2012
* Россиядә “Мәгариф турында”гы закон гамәлгә кертелде. Авыл мәктәпләренең язмышын хәл иткәндә, укытучылар, әти-әниләр фикере исәпкә алына. Әйтик, аз комплектлы мәктәпне авыл җыены карары белән саклап була. Укучыларга туган телдә белем алу хокукы бирелде. Укытучылар уку программаларын үзләре сайлый ала.
* Казанда татар теле һәм әдәбиятыннан халыкара олимпиада уздырыла башлады.
2013
*Республикада беренче тапкыр мәктәпләрнең белем сыйфатын билгеләүче рейтинг булдырылды. Бөгелмә районы беренче урынга чыкты. 2017 елдан мондый исемлекләр барланмый.
*1 февральдән “Ана теле” онлайн мәктәбе эшли башлады. Проект ел саен 10 мең укучыга белем бирүгә исәпләнгән. Хәзерге вакытта анда 6 мең кеше укый.
2014
*Беренче тапкыр татар теле һәм әдәбияты буенча 24 дәреслек федераль исемлеккә кертелде, бүген укыту-методик комплектларның саны – 89. *Татарстан мөгаллиме, Нурлат районының биология укытучысы Алла Головенькина “Россиянең ел укытучысы” бәйгесендә җиңү яулады. Бәйге тарихында республикадан бер укытучының да мондый уңышка ирешкәне юк иде.
*Республика олимпиада үзәге ачылды.
2015
*Татарстан укытучылары өчен БДИ бирү кертелде. Әлеге яңалыкны педагогларның күбесе хупламады, алар аны бирүдән азат ителде.
2016 ел
*Татарстан беренчеләрдән булып, Россия укучылар хәрәкәтенә кушылды. “Юнармия” хәрби-патриотик иҗтимагый хәрәкәт булдырылды.
*Әлмәт, Чаллы, Түбән Камада “Кванториум”нар ачылды.
2017
*29 ноябрьдә Дәүләт Советы утырышында Татарстан прокуроры Илдус Нәфыйков мәктәпләрдә татар теле дәресләренең бары тик ихтыяри укытылачагын белдерде. Бүген мәктәпләрдә туган тел дәресләре әти-әниләр гаризасы буенча укытыла.
2019
*22–27 августта “Ворлдскиллс” дөнья чемпионаты узды. Анда 63 ил һәм төбәктән 1 354 конкурсант 56 компетенциядә ярышты.
*Казанның Мәрҗани исемендәге татар гимназиясе укучысы Рамил Баһавиев татарча укып, БДИны яхшы балларга тапшыруын күрсәтте. Ул барлык фәннәрдән 399 балл җыйды.
* Татарстан полилингваль мәктәпләр челтәре төзү башланды. Төзеләчәк 6 полилингваль комплексның беренчесе 2020 елның 1 сентябрендә укучыларны кабул итәчәк.
Сәрия Мифтахова
