Татарстан халкы сулыкларны пычрата һәм рөхсәтсез файдалы казылмаларны урлый. Бу хакта матбугат очрашуында Татарстанның экология һәм табигый ресурслар министрының беренче урынбасары Фаяз Шакиров хәбәр итте.
– Дәүләт инспекторлары тарафыннан табигатькә зыян салуның 3 меңнән артык очрагы ачыкланды. Суд тарафыннан алты оешманың эше туктатылды. Алар арасында “Татвторчермет” та бар. Ул туфракның өске катламына зыян салган. Хокук саклау органнары белән берлектә 17 җинаять эше ачылды, – ди Фаяз Шакиров. – Соңгы 3,5 елда республикада су янында йорт төзүчеләр, ишегалдында гына “үз инеше”н булдыручылар саны артып китте. Дөресрәге, без 2016 елда тикшерүләр башлагач, тәртип бозучыларның эзенә төшә башладык. 3,5 елда шундый 700ләп очрак ачыкланган. Су янәшәсендә төзелеш башлаучыларның йортларын сүттерергә туры килде. Табигатьне саклау кануннарын бозмасыннар өчен, 125 су объектының чикләрен билгеләдек. Шуларның 28е аеруча саклану статусына ия.
Файдалы казылмаларны рөхсәтсез генә алучылар да күбәеп киткән. Экологлар белән йөргән рейд вакытында без моңа үзебез дә инандык. Кешегә иң мөһиме – үзенә яхшы булсын. Табигать турында уйлаучы бик сирәк. Фаяз Шакиров та әнә шулай ди.
– Инеш-күлләргә пычрак сулар агызучылар да бар. Су чистарту җайланмасы аша чыкмаганга, ул елга-күлләрдәге тереклеккә зыян сала. Хәтта үләннәр үсүдән туктый, – ди ул. – Рөхсәтсез алынган казылма байлыклар – түләнмәгән салымнар дигән сүз. Шул казылган урында чүплек хасил була. Берәү казый, икенчесе чүбен илтеп бушата.
“Автостоп” операциясе барышында су буйларында машиналарын калдырган 17 очрак ачыкланган. 1 июльдән “Чиста һава” акциясендә 249 машинаны туктатып тикшергәннән соң, аларның 3,6 проценты тиешле нормаларга туры килмәгән.
Министр урынбасары, Питрәч районында табигатькә зур зыян салган оешма хакында да әйтеп узды. Узган атнада, кулында рөхсәт кәгазе булмаган килеш, бу оешма вәкилләре 70 миллион сумлык казылма байлык ташыган.
– Бу факт буенча беркетмә төзелде. 800 мең сум штраф салынды. Алга таба бу оешманың эшен прокуратура караячак, – ди экологлар.
15 июльдән республикада “Чиста яр” акциясе башлана. Әлеге эштә волонтерлар гына түгел, һәр кеше актив катнашыр дип көтелә. Җыештыру эшләре 30 сентябрьгә кадәр дәвам итәчәк.
Гөлгенә ШИҺАПОВА
