Мәктәпкә барасым килми! Җәйге каникулның соңгы аенда балалар авызыннан бу сүзләрне еш ишетергә туры килә. Өч ай дәвамында иркен тормышның тәмен татырга өлгергән баланы мәктәпкә ничек әзерләргә?
1. Тынычлык саклагыз! Ничәнче сыйныфка баруына карамастан, бала яңа уку елын һәрчак дулкынланып, хәтта бераз куркып көтеп ала. Ата-ананың “җәй буе кулыңа бер китап тотып карамадың”, “рәхәт көннәрең бетте синең” кебек сүзләре исә хәлне тагын да катлауландырачак. Шуңа күрә җәй ахырында балагыз белән өч ай дәвамында булган күңелле вакытларны, вакыйгаларны искә төшерегез. Берочтан яңа уку елының да андый күңелле мизгелләргә бай булачагын өстәп куегыз. Беренче сентябрь көнне өр-яңа форма киеп мәктәпкә бару, күптән күрмәгән классташларың белән очрашу, укытучыга чәчәк бирү – үзе үк ни тора!
2. Җәйге каникулда рәхәтләнеп ял иткән балагыз кайбер хәрефләрне онытып җибәргәнме? Кайбер сүзләрнең ничек язылганын онытканмы? Чаң сугарга ашыкмагыз! Бала өчен өйдә үткәннәрне кабатлау дәресе оештырып та азапланмагыз! Озак вакыт ял иткәннән соң ниндидер әйберләрнең истән чыгуы – өлкәннәр өчен дә гадәти хәл бит. Эшкә чыккач, бар да үз урынына кайта. Балалар белән дә шулай ук. Мәктәптә укулар башлангач, оныткан бар белгәннәре дә искә төшәчәк. Өстәвенә уку елы башында дәресләрдә үткәннәрне кабатлауга зур урын бирелә.
3. Уку чорына рухи әзерлек бер-ике атна алдан ук башланырга тиеш. Иң элек баланың көндәлек режимын җайга салыгыз. Вакытында йокларга ятып, иртә таңнан мәктәпкә җыенып китәрлек булсын! Юкса җәй буе төшкә кадәр йоклап күнеккән баланы кисәк кенә иртәнге алтыда уята башлау организм өчен зур стресс булачак!
4. Сәламәтлек тә игътибардан читтә калмасын иде. Хәзер мәктәпкә барыр алдыннан ел саен медицина тикшеренүе узарга кирәк дигән таләп юк. Шулай да яңа уку елына керешкәнче, баланың сәламәтлеген тикшертеп алу хәерле. Аның үзенә дә җиңелрәк булачак. Сезнең дә күңелегез тыныч. Аеруча күзләрне тикшертү зарур. Бүген күп кенә балалар тактада ниләр язылганын күрә алмыйча азапланып утыра. Күзләр гел киеренке халәттә булгач, баш авыртулары башлана. Җәйге ялдан соң балалар арасында начар ишетү кебек күңелсезлек тә күзәтелә. Ни кызганыч, кулыннан телефон, гаджетларны төшермәгән замана баласы өчен монысы да гадәти хәлгә әверелеп бара. Яңа уку елын сау-сәламәт булып, күтәренке кәефтә каршыларга язсын!
