ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 90, 25.06.2019/

Сез кайларда йөрисез икән?

 

Хөрмәтле укучыларыбыз! “Ватаным Татарстан” газетасы 2013 елның август аеннан бирле “НТВ” каналындагы иң популяр “Жди меня” тапшы­руының ирекле ярдәмчесе ди­гән статуска ия. Игътибарлырак булсагыз иде. Исем­лектәге югалган кешеләрнең язмышы Татарстан Республикасына бәйле. Теге яки бу сәбәп бе­лән бер-берсен күрергә тил­мергән кешеләр сезнең танышыгыз, күршегез, авылдашыгыз булырга да бик мөмкин. Берәр яңалык булса, без аларны шунда ук “Жди меня” тапшыруына юллаячакбыз.

7-2

Гамәл дәфтәре
 

 

Абдулла исемле абыем бар
 

№ 2657386

15 март, 2019 ел

“Жди меня” тапшыруыннан килгән бу игъланда аңлаешсыз урыннар бар: Латфуллин Абдулла тагын бер Латфуллин Абдулланы эзли, ягъни бер үк исем-фамилия күрсәтелгән.

 

Анда: “Әтием ягыннан фронтовик абыемны эзлим. Әтием миңа Казан кызына өйләнүе хакында сөйләгән иде. Аның улы 1922 елда туган, ул аны Габдулла Тукай исеме белән атаган. Абыемны, бер дә булмаса, аның туганнарын табасы иде”, – дип язылган.

 
Абдулла абый Латфуллин табылды. Ул Апас районындагы Дәвеш авылында яшәгән, 2007 елда вафат булган. Аның ике улы – Фәрит (1958 елгы) белән Камил дә (1957 елгы) шушы авылда тормыш корганнар. Безгә Камилнең кияве Сафин Хәсән Хәмзә улы шалтыратты. Чыннан да, игъланда язылганча, Абдулла абый – фронтовик. Ул элек Әтнә районының Олы Өшкәтә авылында яшәгән. 1941 елны шуннан сугышка киткән. Тәлгать (1932 елгы), Кәрим (1938 елгы) исемле ике энесе, Нурания исемле сеңлесе бар икәне билгеле. Игъланда язылган сүзләрне Абдулла абыйларның балалары да аңлап бетермәде. Әмма кызыксынулары бик көчле. Туганнары белән күрешәсе килә.
Без Абдулла Латфуллин турындагы мәгълүматларны “Жди меня” редакциясенә юлладык. Җавап көтәбез.

Наҗия табылды, өмет акланмады

 
29 март санында “Өметем бар әле” дигән баш астында Галимҗанова Рокиянең Фәх­разиева Наҗияне эзләве турында игълан басылган иде.

 
Редакциягә Әгерҗе районы Тәбәрле авылыннан Наилә Мухаярова -Фәт­хетди­нова шалтыратты. Ул Наҗия белән 1961-1966 елларда Алабуга педагогия институтында укыган. Уку йортын тәмамлагач, Наҗияне Минзәлә районындагы Тупач авылына юллама белән җибәргәннәр. Ул хәзер дә шунда гаиләсе белән яши икән. Сабакташы белән аралашып торалар. Наилә апа, газетаны уку белән, сөенеч уртаклашып, дустына шалтыраткан. Әмма ул, ни кызганыч, Рокия апаны хәтерләп бетерә алмаган. Аның каравы Рокия апа Наилә апа белән дуслашып киткән. Редакциягә дә шалтыраттылар. Рәхмәтләрен җиткерделәр. Без, игътибарлы һәм ярдәмчел булганы өчен, үз чиратыбызда Наилә апага рәхмәтлебез. Хәтер­ләр яңарып, рәхәтләнеп аралашырлар ди­гән теләктә калабыз.

 
Әниемнең туганы кайда икән?

 
Мин, Башкирцева (кыз фамилиям) Ләйсән Роберт кызы, 1987 елда Алабуга шәһәрендә туганмын. Хәзер әнием Башкирцева Наилә белән шәһәрдән ерак түгел урнашкан Поспелово бистәсендә яшибез.

