Фермерларга продукцияләрен сату өчен яңа проект эшли башлаган

Фермерлар – тырыш халык инде алар. Әнә быел да Татарстанда алар 21 млрд сумлык продукция җитештергәннәр. Шәхси хуҗалыкларда исә 99 млрд сумлык продукция әзерләнгән. Ә менә җитештергән продукцияне сату күпчелегенә авыр бирелә. Сыйфатлы, экологик яктан чиста продукцияне арадашчылардан башка гына сатып алучыга җиткерү өчен шактый тырышлык куярга туры килә. Бу сүзләрне без фермерларның үзләреннән дә, җитәкчелектән дә еш ишетәбез. Андый фикер матбугат очрашуында да яңгырады. 

Татарстанның авыл хуҗалыгы һәм азык-төлек министры урынбасары Ришат Хәбипов әйтүенчә, бу мәсьәләдә республикада аларга төрле ярдәм дә күрсәтелә. Ярминкәләр, берничә программа кысаларында интернет челтәре аша сату итү – әнә шундыйлардан. Әлеге ярдәм чараларына тагын бер проект өстәлгән.

– Августта без “Тәмле Казан” ярминкәсендә “Туган як” социаль проектын эшләтеп җибәрдек. Бу фермерларга кибетләрдә үз сәүдә нокталарын булдырырга ярдәм итә, – ди Ришат Хәбипов.

Авыл хуҗалыгы кооперациясен үстерү буенча компетенцияләр үзәге директоры Илнур Хәбибуллин аңлатып узуганча, проект республиканың берничә районында гамәлгә ашырыла. Әлегә алар Балтач, Тәтеш, Кукмара, Теләче, Кукмара, Арча, Саба, Норлат, Тукай районнары белән эшли.

https://vatantat.ru/2019/11/tatarstanda-irle-hatynly-ike-keshene-%d2%afterg%d3%99nn%d3%99r/

– Без хәзер өй янында гына булган кибетләр, республика челтәрләре белән сөйләшүләр алып барабыз. Кызыксыну ике якта да бар. Тагын да уңайлырак булсын өчен бу юнәлешне үстерергә кирәк, – ди ул.

Әлеге яңа проектта кооперативларга берләшкән кешеләргә өстенлек бирелә дип аңладык. Дөрес, башкаларны да кире борып җибәрмәячәкбез, дип вәгъдә бирделәр.

– Бүген без беркемне дә аермыйбыз. Ләкин кибеткә аерым шәхси хуҗалыклар, фермерлар белән эшләү уңайсызрак, чөнки аларга даимилек кирәк. Ә кооперативлар продукция белән һәрдаим тәэмин итә ала, – ди проектны эшләүчеләр.

Авыл хуҗалыгы кооперациясен үстерү буенча компетенцияләр үзәге директоры урынбасары Ренат Мамаев аңлатуынча, эшне йорт янындагы кечкенә кибетләрдән башларга булганнар. Фермерларның продукциясе кертелгән махсус каталог та булдырылган. Алар буенча кибетләр үзләрен кызыксындырган, күбрәк сатыла торган товарларны сайлап та ала ала.

https://vatantat.ru/2019/12/%d3%99j-kukmara-kukmara-yakynaya-bit-ara-2/

– Бүген фермерлар һәм шәхси хуҗалыклар җитештергән продукцияне 7–8 сәүдә  ноктасында табарга мөмкин. Пилот юнәлеш буларак, Агросәнәгать паркында Фермер экокибете дә эшли. Әлегә башка кибетләр белән сөйләшүләр бара. Ике зур челтәр белән килешүләр бар инде. Әлеге этап киләсе елның гыйнварында төгәлләнер дип уйлыйбыз. Февральдән “Туган як” эмблемасы сугылган продукцияне йөзләп кибеттән сатып алырга мөмкин, – диде Ренат Мамаев.

Мондый кибетләрдә сатучылар махсус киемнән йөриячәк.

Проектны тәкъдим итүчеләр сүзләре буенча, сатып алучыларга махсус карта бирелә. Аның ярдәмендә ташламалар да каралган. Мәсәлән, 7 мең сумлык товар сатып алган очракта, алар биш процент ташламадан файдалана алачак. Күпләп сатып алучылар товарларын унбиш процентка арзанрак бәядән сатып ала алачак.

https://vatantat.ru/2019/12/yash-tabiblar-avylga-kajtachak/

– Сатып алучылар сөт һәм ит ризыкларына, яшелчәләргә алдан заказ бирә ала. Бу, беренчедән, фермерларга уңайлы булса, икенчедән, халыкны чыгымнарын һәм сатып алуны алдан планлаштырырга өйрәтә. Акчаны янга калдырыр өчен шунсыз булмый, – ди Ренат Мамаев.

Зөһрә Садыйкова

3 сорауга 3 җавап

  1. Фермерларга әлеге проектка ничек керергә?

Беренчедән, җитештерүченең барлык документлары тәртиптә булырга тиеш. Икенчедән, “Нәтиҗәле үсеш атналыгы” барган районнарда сатып алучыларга үзләренә ошаган продукцияне сайлап алу мөмкинлеге тудырылачак. Продукциясе күпчелеккә хуш килгән фермер турыдан-туры әлеге социаль проектка керә ала. Моннан тыш, теләге булганнар Авыл хуҗалыгы кооперациясен үстерү буенча компетенцияләр үзәгенә үзләре дә мөрәҗәгать итә. Проектта катнашу түләүсез.

  1. Сатып алучы заказны ничек бирә?

Моның өчен махсус картада күрсәтелгән сайтларга керергә һәм интернет-кибетләрне табарга кирәк. Шулай ук кибетнең үзенә дә барырга мөмкин.  Алдан заказ биргән товарлар арзанрак бәядән сатыла. Алдан түләмәскә дә мөмкин, ләкин заказ биргән товарны килеп алу мәҗбүри.  

  1. Сатып алучы картасын ничек алырга?

Әлеге картаны кибетләрдән сорап алырга мөмкин.

 

 

 


Фикер өстәү