Карама яшенә, кара эшенә. WorldSkills чемпионаты тарихта иң шәбе булырга әзерләнә

Казан WorldSkills эшче һөнәр­ләр чемпионатын кабул итәр­гә әзерләнә. Һөнәри осталык ярышлары – Россиядә беренче тапкыр. Май аенда узган Милли чемпионат оештыручылар йөзенә кызыллык ки­те­рмәде. Дөнья беренчелеген дә шулай уздырырга – Татарстан Президенты Рөстәм Миңнеханов та моны төп максат итеп күрә.

Йолдызлы сәгатьне көткәндә

WorldSkills эшче һөнәрләр чемпионаты 22–27 август көн­нәрендә узачак. Россия бюд­жетын­нан Татарстанга әлеге чараны тиешенчә оештыру өчен 4,6 млрд сум акча бирелде. Ярышларда кат­нашырга 63 ил­дән 1500дән артык вәкил килә­чәк. Чемпионатта урын һәркемгә җитә: ипи пе­шерүче белән чәчәк бәйләме ясау­чыга да, агач остасы белән компьютер белгеченә дә. Катнашучылар исемлеге билгеле инде. Россия җыелма командасын World­Skills чемпионатында 63 кеше тәкъ­дим итәчәк. Болар – 18–25 яшь­лек 14 кыз һәм 49 егет. Шу­ларның ундүрте – Татарстаннан.

Ялгышырга ярамый. Егет һәм кызларга ярышта катнашу хокукы бер генә тапкыр бирелә. Җи­ңелсәң, төшеп каласың. Бу – алар өчен йолдызлы сәгать тә, бенефиста.

“Монда вак-төяк нәрсә юк”

Егет-кызлар әзерләнгәндә, оеш­тыручылар да тик тормый. WorldSkills өчен махсус төзелгән “Казан Экспо” бинасы белән танышу, волонтерлар эшчәнлеген көйләү, ачылу һәм ябылу тантаналары – боларның барысы да кат-кат тикшерелә.

Нәрсә өчен кирәк иде бу без­гә, дип сораучылар да булмый калмас. Сәбәбе бик гади: эшче һөнәрләр­нең абруен күтәрү. Аннан, чемпионат – һөнәри белем бирү өлкәсендә дөньякүләм тәҗ­рибә уртаклашу урыны да әле. Ярыш мәйданында ук энҗе бөр­тегенә тиң осталар өчен эш би­рүчеләр “көрәш“ башлый. World­Skills – яшьләр өчен килә­чәктә эш­ле-ашлы булу өчен мөм­кинлек тә әле, димәк.

– Рәсми рәвештә чемпионат башланырга бер ай калса да, асылда ул тагын да иртәрәк башланачак. 1 августтан кунаклар кабул итә башлыйбыз инде. 3 ел да 11 айдан соң финиш сызыгына якынлаштык, – ди “WorldSkills Kazan 2019” проекты җитәкчесе Эмиль Гобәйдуллин. – Хәзер “Ка­зан Экспо” үзәгендә соңгы төзек­ләндерү эшләре бара. Анда ярыш­лар өчен кечкенә цехлар, рестораннар әзерләнә.

Чемпионатны икътисади форумнар белән тиңләргә була. “Яшь профессионаллар” берлеге генераль директоры Роберт Уразов шундый фикердә.

– “WorldSkills Kazan 2019” чемпионатын катнашучылар саны буенча да, составы буенча да Давос һәм башка икътисади форумнар белән чагыштырырлык “кү­нек­мәләр саммиты” дип атарга була. Без дөньяга гади чемпионат кына түгел, ә кадрлар әзерләү буенча яңалык тәкъдим иттек, – ди Роберт Уразов.

Чемпионат халыкара белгеч­ләр өчен очрашу урынына да әйләнәчәк. Россиянең WorldSkills International хәрәкәте рәсми делегаты Екатерина Лошкарева сүз­ләренә караганда, дөнья чем­пионатының эшлекле программасы өч юнәлештә төзелә. Программа катнашучылары буларак 63 ил вәкиле теркәлгән инде.
Ялга китәр алдыннан Президент Рөстәм Миңнеханов “Казан Экспо” күргәзмә комплексында булып кайтты. Ул дөнья берен­челегенә әзерлек һәм уздыру эшенә җитди карарга кирәклеген искәртте. “Мондый мәсьәләдә вак-төяк була алмый”, – диде Миңнеханов.

Крутойдан – кәттә программа

Чемпионатның ачылыш һәм ябы­лу тантаналарын 2013 елда Уни­версиада һәм 2015 елгы Су спорты төрләре буенча дөнья чем­пионаты программасын куйган Игорь Крутой командасы әзе­р­ли. Тантаналарның режиссеры – Алексей Сеченов. Шоу-прог­рам­мада үз эшләренең осталары һәм София исемле дөньяда бердәнбер гражданлыгы булган робот-ан­дроид та катнаша. Соң­гысының ролен әле­гәчә сер итеп саклыйлар. Шулай ук Ёлка, Александр Панайотов, “Дана Соколова” рок-төркеме, Ян Гэ, Jukebox trio, Therr Maitz чыгышлары кө­телә. Рәссам­нар “тере” декора­цияләр вәгъдә итә. Тантаналарга билетларны чем­пионат­ның рәс­ми сайтында алып була. Билетлар бәясе 300 сумнан башлап 1500 сумга кадәр.

Ничек барырга?