 

Әнием үзе Казан шәһәрендә туып үскән. Аның әбисе Башкирцева Әминә Хәйрулла кызы заманында Казанда бик күренекле акушер-гинеколог булган. Аны күпләр хәтерли әле дип сөйләгәннәрен ишеткәнем бар. Ул 1968 елда бакыйлыкка күчә.  Әминә әбиемнең өч баласы булган: Наҗия – әниемнең әнисе, 1937 елгы, Җәүдәт һәм Камил. Әбием Наҗия тумыштан инвалид булган, ул балалар йортында тәрбияләнгән.

 

Әнием Наиләнең дә язмышы балалар йорты белән бәйләнгән. 18 яшенә кадәр тәр­бияләнгәннән соң, 25 яшькә кадәр Казанда яшәгән дә Алабугага күчкән. Әнием Камил абыйсына кайчандыр ярдәм сорап барган булган. Ни кызганыч, аның белән аралашырга теләмәгәннәр. Әнием Камил абыйсының Вәлиев Алмаз исемле улы барын да белә. Ә менә икенче абыйсы Җәүдәт турында бернәрсә дә белми. Аны эзләп табарга гомере буе хыялланып яшәде. Без 2006 елда “Жди меня” тапшыруына да хат язган идек. Жәүдәт абыемның бердәнбер фотосын да шунда җибәрдек. Әнием хәзер фотосыз калганга да бик үкенә. Тапшырудан фотоны алырга һәм абыебыз Башкирцев Җәүдәт Алабердиевичны (1937 елгы), аның балаларын, башка туганнарын табарга ярдәм итсәгез иде.

 16-1
Башкирцев Җәүдәт                                                  Әтисе – Шәрәфетдинов Алабирде

 

Редакциядән. Ләйсән ханым соравы буенча “Жди меня” сайтыннан Башкирцев Җәүдәтне эзләү хакындагы игъланны эзләп таптык. Җәүдәт абыйның фотосын алып, ватсап аша юлладык. Ләйсән дә, Наилә апа да бик шатланды. Җәүдәт Башкирцевны, балаларын белүче кешеләр булса, редакциягә шалтыратсагыз иде.

 
Хезмәттәшем белән күрешер идем

 
Мамадыш районы Шәдче авылыннан Шакиров Фәрит (1948 елгы) 1968-1969 елларда Венгриядә бергә хезмәт иткән хезмәттәше Овчинников Валентинны эзли.

 

Фәрит аның Ульяновск шәһәреннән һәм Валентина исемле кызга өйләнергә җыенганын гына белә. Бу игъланны без “Жди меня” тапшыруына юлладык. Бәлки, газета укучылар арасында да Овчинников Валентинны белүчеләр бардыр. Редакциягә хәбәр итсәгез иде.

 

Сабакташның ярдәме кирәк

 
Мин, Хайдукова Наилә Мөхәммәт­нуров­на, энем Арсланов Илгизәр Мөхәммәт­ну­ро­вичның сабакташы Сабиров Гумәрне эзлим.

 
Энем 1960 елгы. Тумыштан инвалид. Сөйләшә белми, бик аңлап бетерми. 1970-1972 елларда Казанда кайсыдыр бер коррекцион мәктәптә укыды. Хәзер опекунлык рәс­миләштерер өчен шул мәктәптән белеш­мә кирәк иде. Эзләп карадым. Беркайда да таба алмадылар.

 
Без үзебез Әгерҗе районындагы Яңа Шмәк авылыннан. Соңрак мин Себергә эшләргә киттем. Әти-әни Илгизәр белән Удмуртиягә күченделәр. Энем мәктәпне тәмамлый алмады, чөнки әтигә йөртергә бик авыр булды. Башта Әгерҗегә 40 чакрым киләсе, аннан Казанга кадәр барасы иде. Хәзер әти-әни исән түгел инде. Документлар калмаган.

 16-2
Энем сабакташы Гумәр йорты янында

 

Ул Сабиров Гумәр исемле Казан малае белән бергә укыды. Аларга кунакка да барып йөрде. Аның Мәрьям һәм Зәйнәп исемле әллә әтисенең, әллә әнисенең кыз туганнары бар иде. Гумәрне тапсам, барысын да ачык­лап булыр кебек. Белүчеләр булса, хәбәр итсәгез иде.

 

Язмышын беләсем килә

 
Сираҗиев Кәфил Җиһанша улы бертуган абыйсының улы Рөстәм Сираҗиевны эзли. “Рөстәм Саратов шәһәрендә яшәргә тиеш. 1985 елны улымны өйләндергәндә хатыны, баласы белән кайткан иде.

