Гозерең булса — әйт

“Бердәм Россия” партиясе рәисе Дмитрий Медве­дев­ның Татарстандагы төбәк-иҗтимагый кабул итү бүлегендә эшләүче Галина Костина, халыктан
1 500 наказ кабул иттек, дип белдерде.

– “Күчмә кабул итү” проекты эшли башлаганнан бир­ле дистәләрчә урында бул­дык. Республикада яшәү­че­ләр кандидатларга үз го­зер­ләрен җиткерә. 6 сен­тябрьгә хәтле без 650 җир­лектә булырга планлаштырабыз. Ке­шеләр безнең ки­лә­сен алдан белеп тора. Күбесе белдерү аша, интернеттан укып бел­гәннәре дә бар. Безгә килгән мөрәҗә­гатьләр “Минем депутатым онлайн” дип аталган кушымтага җибәрелә. Һәр үтенечкә кыска гына вакыт эчендә җавап та биреләчәк, – ди ул.

Депутатлыкка кандидатларга Казанның Юдино бис­тәсендә яшәүчеләрнең дә әй­тер сүзе бар. Юллар­ның начар булуы, урамнар­ның тие­шенчә яктыртылмавы, балалар бакчасына илтә торган юл булмау кебек мөрәҗә­гать­ләр белән “Күчмә кабул итү” бүлегенә 20 минут эчен­дә 15 кеше килде.
– “Дюймовочка” балалар бакчасына сабыемны йөр­тәм. Әмма бакчага кадәр машина белән кереп булмый. Туристлык урамындагы 1 нче йортка керү өчен, машинаны читкә куясы, аннан җәяү барасы. Хәтта бакчага азык-төлек китергән машина да керә алмый. Ризыкларны күтәреп ташыйлар. Яңгыр яуганда, баланы илтү бигрәк кыен, – ди бер ханым.

Екатерина Тимонина би­редә 11 нче елын яши. “Бер ба­лам – беренче сыйныфка, икенчесе бишенчегә бара. Без укый торган 151 нче мәк­тәпне икегә бүлмәк­челәр. Бер бинада – башлангыч мәк­­тәп, икенчесендә өлкән сыйныфлар укыячак икән. Әмма берсеннән икен­че­сенә барыр өчен, урман аша чыгасы. Үзем эшләгәч, балаларны каенанам йөртә. Өлкән яшь­тә инде. Балаларны төрле җир­гә йөртә ал­мая­чак, – ди ул.
Рәйсә Самаркина юллар начар булудан зарлана. “Үзе­без яшәгән Криворожская урамына кереп булмый. Асфальт түшәрләр дип көткән идек, булмады. Безнең ти­рәдә яшәүчеләрнең күбе­сен­дә – яшь балалар. Машинасыз яшәп булмый”. Юдинода яшәүчеләр урам утларының якты янмавыннан да зарланды. Депутатка кандидатлар аларның гозерләрен үтәргә вәгъдә бирде.

Республика буенча “Бер­дәм Россия” партиясенең ал­ты “Күчмә кабул итү” бүл­мә­се эшли. Алар махсус автобусларда урнашкан. Халык бе­лән эшләүнең бу юлын сайлау тиктомалдан түгел – 2014 елда булган сайлау кампа­ния­­се вакытында әле­ге алым­ны кулланып карыйлар. Ул чакта халыктан 2500 наказ алына. Шуның 83 процентына төгәл җавап бирелә. Әлеге гозер­ләр ки­лә­чәктә яңа законнар чыгар­ганда, Татарстан Президентына мөрәҗә­гать­ләр җит­кер­гәндә кирәк булачак.

 

Гөлгенә ШИҺАПОВА


Фикер өстәү