Башка кибеттән алсаң, начаррак укыйсыңмы? Балалар – ялда, әти-әниләр мәктәпкә кием эзли

Фәлән фирма теккән мәктәп формасын гына сатып алырга! Башкалабызда кайбер уку йортлары әти-әниләргә кибет адреслары күрсәтелгән кәгазь тарата башлаган. Билгеле, кемнәр­гәдер мондый мәҗ­бүриләү ошамый. Шулай да өс-башны каян сатып алырга?

Кибет – базар түгел, анда сыйфатлы әйбер саталар, дигән фикердә торган әти-әниләр бу мәсьәләдә акча санамый. Ә менә очны очка ялгап яшәүче гаи­лә­ләр, шулай ук мәктәп директорлары табыштан процент ала дип күпсенүчеләр дәш­мичә калмый. Мәктәпкә әзерлә­нергә бер айдан артык вакыт калганда, интернетта әти-әниләр кием турында фикер алыша.

– Форманы башка ки­беттән алганда, әллә бала начаррак укый башлыймы? Интернеттан аны дүрт тапкыр очсызракка сатып алып була, – диюче әти-әниләр дә бар. Кемдер тегү фабрикасын яки кибетне рекламалау мәктәпләргә табыш ки­терә дип саный. Шуңа күрә мәктәпне баетасылары килми. Берәүләргә бердәм форма бөтенләй ошамый, янәсе, ак күлмәкләрне еш юарга, үтүкләргә туры килә. Фи­керләр бер төрле генә түгел.

– Нәрсәгә тавыш күтә­рергә? Без мәктәпкә әзер­ләнү төркеменә йөргәндә үк төрле фирма белгеч­ләрен чакыртып, форма турында киңәш­ләштек. Кызларга – аерым, малайларга аерым тегү фабрикасы сайладык. Барысы да бертөрле төстәге киемнән йөри, – ди кызы 2 нче сыйныфка баручы Ми­ләүшә.

– Безнең мәктәптә те­ләгән кеше – махсус кибет­тән, теләмәгәне башка җир­дән сатып ала. Бернинди проблема да юк. Базарны­кының сыйфаты әйбәт түгел. Быел 1 нче сыйныфка җые­нучы кызыбызны да шул ки­беттән киендерә­чәкбез. Бу күңелле мәшә­катьләрне август аена калдырдык. Әле­гә хезмәт хакы биргәнне көтә­без, – ди Казанда яшәү­че ике бала анасы Алсу Бә­широва.

Мәктәп формасын тек­терергә дә мөмкин. Әнә Ка­занның 16 нчы гимназиясе кием мәсьәләсен шулай оештырган.
– Бездә – бердәм форма. Тегүчеләр, мәктәпкә килеп, балаларның кием үлчәмнә­рен алдылар. Малайларга – костюм, галстук, гимназия там­гасы, кыска куртка, спорт киеме, футболка, аяк киеме салырга капчык – бары 7 мең сумга төште. Гимназия тектерткәч, бик яхшы булды әле бу, – ди хезмәт­тәшебез Эльвира Вәлиева. – 1 нче сыйныфка баручы улы­быз Сәмиргә аяк кием­нәре, күлмәкләр сатып алдык. Башка мәктәп кирәк-яракларын ата-аналар җые­лышыннан соң хәстәрләя­чәкбез. Безгә ошый торган букча 3-4 мең сум тора. Аның да мультфильм геройлары төшкәне, утлары яна торганнары бар икән. Чыгымнарны әле санамадык. Кесә телефоны да кирәк, анысын иң гадиен алачакбыз. Улыбыз укытучыга чәчәк бәйләменең иң матурын алырга кушты.

– “Мәктәп директорлары акча эшли” дигән сүз чыкмасын өчен, махсус оешмалар белән эшләүдән баш тарттык. Әти-әниләрне кием алырга билгеле бер фирмага җибәрмибез. Монда риш­вәтчелек факторы да бар. Житештерүчеләр бе­лән хез­мәттәшлек итеп карадык, әмма алар Кытай тукымаларыннан файдалана. Сыйфатлы мәктәп формасы тегү­челәр бик сирәк. Брянск фир­масын гына әйтә алам. Башлангыч сыйныфларда укучылар өчен зәңгәр итәк, чалбар, ак күлмәк кияргә дип килештек. Кайдан сатып алуны әти-әниләр үзләре хәл итә, мөмкинлегенә карап сатып алалар, – ди Казандагы 165 нче мәктәп директоры Айдар Шәм­сет­динов.

Татарстан Мәгариф һәм фән министрлыгыннан алын­­ган мәгълүматларга караганда, мәктәп җитәк­челеге, укытучылар коллективы әти-әниләргә мәктәп формасын билгеле бер җитештерүчедән мәҗбүри сатып алдырта алмый.

– Укучының тышкы кыя­фәте, киеме мәктәп бил­геләгән классик стильгә туры килергә тиеш. Фор­маның төсен, рәвешен һәм башка таләпләрне мәктәп советы билгели. Тик аз керемле гаиләләрнең хәлен исәпкә алуны да онытмаска кирәк, – диделәр министр­лыкта.

Сәрия Мифтахова


Фикер өстәү