ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 57, 19.04.2019/

“Акчадан да кадерлерәк символ уйлап табасы килә”

 
Тамашачы батырдан кәттәрәк бүләккә ия булачак. Бу шимбәдә Казанда узачак “Манзара” спорт-музыкаль премиясе тантанасын оештыручылар әлеге бәйгедә җиңгән көрәшчегә кыйммәтле билбау һәм саллы гына премия вәгъдә итсә, милли спорт төрен сөючеләр арасында машина уйнатачак. Төп фаворит дип Раил Нургалиевны саныйлар һәм аның финалда чыгыш ясаячагына инде хәзердән үк шикләнмиләр.

5-2
 

minsport.tatar.ru

 

Әлеге бәйге икенче мәртәбә оештырыла. Узган елгысы “Пирамида” бинасында узды, ә быелгысын циркта оештырырга карар кылганнар. “Мондый турнирлар уздыру хыялы күптән бар иде, башкаларга да кызыгып йөрдек. Әйтик, Казахстанда охшаш бәйгедә беренче урынны алган егетләргә фатирлар, 100әр мең доллар акча түлиләр, – ди Татарстан спорт министрының беренче урынбасары Хәлил Шәйхетдинов. – Заманасы шундый: татар көрәшенә атлыгып торучылар арта дип әйтә алмыйм. Авылда егетләр кими. Әмма батыр булуның дәрәҗәсе кимемәде. Егетләрнең күңелен күтәреп торсак, көрәшнең киләчәге булачак. Киләчәктә әле халык бу чарага билет таба алмыйча аптырап йөрер дип хыялланам”.


Былтыргы ярышта Татарстан районнарының Сабан туе батырлары гына чыгыш ясаса, бу юлы чит ил егетләрен дә чакырганнар. Цирк мәйданында Казахстаннан Әскәрхан Осканов, Молдавиядән Анатолий Молдован, Үзбәкстаннан Голиб Әхмедов, Таҗикстаннан Мәхмәт Мировны көтәләр. Проект җитәкчесе Айдар Шәймәрданов сүзләренә караганда, катнашучылар исемлеген күргәч, кайбер район батырлары турнирда чыгыш ясаудан баш тарткан. “Бу ярышта барысы да гади. Чыгыш ясаучылар арасында 75 килолы көрәшчеләр дә булачак. Әмма келәмгә чыгучыларның авырлыгы 130 килодан артмаска тиеш. Кем курыкмый – шул килә”, – диде ул. Бәйгедә барлыгы 32 егет катнаша.


Узган елгы бәйгедә татар көрәшендәге иң көчле һәм дәрәҗәле егетләрнең берсе Раил Нургалиев батыр калган иде. Аны быел да төп фаворит дип саныйлар. Һәрхәлдә, Хәлил Шәйхетдинов Раилгә финалга узган ел яулаган җиңүче билбавын тагып чыгарга тәкъдим итте. “Финалга кадәр барып җитәргә кирәк әле”, – диде Нургалиев, дипломатларча. Хәер, Шәйхетдинов үзе дә тамашачының яңа батыр көткәнен яшерми. “Раил өчен халыкның 10 проценты гына җан атачак. Аларга кызык һәм яңалык кирәк. Барысын да келәм күрсәтәчәк”, – диде ул.


Ничек кенә булмасын, Раилнең билбавы үзендә калачак. Ник дигәндә, быелгы батырга яңаны ясыйлар. Асылташлар белән бизәлер, бәясе 150 мең сум чамасы булыр, дип көтелә. Кыйммәтле булуының сәбәбе дә бар. Тормышта төрле хәлләр килеп чыгарга мөмкин, билбауны сатып акча эшләрлек булсын. Акча димәктән, узган ел җиңүчегә 100 мең сум күләмендә премия бирелгән иде. Быелгысының күләме былтыргыдан азрак булмаячак. Күбрәк тә булырга мөмкин әле. Анысы тамашачылар санына бәйле. Бу урында Айдар Шәймәрданов хискә бирелеп алды. “Акча өчен көрәшү төп максат түгел. Аннан да кадерлерәк символ уйлап табасы килә”, – диде ул.


Акча димәктән, узган елгы Сабан туйларыннан соң, көрәш җәмәгатьчелеге зурдан кубып милли спорт төрендә күптән барлыкка килгән проблема турында фикер алышты. Егетләрнең бүләк бүлешү белән бәйле ул. Бу турнирда әнә шундый хәлгә ничек юл куймаска? “ВТ” хәбәрчесе матбугат очрашуында катнашучыларга әнә шул сорауны бирде. “Барысы да кешенең үзеннән тора. Без исә, үз чиратыбызда, жирәбәне халык алдында уйнатачакбыз”, – диде Айдар Шәймәрданов. “Сабан туйларында бүләкне тегеңә яки моңа бир дип сөйләшкән юк, – дип серне ачты Раил Нургалиев. – Ләкин алдан ук килешеп була бит: кем отса да, башкаларны үпкәләтерлек булмасын”.


“Манзара” бәйгесендә исә иң зур бүләк тамашачыга эләгәчәк. Чөнки көрәш карарга килгән халык арасында лотерея уйнатачаклар. Бәхетле кешегә машина эләгәчәк. “Гранта” хуҗасының исемен исә баш батыр игълан итәчәк. Шуңа күрә килгән халыкка ярышны ахырына кадәр карарга туры киләчәк. Аларга көрәш белән бергә җырчылар да тамаша вәгъдә итә. Араларында Салават Фәтхетдинов та бар.

(“Ватаным Татарстан”,   /№ 7, 15.01.2019/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!