Минзәләдә физик мөмкинлеге чикле кызларның хыялларын тормышка ашырдылар. “Ачык һава” дип аталган проект икенче мәртәбә үткәрелә. Узган ел парашют белән сикерергә җиде кеше батырчылык итсә, быел биш кыз куркуын җиңде. Алар 4 мең метр биеклектән сикерде.
– Батыр йөрәкле кызлар иртәдән үк килгән иде. Башта аларны табиблар тикшерде, аннары куркынычсызлык кагыйдәләрен үттеләр. Бары тик шуннан соң гына тәҗрибәле инструкторлар белән сикерергә рөхсәт ителде, – ди “Татарстан энҗесе” оешмасы җитәкчесе Гөлнара Заһретдинова.
Саба кызы Регина Ивановага парашюттан сикерү бик ошаган.
– Ул вакытта туган хисләрне аңлатып бетереп булмый. Күктәге вакыт, бер мизгел булып, күңелдә калды. Анда җил дә мин генә кебек. Гел очасым гына килеп торды. Ә сикергәч, тагын да рәхәтрәк булды. Бернинди курку юк, адреналин. Мин әле тагын монда киләчәкмен, – диде ул.
Өч бала әнисе, ДЦП диагнозлы Гүзәл Насыйфуллина да парашют белән сикерде.
– Башта бик курыккан идем. Үземне кулга алырга туры килде. Мөмкинлекне кулдан ычкындырмас өчен генә ризалаштым. Ә аннары бөтенләй күккә гашыйк булдым. Мин шундый бәхетле. Ярдәм иткән инструкторыма, “Ачык һава” проектына, оештыручыларга рәхмәт, – ди Гүзәл.
Кызларга көч биреп торучылар да булган. Егетләрнең ниндиләре генә әле! Россия Геройлары Виктор Рень белән Александр Мисуркин.
“Татарстан энҗесе”ндә катнашкан кызлар гел аралашып торалар икән.
– Шушы чарадан соң без яңадан җыелышып ял иттек. Барлык кызлар да килгән иде. Узган ел сикергән кызлар белән быелгылары фикер алышты. Бу хакта сөйләгәндә, аларның күзләре балкый. Кызларның мөмкинлекләре чикләнмәгән. Алар тормышның бар матурлыгын күрә беләләр. Кайчак аларга карап сокланам, үземә көч алам, – ди Гөлнара.
Гөлгенә ШИҺАПОВА