ИҖТИМАГЫЙ-СӘЯСИ ГОМУМТАТАР ГАЗЕТАСЫ

/№ 69, 19.05.2018/

Чүп бетәр, агач үсәр


Узган шимбә берьюлы ике чараны берләштерде. Казандагы Ишкәкле спорт төрләре федераль үзәге янында экологлар чүп җыйса, урманчылар агач утыртты. “Урман утырту көне”нә Татарстан Президенты Рөстәм Миңнеханов та кушылды. Ул көнне Урта Кабан күле тирәсе чистартылды. Шулай ук бу урында 440 данә зәңгәр чыршы, кәстәнә, тал һәм нарат үсентеләре утыртылды.

2-2
– 9 Май – Җиңү көненә кадәр төп санитар җыеш­тыру эшләрен тәмамларга дигән максатыбыз бар иде. Бүген өмәгә килгән ке­ше­ләрне, студентларны күреп шаккаттык. Мондый яшь­ләр булганда, әллә ниләр эш­ләргә була. Алар – үз мисалында табигатькә һәм әйлә­нә-тирә мохиткә нинди мөнәсәбәттә булырга ки­рәк­ле­ген аңлатучы буын, – диде экология һәм табигый ресурслар министры Александр Шадриков. – Икеайлык башланганнан бирле республиканың экологик хәлен кайгыртабыз. Һава­дан күзәтү үз нәти­җәсен бирә. Шул рәвешле табылган санкцияләнмәгән чүп­лек урыннарының 82 проценты юкка чыгарылды. Казанда да күп эшләр башкарыла. Чемпионатка әзерлек кысаларында шә­һәрнең экологик йөзен дә кайгырталар. Барлык районнарда, оешмаларда һәм тирә-якка битараф булмаган кешеләр тарафыннан зур эш алып барыла. Шу­ның өчен зур рәх­мәтемне белдерәм.

 
– Бүгенге көн башкаларыннан бер ние белән дә аерылмый. Әлеге акцияне оештырып, халыкның игътибарын җәлеп итмәкче булабыз. Бүгеннән бөтен республикада агач утыртыла. Акция вакытында 2 миллион 500 төп кәлшә утыртачакбыз. Бу гамәл урман күләмен арттыруга керми, без яшел зоналар тудырабыз. Мә­сәлән, бу спорт корылмасында бар да бар, әмма агачлар җитми иде. Шуңа күрә аны сайладык, – ди Татар­станның урман ху­җалыгы министры Равил Кузюров.


Урман утыртучылар ара­­сында озакламый 92 яшен тутыручы Турфан абый Насыйбуллин да бар иде. “Мин бит бу тирәдә ге­нә яшим. Өмә буласын ишет­тем дә килдем. Президентыбыз бе­лән агач утыртырга да насыйп булды әле. Бу арада өйдә утырганым юк. Җиңү бәйрәме җитә бит. Гел очрашуларга йөрим. Бакча эш­ләре дә көтеп тора. Көннәр матур торса, анда да барып кайтырга исәп”, – ди ветеран.


Сания апа да ел саен өмәгә йөри. “Башта транспортта ялгыш утырып кит­кәнмен. Бу урынны көч-хәл белән эзләп таптым. Әмма үз өлешемне кертергә барыбер өлгердем. Агач та утырт­тым, өмәдә дә катнаштым”, – ди ул. Чүпрәледә яшәү­че физик мөмкинлеге чикләнгән Раилә Сатдинова да өмәгә катнашырга кил­гән. “Мин ишкәкле спорт төре белән шөгыльләнәм. Бирегә тренерым белән килдем. Йөри алмасам да, агач утыртуга үземнән өлеш керттем”, – ди ул, горурланып.


Ул көнне урманчылар, килгән халыкны чәй табыны янына дәшеп, кыр боткасы белән сыйласа, экологлар күңел ачу программасы әзерләгән. Төрле бәйге­ләр оештырып, җиңү­че­ләргә бү­ләкләр дә бир­де­ләр. Өмәгә килгән кеше­ләрне футбол фристайлына, тыгызланган пычкы чүп белән туп ясарга, сыерчык оясы ясарга өйрәт­теләр, экологик лайфаклар белән таныштырдылар, чүп­не тиз генә дөрес итеп араларга өйрәттеләр. Instagram чел­тәрендә “#эко­в­есна­2018” конкурсына багышланган иң яхшы фото һәм видео авторлары бу көнне үрмә ятак­лар, биш­тәрләр һәм турист чатырлары белән бү­ләк­ләнде. Интернет-кон­курс­та җиңү­челәр төп приз – спорт велосипедына ия булды.

(“Ватаным Татарстан”,   /№ 63, 08.05.2018/)


Бу язманы шәхси сәхифәгезгә дә урнаштырыгыз:


Язмага фикерегезне өстәгез

Фикерләр: 0

Архив

Котлыйбыз!