗрибәләре бар. Фамилиягә дә игътибар итми калмаслар. Ник дигәндә, Зиннәтулла Билалетдиновны үзебезнең кеше булганы өчен дә якын күрдек. Ул үзе дә каян чыкканын яшермәде, Нижгар өлкәсендәге авылдашлары белән элемтәсе өзелмәде. Нәкъ менә аның кулы астында уйнаганда “Ак барс” Татарстан гына түгел, бөтен татарларның командасына әверелде.


Хәзер кем генә килсә дә, “Ак барс”та зур үзгәрешләр көтелә. Команда быелгы сезонны уңышсыз тәмамлады. Шуңа күрә Билалетдинов китмәгән очракта да үзгәрергә тиеш иде. Инде эшләр болайга киткәч, килү-китүләр тагын да күбрәк булырга мөмкин. “Яшермим, Билалетдинов – хәзерге вакытта иң яхшы тренер. Андый кеше һәр командага кирәк, – дигән “Ак барс”ның иң танылган уенчысы Данис Зарипов. – Аның китүе минем карьерага да йогынты ясарга мөмкин. Кем белә, бәлки, миңа да туктарга туры килер”.

(“Ватаным Татарстан”,   /№ 55, 13.04.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!