Төркиядә җир тетрәү сәбәпле, кешеләр үлгән. Рөстәм Миңнеханов Төркия Президенты Рәҗәп Тайип Эрдоганга кайгы уртаклашу сүзләре белән телеграмма юллады.
«Татарстанлылар Төркия Республикасының Элязыг һәм Малатья провинцияләрендә җир тетрәү нәтиҗәсендә кешеләрнең үлеме турындагы хәбәрне әрнеп һәм чын күңелдән кайгырып кабул итте», диелә телеграммада.
Республика җитәкчесе татарстанлылар исеменнән табигый катастрофа вакытында һәлак булган кешеләрнең туганнарының һәм якыннарының кайгысын уртаклашты һәм зыян күрүчеләргә тизрәк савыгуын теләде.