Чемпионат көннәрендә “Казан Экспо” халыкара күргәзмә­ләр үзәгенә тамашачылар өч төрле транспортта бара алачак. “Леруа Мерлен” һәм “МЕГА” сәү­дә үзәк­ләре, “Имәнлек” метро станциясе янындагы парковкалардан куз­галучы шаттллар эш­ләячәк. Алар тамашачыларга бушлай хез­мәт күрсәтәчәк. “Ка­зан Экс­по”­га “Казан-1” тимер юл вокзалыннан китүче электр поездына утырып барырга мөм­кин. Шаттлларга утырганда та­ма­шачының үзе белән Чемпио­натның бастырылган яисә электрон чакыру билеты булуы шарт. 23–26 август көннәрендә “Казан Экспо” тер­риториясендә узучы барлык ярышларга да билетлар бушлай бирелә. Моның өчен tickets.worldskills.ru сайтына кереп, “Ка­зан Экспо” Халык­ара күргәз­мә үзәгендә узачак ярышларга бару көнен һәм вакытын сайларга ки­рәк. Төркем белән барган оч­ракта кеше санын күрсәтү таләп ителә. 12 яшькә кадәрге балалар өчен билет һәм теркәлү таләп ителми.

Ничек күңел ачабыз?

Чемпионат көннәрендә Гор­ки-Әмәт урман паркы, Горький исемендәге үзәк парк, Бауман урамы һәм Кабан күле яр буе мәдәни-күңел ачу чаралары бе­лән сөендерәчәк. Бе­рен­чесендә чемпионатның ачылыш һәм ябылу тантаналарыннан туры трансляция күрсә­тергә ниятлиләр. Ярыш көннә­рендә паркта концерт, лекторийлар, ачык һавада кино күр­сәтүләр һәм остаха­нәләр оештырылачак.

Горький паркында төрле мил­­ләтләрнең мәдәнияте турында ишетеп һәм күреп булачак. 23–26 августта WorldSkills ком­пет­­енция­ләре буенча оста­ха­нәләр эшләя­чәк. Гади халыкка да үзен төрле һөнәрдә сынап карарга мөмкин булачак. Төрле илләрнең милли кухнясын да шушы паркта тәкъ­дим итә­чәкләр.

Кабан күле ярында 23–25 август көннәрендә Казан музыкантлары чыгыш ясаячак, “Угол” иҗат берләшмәсе, Тинчурин, Камал театрлары спек­такльләре тәкъдим ителәчәк. Кичен исә һәркем ачык һавада Татарстан режиссерлары­ның киноларын карый һәм бушлай экскурсия­ләргә языла алачак. Шулай ук Worldskills ярышларына багышлап, “Казан” гаилә үзәге янында 23–26 август көннәрендә “Тәмле Казан” гастрономик фестивале үткә­реләчәк.

Чемпионатны Казанның үзәк урамы да игътибарсыз калдырмый. 23–26 август көн­нә­рендә Бауман урамында сән­гать осталары фольклор коллективлары һәм халык инструментлары оркестрлары катнашында концерт булачак. Моннан тыш халык һөнәрчелеге эшләнмәләре күр­гәз­мәсе һәм мил­ли уен коралларында уйнау буенча остаханә­ләр оештырылачак.

Хезмәтенә күрә… акчасы

Чемпионат нәтиҗәләре буенча югары уңышларга ирешкән Россия катнашучыларын, шулай ук белгечләрен акчалата премия белән бүләкләячәкләр. “Осталык өчен медальон” ияләрен – 300 мең, бронза медаль өчен – 400, көмешкә – 500 мең, ә алтын медальле җиңүчеләргә 1 млн сум акча бирәчәкләр.

“Ресторан сервисы” компетенциясендә чыгыш ясау­чы Татарстан егете Тимур Каюмов вакытны дөрес бүләргә өйрәнгән икән инде. “Эчке таймер һәм тоемлау сәләте эшкә җигелә. Каһвә әзерләгәндә дә, сөт өсте күперткәндә дә секундларны саныйм”, – ди Тимур. Аның эше каһвә әзерләү белән генә чикләнми анысы. “Ресторан сервисы” бәйгесендә катнашучылар аш-су әзерләргә дә, матур итеп өстәл кора белергә дә, кунакларны ачык йөз белән каршы алырга да тиеш. Төп максат – кешеләрнең осталар хезмәтеннән канәгать калуы һәм Мишлен йолдызын алу. Соңгысы – ресторан өлкәсендә бирелә торган иң югары бәя.

Ярышта катнашучылар өчен вакыт белән дуслаша торырга кирәк. “Кирпеч салу” компетенциясендә чыгыш ясаучы Сергей Херкун сүзләренчә, кирпеч өчен дөрес әзерләнгән измә эш барышын бер сәгатькә киметә ала. Бәйгедә катнашучыларга биремне ярышлар башланган көнне генә бирәчәкләр. Кагыйдә буларак, аларга гаять кыен сынау әзерлиләр. “Кирпеч дивар салу берни түгел. Минем әле гөмбәзләр белән эшләгәнем юк. Бу кирпеч салу эшендә иң авыры санала”, – ди Сергей Херкун.

“Мода технологиясе” компетенциясендә катнашучы Эвелина Алтунян алты яшеннән бирле тегә икән.
– Балачак шөгылем киләчәк һөнәремә әйләнде. Кечкенәдән курчакларга, эт һәм песи өчен киемнәр тегә идем. Мәктәптә укый башлагач, үзем өчен тегә башладым. Әзерлек 2016 елдан бирле бара инде. Һәрдаим иң яхшысы булуыңны исбатлап торырга кирәк. Көндәшлек бик җитди, – ди Эвелина.

  • САН
    “WorldSkills Kazan 2019” дөнья чем­пиона­тында 3500 волонтер, 1200 штат хезмәткәре һәм вакытлыча персонал эшләячәк.

Чулпан Гарифуллина


Фикер өстәү