Зифа Кадыйрованың “Сагынырсың, мин булмам” әсәренә нигезләнеп, “Сөмбел” фильмы төшере­лә башлады

19 июльдә Зифа Кадыйрованың “Сагынырсың, мин булмам” әсәренә нигезләнеп, “Сөмбел” фильмы төшере­лә башлады. Бу – Татарстан һәм Үз­бәк­станның беренче уртак кинопроекты.

“Татаркино” матбугат хезмәте хәбәр итүенчә, фильмны төшерү өчен, Үз­бәк­станнан махсус иҗади команда килгән. Яңа фильмның режиссерлары – Татарстаннан Рамил Фазлыев һәм Үз­бәк­станнан Рәшид Маликов. Продюсерлары – Миләүшә Айтуганова һәм Улугбек Абдуллаев. Шушы көннәрдә Үзбәк­станнан тагын актерлар килергә тиеш.

– Әсәр миңа ошады, бу фильм мелодрама булачак. Буш утырырга вакытыбыз юк, генераль продюсер һәр минутыбызны бүлеп куйды. Команда белән дә уртак телне тиз таптык. Проектның киләчәге зур, – дип белдерде режиссер Рәшид Маликов.

“Сөмбел”нең яртысы Татарстанның Мамадыш районында төшереләчәк. Калганы өлеше – Бохара шәһәрендә, чөнки, сюжет буенча, Сөмбел яшь баласы белән шунда күченеп китә. Төшерү төркеме Җөри авылында Питрау фес­тивалендә дә булган. Анда киноның берничә күренеше төшерелгән. Ир-ат рольләрен Татарстан актерлары башкара. Байрасны халыкка “Ак чәчәкләр” фильмы аша таныш булган Динар Хөснетдинов уйный, Булат ролендә Әтнә театры артисты Айдар Вәлиевне күреп булачак. Баш рольне Үзбәк­станның Яшьләр театры актрисасы Сабина Асанова башкара.

– Минем героиням ихлас һәм саф. Тормыш авырлыкларына бирешмичә, сынмыйча, киресенчә, ныгып, йөрәге кушканча яши. Миңа бу рольне бирү­ләренә шатмын, – дип уртаклаша актриса.

Проектның генераль продюсеры Миләүшә Айтуганова белдергәнчә, фильм төшерү идеясе узган ел Халыкара төрек киносы фестивалендә барлыкка килгән. “Бу кинопроект Татарстанга – аудиториясен киңәйтергә, ә Үзбәкстанга Россия кино базарына чыгарга ярдәм итәчәк”, – дип өметләнә продюсер.
Татарстанда фильмны 30 июльгә кадәр төшерәчәкләр.


Фикер өстәү