 

Шуннан бирле бернинди хәбәре дә юк. Хатыны Әнисә исемле, тумышы белән Казахстаннан, татар кызы , улы – Әнис. Бездә аның адресы да бар: Саратов шәһәре, Первомайская урамы, 47/53 нче йорт, 279 нчы фатир. Хат язам, җавап килми. Туганымның язмышын бик тә беләсе килә”.

 
Кәфил абыйның бу мәгълүматын без “Жди меня” сайтына куйдык. Газетага да бирергә булдык. Саратов үзе дә әллә ни ерак түгел. Татарстанда яшәүчеләрнең туганнары да бардыр. Бәлки, кем булса да беләдер?

 
Очраша алмадык

 
Казандагы Дәрвишләр бистәсеннән Идрисов Әхәт абый Омскида 1964-165 елларда бергә хезмәт иткән дусларын эзли. Ул үзе 1941 елгы. Хәрби хезмәттә 1943 елгылар белән бергә булган.

 

Аларның берсе – Ситдиков Альберт, Башкортстаннан, икенчесе – Саттаров Рафаэль, Татарстаннан. Кайсы районнан икәнен хәтерләми. Сабадан түгелме икән дигән уе бар. “Ул соңрак кайтты. Мине Омск вокзалыннан поездга утыртып җибәргәннәр иде. Солдатка алынганчы, пилорамда эшләдем, дигәне истә калган. Кайтышлый Киндерлегә, мин яшәгән адрес буенча килгән булган. Тик мин ул көнне авылга кайтып киткән идем. Күрешә алмадык. Хәзер, еллар үткәч, бик тә очрашып, сөйләшәсе килә”, – ди Әхәт абый. Белүчеләр булса, шалтыратсагыз иде.

 

№ 2654755
Исхакова Рәсимәне эзлим
 

 

Туган елы: 1962
Эзләү урыны: Татарстан Республикасы
Ул беркая да китмәгән булырга тиеш.

 16-3 Миназов Рөстәм

 

 

№ 2705019
Шәрипова Рәисәне эзлим
 

 

Туган елы: билгесез
Эзләү урыны: Татарстан Республикасы
Мин, Идигенов Зәйнулла, әниемнең үтенече буенча язам. Ул әнисе ягыннан туганнарын эзли. Әтисе – Әхтәм Харрас улы Шәрипов, әнисе – Рәисә Хаҗи кызы Шәрипова, якынча 1928-1929 елгы булырга тиеш, Казанда туган (кыз фамилиясен белмим). Аңа өч яшь тулганда әнисенең үлеп киткәне генә билгеле. Бәлки, Рәисә Хаҗи кызының туганнары бардыр?
Шәрипова Тәнзилә


№2704448
Сәлахов Ринатны эзлим
 

 

Туган елы: 1973
Эзләү урыны: Татарстан Республикасы
Соңгы тапкыр мәктәптә математика укытучысы булып эшләгән иде.
Дудкина Нина

 

 

№ 2704364
Саматова Илсиярне эзлим

 
Туган елы: 1958
Эзләү урыны: Татарстан Республикасы
Әнием белән танышканда, әти­ем Саматов Касыйм Фәхразие­вич­ның Татарстанда гаиләсе булган. Бу хакта миңа зур үскәч кенә сөй­лә­де­ләр. Ике кыз туганым барлыгын да әйттеләр. Минем аларны беркайчан да күргәнем юк. 2016 елны әни­ем вафат булды. Сигез айдан соң, 2017 елны әтием дә үлеп китте. Аның белән мөнәсәбәтләрем бик киеренке иде. Үлеп киткәч, бөтен үпкә­ләүләрем дә юкка чыкты. Апаларым­ны бик тә күрәсем килә. Аларның әниләре Ракия исемле, үзләре – Лилия һәм Илсияр, якынча 1955-1960 ел­гы булырга тиешләр.
Суворина Татьяна


№2703953
Билгесез Билгесез

 

Туган елы: 1984
Эзләү урыны: Татарстан Республикасы
Игез кыз туганымны эзлим. Без аның белән Баулы шәһәренең балатабу йортында 1984 елның 11 маенда туганбыз. Ул Казанда яки Чаллыда яшәргә тиеш.
Климова Наталья

(“Ватаным Татарстан”,   /№ 58, 19.04.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!

Фотохәбәр

Видеохәбәр