Кышын балыкны кайларда тотарга? Татарстан Гадәттән тыш хәлләр министрлыгы кышкы айларда балыкчылар өчен вакытлыча 10 урын билгеләгән.
Министрлык мәгълүматларына караганда, боз астындагы судак-фәләнгә мөкиббән китүчеләргә күз-колак булып тору өчен 45 патруль төркеме оештырылган. Моннан тыш балык тоту өчен билгеләнгән 10 урында һава мендәрендә хәрәкәтләнүче суднолар дежур торачак. Патруль төркемнәренең максаты – калынлыгы 7 сантиметрдан кимрәк булган бозга халыкны якын китермәү. Юка бозга кергән өчен штраф күздә тотыла.
Коткаручыларның, катып өлгермәгән бозга кереп, хәтәргә юлыгучылар өчен төп киңәше болайрак. Суга төшүгә, кулыгыздагы барлык әйберләрне читкә ыргытып, корсакка яту һәм кулларны як-якка җәеп, үзегез килеп кергән яктан шуышып чыгарга тырышу кирәк.
