Яртысы белә, яртысы – юк. Илкүләм проектлар кем өчен эшли?

– Илкүләм проектларны тормышка ашыру җиңел түгел. Юл, торак-коммуналь хуҗалык һәм башка мәсьәләләрне төбәк бел­гечләре ярдәмендә генә хәл итеп була, – диде Татарстан Президенты Рөстәм Миңнеханов кичә Иннополиста узган Идел буе федераль округында закон чыгаручылар ассоциациясе утырышында.

Очрашуда илкүләм проектларны тормышка ашыру, яңа тех­нологияләр кертү, кече һәм урта эшмәкәрлек мәсьәләләрен закон нигезендә көйләү турында сөй­ләш­теләр. Татарстанда барлыгы 12 илкүләм проект эшли. Президент белдергәнчә, барлык юнәлешләр буенча да җитди эш алып барыла. Алар төбәкне үстерү, халыкның яшәү шартларын яхшыртуны күздә тота. Нәтиҗәле эшләү өчен норматив-хокукый актлар да зур роль уйный, кайбер чакта аларны кыскарту, оптимальләштерү ки­рәк. Ассоциациянең эшчәнлеге исә парламентлар арасында мө­нәсәбәтләрне ныгыту, яңа хокукый механизмнар эшләү, закон чыгару буенча тәҗрибә уртаклашу өчен мөһим.

– Тормыш бер урында гына тукталып тормый, бер техноло­гиягә алмашка икенчесе килә. Яңа пәйда булган объектларны нор­матив-хокукый яктан көйләү их­тыяҗы туа. Тәҗрибә уртаклашу ба­ры тик файдага гына булыр, – диде Рөстәм Миң­неханов.

Татарстан Дәүләт Советы рәи­се Фәрит Мөхәммәтшин үз чыгышында инновацион технология­ләр турында сөйләде. “Республика “Санлы икътисад” илкүләм проектын тормышка ашыруда зур хезмәт куя. Республикадагы инновацион структураның тотрыклылыгын сакларга махсус икътисади зона, техник, индустриаль мәй­дан­чыклар, IT-парк һәм башкалар ярдәм итә. Нефть табу һәм аны эш­кәртү, машина төзелеше юнә­лешлә­рендә дә заманча техно­логияләр кулланабыз, – диде парламент башлыгы. – Илкүләм проектларны яхшы белгечләрдән баш­ка булдыру мөмкин түгел. Иннополиста кадрлар әзерләү буенча көч тупланачак. Без Идел буе федеарль округы төбәкләре өчен мастер-класс күрсәтергә әзер. Алга таба актуаль мәсьәләләрне хәл итүнең яңа юлларын эзләп, аны тәкъдим итәчәкбез.

Россия Президентының Идел буе федераль округындагы тулы вәкаләтле вәкиле Игорь Комаров белдер­гәнчә, һәр төбәктә, һәр районда проектның нәтиҗәсе күренергә тиеш. Аларны халык, җәмәгатьче­лек, бизнес һәм фән берлеклә­ренең фикерен исәпкә алып, ачык итеп алып бару таләп ителә.

– Бу эштә җирле түрәләргә зур җаваплылык йөкләнә. Беренче чиратта, каты көнкүреш калдыклары белән эш итү, тиешсез урыннарда булдырылган чүплек­ләрне бете­рү, халыкны тузган тораклардан чыгару, әйләнә-тирәне уңайлы итү… Һичшиксез, башка юнәлеш­ләр дә мөһим. Төп бурыч – ха­лыкның яшәү шартларын яхшырту, – диде Игорь Комаров.

– Илкүләм проектлар турында халыкка гел сөйләп, аңлатып торырга кирәк. Сораштыру нәтиҗә­ләре буенча халыкның нибары 57 проценты гына – сәламәтлек, 56 проценты – юл куркынычсызлыгы, 51 проценты мәгариф турындагы проектлар турында ишет­кәне бар, – ди Россия Пре­зиден­тының Идел буе федераль округында тулы вәкаләтле вәкиле урын­басары Игорь Буренков. Ди­мәк, яртысы белми. Бу уңайдан, Самара губернасы Думасы спикеры Геннадий Котельников: “Ил­күләм проектлар турында халыкка аңлатмыйча, нәтиҗәгә ирешеп булмый. Безнең вузларда 100 мең­нән артык студент белем ала. Алар­ны бу эшкә җәлеп итеп булыр иде”, – дигән тәкъдим җит­керде.

Сүз уңаеннан. Ассоциация 2002 елның 14 маенда дәүләт сәя­сәтен тормышка ашыруда бердәм хокукый нигез булдыру, төбәкләр­дә закон эшчәнлеген координа­ция­­ләүне җайга салу максаты бе­лән оешкан.

Сәрия Мифтахова


Фикер өстәү