“Сагынып өлгергәнсездер”. Татарстан хөкүмәте йортында узган брифингны Лилия Галимова шушы сүзләрдән башлады. Президент Рөстәм Миңнеханов та, Казан Кремленең рәсми вәкиле дә ялдан чыкты, димәк, очрашулар, эш сәфәрләре дәвам итәчәк.
12 августта Президент эш сәфәре белән Төрекмәнстанга китәчәк. Анда ул беренче Халыкара Каспий икътисади форумында катнашачак. Бездән баручылар арасында республиканың сәнәгать һәм сәүдә министры Альберт Кәримов та бар. Россия делегациясен Премьер-министр Дмитрий Медведев җитәкләячәк. Исегездә булса, Төрекмәнстан башлыгы, бу ил түрәләрен ияртеп, җәй башында Татарстанда булып киткән иде. Ике дәүләт арасында нефть һәм КамАЗ төзелеше тармакларында хезмәттәшлек алып барыла.
– Икътисади форум барышында хезмәттәшлек, уртак проектларны гамәлгә ашыру, махсус ирекле икътисади зоналар булдыру һәм үстерү мәсьәләсе буенча тәҗрибә уртаклашачаклар. Чара кысасында Рөстәм Миңнехановның башка дәүләтләрдән килгән вәкилләр белән очрашуы һәм берничә килешүгә кул куюы да көтелә, – дип хәбәр итте Лилия Галимова.
Рәсми очрашулардан соң, Президент Халыкара инновацион технологияләр күргәзмәсе белән танышачак. Форумда Татарстаннан КамАЗ һәм “Татнефть” әзерләгән экспозицияләр дә урын алачак. Рөстәм Миңнеханов Төрекмәнстандагы полимер һәм нефть эшкәртү заводын да караячак.
Дөньякүләм вакыйгага санаулы көннәр калып бара. 8 августта Рөстәм Миңнеханов WorldSkills эшче һөнәрләр чемпионатына әзерлекне тикшерде. Лилия Галимова сүзләренчә, чемпионат кунаклары Казанга август башында ук килә башлаган инде. Катнашучыларның төп өлешен 15 – 19 август көннәрендә көтәләр. Лилия Галимова сүзләренчә, ниндидер сәяси вазгыятькә карап, чемпионатта катнашудан баш тарткан илләр юк. Кичә Президент Универсиада авылында кунаклар яшәячәк урыннар белән танышты, катнашучыларга аккредитация уздыра торган үзәктә булды.
Шимбә, Физкультурачылар көне уңаеннан, спортта уңышка ирешкән кешеләр белән очрашу көтелә. Рөстәм Миңнеханов Казан Кремлендә спортчыларны һәм аларның тренерларын бүләкләячәк.
Сайлауга да бер ай вакыт калып бара. Журналистлар әзерлек эшен Казан Кремленең ничек бәяләвен сорады.
– Үзәк сайлау комиссиясеннән, мәгълүмат чараларыннан алган мәгълүматларга таянабыз, күзәтеп торабыз. Сайлау, гадәттә, стандарт булмаган вакыйгаларсыз гына үтми инде. Бу – көрәш, – диде Лилия Галимова.
Сайлау алдыннан кайбер партия вәкилләре Татарстанда килеп туган кайбер вакыйгаларны үз файдасына бормакчы. Мәсәлән, Казан төзелешләрендә кранда эшләүчеләр куркынычсызлык кагыйдәләренең үтәлмәвенә ризасызлык белдерде. Аларның каршылыгын оппозицион партияләр үз мәнфәгатьләрендә куллана. Журналистлар бу уңайдан Казан Кремленең фикерен ишетергә теләде. “Мондый вазгыятьне сәяси партияләр күтәреп ала һәм үз файдасына бора. Бу хакта сезгә сөйләп торырга кирәкми”, – диде Лилия Галимова. Кыскасы, каш ясыйм дип, күз чыгармасыннар һәм кешеләр зыян күрмәсен – шуңа гына борчылалар.
Чулпан Гарифуллина
