Санлы телевидениегә күчәбез. Телевизор күрсәтсен өчен кемнәргә ташлама бар?

2019 елның октябреннән Татарстан һәм Россиянең 22 субъекты тулысынча санлы телевидениегә күчәчәк. Республикабызда көн саен якынча 600 кеше санлы телевидениегә күчә. Әмма аналог сигналы белән эшли торганын караганнары да күп әле: якынча 118 мең хуҗалык.

Татарстанда санлы телевидение сигналын тота торган приставкалар сатып алуга киткән чыгымнарны компенса­цияләү турында карар кабул ителде.

– Телевизор 2012 елдан иртәрәк җитеш­терелгән булса, цифрлы телевидениене карар өчен, приставка алырга ки­рәк булачак. Компенсациягә ия булу өчен, приставка яки антенна сатып алынуны раслаучы документ һәм гаилә кереме турында белешмә тапшырырга кирәк, – диде рес­публиканың хезмәт, халыкны эш белән тәэмин итү һәм социаль яклау министры Эльмира Зарипова Министрлар Кабинетында узган брифингта.

Компенсация алу хокукы гражданнарның дүрт кате­гория­сенә бирелә. Беренчесе – аз керемле, балаларына айлык пособие алучы күп балалы гаиләләр. Икенчесе – инвалид баласы булган һәм шулай ук гаилә кереме яшәү минимумыннан кимрәк булган гаи­ләләр. Өчен­чесе – кереме 20 мең сумнан артмаган 70 яшьлек һәм аннан да өлкәнрәк пенсионерлар. Соңгысы – ялгыз яшәүче инвалидлар һәм керемнәре җан башына 20 мең сумнан артмаган инвалидлар гаи­ләләре.

Фаразлаулар буенча, санлы телевидениене карау мөмкин булмаган 160 торак пунктта яшәүчеләр 7300 сумга кадәр ком­пенсациягә исәп тота ала. Моның өчен Татарстан бюджетыннан 4 млн сум акча бүлеп бирергә планлаштыралар. Документларны, 2019 елның 1 декабреннән дә соңга калмыйча, Республика матди ярдәм үзәге бүлегендә тапшырырга мөмкин.

Меңләп йорт хуҗалыгы, махсус приставкалар сатып алса да, аналогны сүн­дергәннән соң, санлы телевидениегә тоташа алмаячак. Аларга спутник аша бушлай 20 канал карарга мөмкинлек бире­ләчәк.

Приставкалар 1,3 мең сәүдә объектында сатыла, шуларның 900е – почта элемтәсе бүлекләре.

Телеграмда безнең каналга кушылыгыз: https://t.me/vatantat