316 минут 9 секунд. “Ак барс” капкачысы Тимур Билалов әнә шул кадәр вакыт алка керттермәде. Бу – КХЛ гына түгел, Россия чемпионатларындагы иң яхшы күрсәткеч тә булып санала. Сезон башында аны команданың запас капкачысы булыр дип фаразладылар. Ә хәзер ул бөтен лигада иң яхшысы булып санала.
24 яшьлек Тимур – Түбән Кама егете. Әмма Казан хоккеенда тәрбияләнгән уенчы булып санала. 2012 елда ул “Ирбис”та уйный башлады. Беренче зур уңышына 2016 елда иреште. Әлмәтнең “Нефтяник” клубы белән Югары хоккей лигасында җиңү яулады һәм Братина Кубогын отты. Билаловны исә плэй-оффтагы иң шәп уенчы дип игълан иттеләр. Әмма “Ак барс”та уйнау өчен бу гына җитмәде. Тимурны башта “Югра”га, аннары Рига “Динамо”сына җибәрделәр. Һавадагы торнага өметләнеп тик утырганчы, кулдагы песнәк белән алга бару булды бу. Латыш командасында Билалов төп капкачыга әверелде һәм КХЛда иң яхшылар сафына керде.
Быел җәй Тимур кабат Казанга кайтты. Әмма аны уйнатырлармы? Сезон башында әнә шундый сорау да булды. Билаловка исә имгәнгән булуы аркасында узган ел бөтенләй диярлек уйнамаган Эмиль Гариповның бозга чыга алмавы да ярдәм итте. Дөрес, “Ак барс”та капканы башта Швециядән килгән Адам Рейдеборнга ышанып тапшырдылар. Тимур исә үзенә бирелгән һәр мөмкинлектән үҗәтләнеп файдаланырга тотынды. Хәзер инде КХЛда беренче урында баручы командада кайсының беренче икәнен дә әйтеп булмый. Билалов лигада иң ышанычлы капкачы санала. Быелгы сезонда ул 13 очрашуда бозга чыкты һәм нибары 9 алка керттерде. Алты матчта исә көндәш уенчылар аны бер мәртәбә дә борчый алмады. Бу – лигадагы иң яхшы күрсәткеч.
Дөрес, болары – вакытлы саннар. Бу атнада исә Тимур берьюлы дүрт рекордны яңартты. Беренче икесе “Ак барс” белән бәйле. Моңа кадәр Казан командасында Россия чемпионатларында иң озак вакыт алка керттермәгән капкачы булып Фред Брэтуэйт саналды. Ил хоккеенда чыгыш ясаган бердәнбер кара тәнле уенчының күрсәткече 244 минут 12 секунд. 12 ноябрь көнне “Авангард”ка каршы узган очрашуда Билалов үз уңышын 282 минут 52 секундка җиткерде. Моннан тыш, Тимур “Ак барс” капкачыларының КХЛдагы иң яхшы күрсәткечен дә яңартты. Әлегә кадәр рекорд иясе булып Станислав Галимов саналды: 224 минут 40 секунд.
Алка һәм минут санаучылар исә җанатарларны тагын да “кыздырды”: Тимур “Ак барс”та гына түгел, гомуми рекордларны да яңартырга мөмкин. Алары “Трактор”га каршы узган очрашуда тормышка ашты. Беренче период ахырында Билалов Алексей Мурыгинның күрсәткечен узып китте. “Локомотив” капкачысы 2015 елда 302 минут 11 секунд дәвамында алка керттермәгән. Бу – КХЛдагы иң яхшы нәтиҗә. Аннары Тимур кызган баштан Россия чемпионатлары рекордын да яңартты. “Лада” капкачысы Иржи Трвай 2004 елда 305 минут 56 секунд дәвамында алка керттермәгән. Билалов исә 316 минут 9 секунд белән тарихка кереп калды.
Гадәттә, уенчылар мондый саннарга артык игътибар итмәүләрен әйтә. Әмма “Трактор”га каршы узган очрашуның беренче периодында көндәшне үз капкасына якын китермәс өчен “Ак барс” уенчылары барысын да эшләде. Рекорд яңаргач, чиләбелеләр уңышка иреште. Сүз уңаеннан, Тимурның 17 октябрьдән бирле алка керттергәне юк иде.
– Иптәшләрем булмаса, рекорд куя алмас идем. Рәхмәт аларга: очып килгән алка алдына яталар, миңа ярдәм итәргә тырышалар. Дөресен әйткәндә рекорд турында очрашу алдыннан да уйладым. Җиңел түгел икән, – диде соңыннан Билалов. – Уңышның сере нәрсәдәме? Егетләр, әти-әнием, туганнарым, хатыным ярдәм итә. Рейдеборн белән арабыздагы көндәшлекнең дә файдасы бар. Ул тырыша, мин дә тырышам. Шулай итеп алга барабыз.
“Ак барс”ның иң тәҗрибәле уенчысы һәм капитаны Данис Зарипов исә Билаловны артык мактау ягында түгел.
– Вакыт уза, лидерлар үзгәрә. Уңышка ирешкән яшь капкачы белән бергә уйнавыма сөенәм, – дигән ул. – Ул – гадәти капкачы. Бу бит аның гына уңышы түгел. Команда да ярдәм итә. Менә мин бүгенге уңышларыма ничек ирештем дип уйлыйсыз? Әлбәттә, команда булыша.
Илнар ХӨСНУЛЛИН
