Балаларны тәмле ашатачаклар

Казанның Азык-төлек һәм социаль туклану департаменты мәктәп ашха­нәләренә яңа җи­һаз­лар сатып алу өчен ике ел дәвамында 100 миллион сум акча тотачак.

Ашханәләрне яңарту 190 миллион сумга төшкән. Иске­ләрне яңага алыштыру кирәк­леген Казан мэры Илсур Метшин мәктәптә туклану проб­лемаларына багышланган ки­ңәшмәдә әйт­кән иде. Ул чагында шәһәр башлыгы түрә­ләрне, ризык­ның сыйфатын тикшерү өчен, 162 ашханәгә төшке аш ашарга җибәрде.
– 1 сентябрьгә мәктәп­ләргә, 59 суыткыч җиһазын һәм 28 пароконвектоматны да кертеп, 400 берәмлек яңа җиһаз кайтачак. Алар­ның гомуми бәясе 27 миллион сум тәшкил итә, – ди Казанның Азык-төлек һәм социаль тук­лану департаменты генераль ди­рек­торы Рима Мө­хәм­мәт­шина. – Шулай ук уку елы башына Казанның 13 мәк­тәбендә ризык тарата тор­ган яңа линияләр урнаштырылып, 15 белем йортында ватылганнары яңага алыш­тырылачак. Болай эш­ләү ризык таратуны тиз­лә­тәчәк, аш өләш­­кәндә тиешле темпера­ту­раны сакларга, санитар нор­маларны үтәргә, куркынычсызлыкны тәэмин итәр­гә, туклануның сыйфатын һәм хезмәт­кәрләрнең эш шарт­ларын яхшыртырга мөм­кинлек бирәчәк.

Әлеге яңалык балалардан бигрәк әти-әниләрне сөен­дерә кебек. Ни дисәң дә, укыр­га киткән балаңның көнозын ачлы-туклы йөрүе яки коры-сары белән туклануы бер дә күңелне күтәр­ми. Пе­шек­че­ләрнең җавабы бер: алар ланч-бокс системасыннан кил­гән ризыкны җы­лытып кына бирә.
Быел 36 мәк­тәптә ашханә яңартыла. Аларда җәен капиталь ремонт үткәре­лә, яңа кух­ня җиһазлары, мебель, са­выт-саба һәм башкалар сатып алы­на.

– Тагын ике ресторан тибындагы ашханә “Яз” торак комплексында һәм Гареев урамында урнашкан яңа мәк­тәпләрдә үз ишек­ләрен ачачак. Балалар һәм ата-ана­лар­ның мөрә­җә­гать­ләре буенча яңартыл­ган менюга бәясе шактый түбән булган (45 сум) кайнар аш кертелде. Без ике вариант тәкъдим итәчәкбез – икенче аш яки камыр ризыгы белән бергә беренче аш булачак. Яңар­тылган меню белән танышу өчен сен­тябрь-ок­тябрь айларында мәктәп пикниклары үткәре­ләчәк. Анда ата-аналар та­биб-диетолог бе­лән киңәш­ләшәчәк һәм уку­­чы­ларның туклануына бәйле үзләрен кызыксындырган сорауларны би­рә ала­чак, – ди Рима Мөхәммәтшина.

Мәктәптә ашауны ничек көйләргә соң? Элеккеге кебек пешекчеләр пешергән система яхшымы, әллә инде әзер­ләп китергәнеме? Бу хакта 54 ел аш-су өлкәсендә эшләп, шу­ның 23 елын мәктәп аш­ханә­сен­дә үткәр­гән Рәхимә Биктимерова белән дә сөй­ләштек.

– Ланч-бокс системасы бик уңай­лы. Ул мәктәп аш­ха­нәсе мөдир­ләренә сай­лап алу мөмкинлеге бирә. Әйтик, 5–11 нче сыйныфлар өчен аш­ханәдә ризыкны сай­лап алу ирекле. Алар нәр­сә ярата, шуңа заказ бирәсең, – ди Рә­химә апа. – Бар да пешек­че­дән тора. Кай­берәүләр кыйм­мәтле төшке ашка заказ бирә, сайланып мавыкмый. Югыйсә уртача бәядән дә китер­тергә була. Департамент моны тыймый. Мин үзем өлкән сый­ныф­тагылар өчен шашлык та, жар­кое да ала идем. Иртән кайбер җир­ләр­дә төшке аш ашаталар. Бу дөрес түгел. Баш­та бала иртәнге ризык ашар­га тиеш. Үзем эшләгән Совет райо­нының 121 нче гим­на­зия­сендә тугыз туларга 15 минут кала беренче сыйныфларны ашата идек. Аннары – төшке аш. Камыр ризык­ларын да чиратлаштырырга кирәк. Эшне яратып башкар­саң, балалар да тәм­ле ашый, ата-аналар да риза була.
Әлегә ашханәдә туклану бәяләре шул килеш кала. Департамент җитәк­челеге бе­рен­че чиратта ризыкның сый­фатын яхшыртмакчы.


Фикер өстәү