«Акча да мөһим түгел,  эштә җан тынычлыгы кирәк!»

Быел Россиядә яшәүчеләрнең күбесе эш урынын алыштырмакчы икән. Бу хакта “РИА Новости” хәбәр итә. Алар 18 яшьтән узган 3 мең кешенең фикерен белешкән. Сораштыруда катнашкан кешеләрнең 74 проценты эшен алыштырырга әзер. Күпчелек (53 процент) моның сәбәбен хезмәт хакы аз булуга бәйләп  аңлата. Кайберәүләрнең  яңа эшкә урнашып карыйсы килә икән. Респондентларның 6 процентын эшнең күплеге, 3,5 процентын җитәкче белән уртак тел таба алмау эшен алыштыру уйларына этәрә. 13 проценты алган белемнәренең кирәге чыкмау сәбәпле, өйдә генә эшләячәкләрен белдергән. Ә сез эшегезне алыштырыр идегезме?

Алсу Фазлыева, җырчы:

Җырлау – күңел эше.  Әгәр тавышың бетмәсә, җырлыйсың инде ул. Әмма хәзерге заманда бер эш урыны белән генә булмый. Һәркемнең запас варианты булырга тиеш. Без дә тиктомалдан гына бизнеска күчмәдек. Күзәтүләремнән чыгып әйтә алам: һәр җырчының икенче эше бар. Әле кайберәүләрнең төп эше сәхнәдә дә түгел. Эш алыштырудан куркырга кирәкми. Әгәр акчасы аз икән, параллель рәвештә башка эш табып була. Иң мөһиме – теләк кирәк.

Мәүлидә Исрафилова, тәрҗемәче:

– Бик озак еллар дәүләт эшендә идем. Иртән билгеле сәгатькә киләсе, кич вакытың тулганчы утырасы. Тик бу минем  күңел халәтемә туры килмәде. Кемдер эш кушып, эшләгәнеңнән гаеп табып тора икән – бу минеке түгел. Баштарак социаль ипотека түлисе бар дип түздем. Ә аннары  үземне җиңдем. Китәргә гариза яздым. Хәзер өйдә генә эшлим. Бу адымыма сөенеп туя алмыйм. Бер көндә элек бер ай өчен түләнгән акча алган вакытлар бар. Өйдә миңа тыныч. Иртән балаларны бакчага илтәм дә үз эшемә утырам. Кайчак, көндез  өлгермәсәм, төнлә эшлим. Иң мөһиме – эшем ошый, ерактагы җитәкчем хезмәтемне бәяли. Кесәгә акча керә. Кредитларымны ябып бетердем. Өйгә ремонт ясаттык. Үзем теләгәнчә, күңелем кушканча яшим. Акча булгач, матурны киям, тәмлене ашыйм. Эштән китсәм, ни диярләр, дип утырасы түгел икән. Вакытында тәвәккәлләргә кирәк.

Луиза Кәримуллина, эшсез:

– Казанның бер балалар бакчасында эшләдем. Эшем авыр булды, дип зарлана алмыйм, әти-әниләргә ошап булмады. Бер ана йөрәгемә төште. Гел гаеп тапты. Минем өстән бакча мөдиренә дә кергән иде. Тик эшем җиренә җиткереп эшләнгәч, гаебемне тапмадылар. Теге хатын кая гына язмады. Аның баласы, бакчага йөрмим, дип елый. Шуңа күрә мине яратмады. Янәсе, мин балага игътибарлы түгел. Ел башыннан эштән киттем. Әлегә өйдә утырам. Әмма эш таптым инде. Киләсе дүшәмбедән бер оешмага эшкә чыгам. Монысы – бөтенләй  башка юнәлеш. Акча да мөһим түгел,  эштә җан тынычлыгы кирәк!

Венера Гаязова, социаль хезмәткәр:

– Эшемне бик яратам, аны башкага алыштырмас идем. Ташласам, әби-бабайларым нишләр? Мин аларга бик ияләштем. Акча дип кенә дә булмый. Иремә яхшы түлиләр. Мин бит – хатын-кыз. Өйне чиста тотам, тәмле итеп ашарга пешерәм. Әле камыр ризыклары белән әби-бабайларымны да сыйлыйм. Миңа аларның рәхмәте бик җиткән. Яшьләргә, әлбәттә, акчалы эш кирәк. Тормыш алып бару, кредитлар түләү өчен акчасыз булмый. Шуңа да алар эш алыштырырга мәҗбүр.

Вәсилә Заһидуллина, фельдшер (Әлмәт районы, Нәдер авылы):

– Утыз ел бер урында мин. Эштән китәсе килгән чаклар бөтен кешедә буладыр инде. Уйлап йөрисең дә, аннары узып китә, тагын йөгерәсең, чабасың. Безнең эш бик тынгысыз, һәрчак кеше белән эшләү җиңел түгел, җаваплылык зур. Төнлә дә чакырып алалар. Өйдә гаилә, балалар бар, барысын да җайларга кирәк. Зарлануым түгел, эшемне яратам. Кая гына урнашсаң да, авырлыгы, җиңеллеге булмый калмый, бөтенесенә дә ияләнәсең. Без булмаган җирдә яхшы, диләр бит. Ул сүзләр белән йөз процент килешәм.


Фикер өстәү