Бүген ТР Премьер-министры Алексей Песошин ведомство коллективына Татарстан Төзелеш, архитектура һәм торак-коммуналь хуҗалык министрлыгының яңа башлыгын тәкъдим итте. Бу хакта республика Хөкүмәте порталында хәбәр ителә.
Песошин Россия Хөкүмәте башлыгы Михаил Мишустин боерыгы белән Ирек Фәйзуллинның РФ төзелеш һәм ТКХ министрының беренче урынбасары итеп билгеләнүен искәртте.
ТР Премьер-министры Ирек Фәйзуллинга яңа вазифасында уңышлар һәм нәтиҗәле эшләвен теләде. Фәйзуллин, үз чиратында, чарада катнашучыларның барысына да уртак эшчәнлек өчен рәхмәт белдерде.
«Һәр кешенең бер урында эшләүдә үз чоры була, минем чор тәмамланды, — диде Татарстанның элеккеге төзелеш, архитектура һәм ТКХ министры. — Яңа министрга уңышлар һәм эшнең конкрет, төгәл оештырылуын теләп калам».
