«Зур үсәсебез килә». Яшьләргә парламент кирәк

Суфияровтан – рәхмәт сүз­ләре, Мөхәммәтшин белән Фәттаховтан – хәер-фати­ха, Ратникованың тән­кыйте. Яшьләр иҗтима­гый палатасының 16 нчы утырышында яшь парламентарийлар эшчәнлегенә нәтиҗә ясалды. 15 еллыгын билгеләп үт­кән Татарстан Дәүләт Советы каршындагы Иҗтимагый яшь­ләр палатасы инде быел өченче мәртәбә җыела. Парламент рәисе Фәрит Мөхәм­мәтшин да, моңа игътибар итеп: “Менә бүген кабат җые­лыр өчен хушлашабыз”, – диде.

Татарстанда яшьләрне ишетәләр. 15 еллык эшчәнлек дәверендә Яшь­ләр палатасы “өлкәннәр” белән бергә күп кенә проектларны гамәлгә ашырган, яңа­лыклар керт­кән. Җитәкчесе Илдар Суфияров сөй­­­ләвенчә, Яшьләр иҗ­ти­магый палатасы 16 утырыш үткәргән, шуларда 176 сорау каралган. Моннан тыш, алты – Татарстан, җиде федераль законга үзгә­реш­ләр кер­түне дә алар тәкъ­дим иткән. Безне­келәр баш­­калар бе­лән парламентара хезмәт­тәш­лек турында да онытмаган. Суфияров бел­дер­гәнчә, Мәс­кәү өлкәсе, Удмуртия, Башкортстан республикалары һәм башка бер­ничә тө­бәкнең Яшьләр палаталары белән ки­лешүләр тө­зелгән. Татарс­тан­­ның 45 районы җир­ле үзи­­дарә органнары да хәзер яшь парламентарийлар бе­лән хез­мәттәшлек итә.

Әмма яшьләрнең зур үсә­се килә. Палата Яшьләр парламенты исеменә дәгъва кыла. Парламент булгач, алар канун чыгару эшенә йогынты ясый ала дигән сүз инде бу. Монда сайлаулар аша ки­лер­гә мөм­кин. Аңа 18–30 яшьлек 100 кеше сайланачак. Районнардан – 45, ә яшь­ләр оешмаларыннан 35 кеше дәгъва кыла ала. Исем­леккә 20 үз-үзен тәкъдим итүче өстәлә. Илдар Суфияров аңлатканча, сайлау дүрт этапта үтәчәк. Кан­ди­датла­р­га 15 августка ка­дәр махсус дәү­ләт порталында теркә­лер­гә ки­рәк. 22 августтан 6 сентябрь­гә кадәр праймеризга охшаган чаралар оештырылачак. Би­редә яшь кандидатларга, үз­ләрен күр­сә­теп, сайлаучыларны җә­леп итәргә туры киләчәк. Өчен­че этап – “Ачык Татарстан” сайтында яки Дәүләт хез­­мәт­ләре порталында тавыш би­рү­дән гыйбарәт. Сен­тябрь­дә, төп сайлаулар уз­гач, Яшь­ләр пар­ламен­тының нә­тиҗә­ләрен билгеләя­чәк­ләр.

Яшьләр парламентында шул ук йөзләр булырга тиеш тү­гел. Татарстан яшьләр эш­ләре министры Дамир Фәт­та­хов шундый фикер әйтте. “Мондый хакимият органнарында “комсомолец” дип йөр­телгән актив яшьләр генә эшли дигән калыплашкан фикер яши. Бу миңа ошамый. Яңа парламентны төр­ле ке­шеләрдән җыярга ки­рәк. Рэпермы ул, экстремалмы, бәл­ки ул Дәүләт Советы бинасында бер тапкыр да булмаган кешедер – мөһим түгел. Яшьләр парламентында барысы да булырга тиеш”, – диде министр.
“Өлкәннәр” парламенты­ның җитәкчесе Фәрит Мө­хәммәтшин, Суфияров чыгышыннан соң, кече иптәшләре турында үз фикерләрен әйт­те.

– Сезгә дуслар дип әйтеп була инде, өченче мәртәбә җыелабыз бит. Эшләгән эшегез аз түгел. Әмма алда торган бурычларыгыз шактый күбрәк. Яңару кирәк, ул булачак, тик элемтәне югалтмагыз, булган тәҗрибәне уртак­лашырга кирәк, – диде ул.

Дәүләт Советы рәисе яшь парламентарийлар алдында торган берничә бурычка да тукталды. Аның берсе социаль челтәрләр белән актив эшли башлауга бәйле. “Хә­зер­ге вакытта җир­ле үзида­рә органнары каршындагы яшь­ләр палатасы 1,1 меңгә якын яшь буын вәкилләрен берләштерә. Шул ук вакытта Яшьләр палатасы игътибарыннан чит­тә калучы яшь­ләр дә күп. Мин ныклы фи­кергә килдем: социаль чел­тәрләр бе­лән эшләргә кирәк. Анда – хаос. Кем нәрсә тели, шуны яза. Моны туктату да мөм­кин түгел, шуңа да без яшь­ләрне әлеге мәгълүматка әзерләргә тиеш. Бу безне борчый. Яшь­ләр палатасы со­циаль чел­тәр­ләрдә үз уры­нын тапсын иде”, – диде Фәрит Мөхәм­мәтшин. Яңа парламентка куелган бурычлар рәтендә район­дагы яшь парламентарийлар бе­лән эшләү һәм яшь­ләр сәя­сәтенә бәйле кануннарны мониторинглау үзгәрешсез кала.

Утырышта катнашкан Дәү­­ләт Советы рәисе урынбасары Римма Ратникова яшь парламентарийларны тән­­кыйть­ләвен дәвам итте­рә­чәген белдерде. “Тән­кыйть – ки­рәк­ле әйбер. Сез яхшырак эшләя­чәксез”, – диде ул, уенын-чынын бергә кушып.

Чулпан Гарифуллина


Фикер өстәү