Гөлназ Мәрданова: “Игелекле гамәлләрне дан-шөһрәт казану максатыннан эшләмисең, күңел кушканга башкарасың”, – ди.
Россиядә иреклеләр (доброволец) эшчәнлеген үстерүгә ярдәм итү федераль агентлыгы, “Балаларны һәм яшьләрне гражданлык һәм ватанпәрвәрлек рухында тәрбияләү үзәге” федераль оешмасы һәм “Волонтер үзәкләре ассоциациясе” ел саен “Россия иреклесе” (“Доброволец России”) премиясен тапшыра. Бу илкүләм бәйге тугызынчы ел үткәрелә инде. “Социаль проект”, “Игелекле гамәл”, “Иҗади эш” кебек номинацияләрдә 8 яшьтән башлап һәркем катнаша ала. Бары тик үз проектыңны булдырырга һәм бәйгедә катнашу өчен гариза тутырырга гына кирәк. Проектлар төрле була ала: мәсәлән, иясез хайваннарга ярдәм итү, әйләнә-тирәдәге чисталыкны саклау, авыру балаларга булышу. Гөлназ Мәрданова исә бәйгегә “Like a Donor” исемле проектын тәкъдим иткән һәм сайлап алу этабын үткән.
– Хәзерге вакытта мин КФУның Яшьләр сәясәте департаментында эшлим. Хезмәтем волонтерлык һәм ихтыярилар хәрәкәте белән бәйле. Студент чактан ук мондый чараларда еш катнаштым, уку йорты кысасында төрле акцияләр оештыра идем. Университетта “КФУ – игелекле кешеләр планетасы” дигән Иреклеләр үзәге эшли. 7-8 ел инде әлеге үзәк эшчәнлегендә кайныйм. Бу – минем өчен хезмәт кенә түгел, ә яшәү рәвеше, – дип сөйләде Гөлназ. – Соңгы елларда үзем проектлар язам, аларны яклыйм, бу өлкәдә тәҗрибәм җитәрлек. Шуңа күрә “Россия иреклесе” бәйгесендә катнашып карарга булдым.
Мондый бәйгеләрдә җиңү өчен түгел, үзеңне күрсәтү, фикердәшләр табу, белгечләр бәясен ишетү һәм тәҗрибә туплау өчен катнашырга кирәк, дип саный Гөлназ Мәрданова. Аның чираттагы проекты донорлык хәрәкәтенә бәйле.
– Соңгы елларда менә нәрсәгә игътибар иттем. Университетта еш кына кан бирүгә бәйле чаралар оештырыла. Алар бер-ике тапкыр уза да шуның белән туктала. Ә донорлык эшен даими алып барырга кирәк. Узган елдан башлап кан бирү эшчәнлеген системага сала башладык. Былтыр “Соучастие” дип аталган донорлык хәрәкәтенә багышланган бәйгедә икенче урын яуладык. Россия күләмендә безнең эшне бәяләделәр, – дип әйтте Гөлназ, проектны булдыру тарихын сөйләгәндә.
Кан бирү турында кешеләргә аңлатырга да кирәк. Шул максаттан Гөлназ Мәрданова язган проект кысасында махсус волонтерларны укыту эше башланачак. “Донорлыкның нәрсә икәнен, уңай һәм тискәре яклары турында сөйләячәкбез. Шулай итеп, кан бирү акцияләренә әзер, бу юнәлештә мәгълүматлы кешеләр кушылачак. Алар белән даими эшләргә исәп. Республиканың мактаулы донорлары белән очрашулар оештыру да күздә тотыла. Алар үз мисалында бу хәрәкәткә яңа кушылганнарга үрнәк күрсәтәчәк. Донорлыкка бәйле ток-шоу ясарга теләк бар. Проект нигезендә сәламәт яшәү рәвешен пропагандалау тора”, – диде Гөлназ.
Моннан тыш Гөлназ һәм аның кебек изге күңелле кешеләр экологик акцияләр оештыра, сугыш ветераннарына, өлкән яшьтәге кешеләргә, балаларга ярдәм итә. Алар шефлыгында берничә оешма да бар икән.
– Иреклеләр хезмәте башка юнәлешләрдән аерылып тора. Монда кешене көчләп китереп булмый. Барысы да саф йөрәктән эшләнә, – ди Гөлназ.
Эшчәнлек өчен вакыт һәм теләк кенә түгел, акча да кирәк, билгеле. Гөлназ Мәрданова бу проектын тагын берничә бәйгегә тәкъдим иткән булган. “Федераль грант отмабызмы дип, катнашып караган идек. Күптән түгел проектны уңышлы дип табып, 300 мең сум грант бирделәр. Узган ел “Зарница” дигән проектыма да 300 мең сум бирделәр. Ул башка юнәлешкә карый”, – диде ул.
Барысы да җиңел генә бармый, әлбәттә. Күңел төшкән, эшләргә теләк кимегән минутлар да булгалый. “Беркайчан да, бу хезмәтне ташларга кирәк, дигән уй булмады! Шөкер, авыр тоелган чаклар тиз узып китә. Үзең кебек ярсу йөрәкле, ярдәмчел кешеләр булганда, теләсә нинди кыен хәлдән чыгып була. Безгә теләктәшлек күрсәтүчеләр күп”, – ди Гөлназ.
Чулпан Гарифуллина
