ИҖТИМАГЫЙ-СӘЯСИ ГОМУМТАТАР ГАЗЕТАСЫ

◄ башка яңалыклар

Казанда Россия Герое Марат Әхмәтшинга һәйкәл ачылды

Казанның 113нче татар-рус мәктәбе территориясендә Россия Герое Марат Әхмәтшинга һәйкәл ачылды.

Чарада Татарстан вице-премьеры Васил Шәйхразиев һәм Казан мэры Илсур Метшин катнашты. Тантанага шулай ук Марат Әхмәтшинның гаиләсе – әти-әнисе, хатыны, улы да килгән иде. Чарада катнашучылар Геройны бер минут тынлык белән искә алды, Казан танк училищесы курсантлары мемориалга чәчәкләр куйды, дип хәбәр итә "Татар-информ".

«Бүген без якташыбыз Әхмәтшин Марат Радик улына һәйкәл ачабыз. Барлык кешегә дә тагын бер тапкыр аның үлемсезлеге мәңгелек икәнлеген күрсәтергә телибез», - диде Васил Шәйхразиев.

Марат Әхмәтшин 113нче мәктәптә белем алган, Казан артиллерия училищесына укырга кергән, аны тәмамлаганнан соң Төньяк Кавказ хәрби округында хезмәт иткән. 2016 елда аны Сүриягә җибәргәннәр. Шул ук елның 3 июнендә хәрби бурычын үтәгәндә, батырларча һәлак булган. Татарстанның Лаеш районы Атабай авылында җирләнгән.

Россия Президенты тарафыннан 2016 елның 23 июнендә кабул ителгән указ нигезендә махсус бурычларны үтәгәндә күрсәткән батырлыгы өчен капитан Әхмәтшинга үзе үлгәннән соң Россия Федерациясе Герое исеме бирелде.

113нче мәктәпкә дә Әхмәтшин исеме бирелде, Лаешта аның хөрмәтенә һәйкәл куелды.


Бу язманы шәхси сәхифәгезгә дә урнаштырыгыз:

Архив

Котлыйбыз!