Декабрьдә безне нинди үзгәрешләр көтә?
* Ялган товар җитештерүчеләрнең күбесенә көн бетә. Моңарчы хәмерне, табигый мехтан тегелгән туннар, аяк киеме, тәмәкене генә мәҗбүри тамгалау (маркировка – товар турында тулы мәгълүматлар бирүче код) гамәлдә булып килсә, хәзер барлык кием-салым, урын-җир кирәк-ярагы, машина көпчәкләре, фотоаппарат, хушбуйлар да махсус кодлы булырга тиеш. Сатып алучылар “Честный знак” мобиль кушымтасы ярдәмендә кодны “уку” мөмкинлеге алачак.
* Медицина вузларын тәмамлаучылар кайда тели – шунда эшли алмаячак. Дөрес, бу төбәк, федераль бюджет хисабына белем алган яшь белгечләргә генә кагыла. Алар, советлар чорындагы кебек, “распределение” буенча фәкать муниципаль, дәүләт дәвалау оешмаларына гына эшкә җибәреләчәк. Әлеге яңалык, аеруча авыл җирләрендә, сәламәтлек саклау өлкәсенең беренчел буынын – поликлиникаларны табиблар белән тиешенчә тәэмин итү һәм авыл җирләрендә табибларга кытлыкны юкка чыгаруга юнәлдерелгән.
* 1 декабрьдән теантадол, прегабалин, тропикамид дип аталучы препаратларны әйләнештә йөртү тәртибен бозган өчен җинаять җаваплылыгы көчәйтелә. Каты чирләрдән интегүчеләр арасында әлеге даруларга ихтыяҗ гаять зур. Шул ук вакытта препаратлар наркоманнарны да бик нык кызыктыра. Яңалык наркоманияне кисәтүгә һәм аңны томалый торган матдәләрне табиб рецепты буенча билгеләнгән күләмдә генә сату мөмкинлеген бирү максатында кертелә.
* Торак ипотекасы өчен түли алмый башлаучыларга бурычны түләү шартларын үзгәртү (реструктуризацияләү) программасы төгәлләнде. 2015 елдан бирле аннан Россия күләмендә барлыгы 20 мең гаилә файдаланган. Әмма бу ярдәм программалары төгәлләнүне аңлатмый: әйтик, балалы гаиләләр өчен ташламалы ипотека, “ипотека каникулы” гамәлдә булуын дәвам итәчәк.
