Акчаны тегендә-монда тотасы түгел. Барысы да эшкә җәлеп ителергә тиеш, чөнки халык нәтиҗәсен көтә. Татарстан Дәүләт Советы Рәисе Фәрит Мөхәммәтшин илкүләм проектларны гамәлгә ашыруга бәйле комиссия утырышында шулай диде. Узган ел ниләр башкарганнар, алда нәрсә көтә – утырышта бу хакта да сүз булды.
Татарстанда быел 11 илкүләм проект гамәлгә ашырылачак. Алар кысасында 50 төбәк проекты эшләячәк. Боларга 25,7 миллиард сум акча бүлеп биреләчәк. Татарстан Премьер-министрының беренче урынбасары Рөстәм Нигъмәтуллин чыгышында әйтүенчә, былтыр республикада 49 төбәк проектын тормышка ашыруга ирешкәннәр. Боларга 27,4 миллиард сум акча тотылган. «340тан артык социаль әһәмияткә ия корылма: балалар бакчалары, мәктәп, диспансеризация узу өчен үзәкләр һәм башкалар төзелгән, – диде ул. – Халыкның табигый үсеше буенча эш алып барырга кирәк. Гомер озынлыгын, уртача хезмәт хакын, спорт белән шөгыльләнүчеләр санын арттыру мөһим».
Хәзерге вакытта Татарстанда илкүләм проектлар кысасында 25 мәктәпкәчә учреждение, тугыз мәктәп, ФАПлар, балалар онкология, гематология һәм хирургия үзәкләре, спорт заллары һәм бассейннар төзелеше дәвам итә. 42 мәктәпнең матди-техник базасы яңартылачак, өч модульле китапханә, биш авыл клубы төзеләчәк. Нигъмәтуллин искәрткәнчә, илкүләм проектлар халыкның яшәү сыйфатына уңай тәэсир итәргә юнәлтелгән.
Эшләгәнең бушка китмәсен дисәң, халык белән элемтәдә булу кирәк. Рөстәм Нигъмәтуллин сүзләренчә, илкүләм проектларны тормышка ашырганда кешеләрнең фикерен тыңлау, аларның мониторинг эшендә катнашуы мөһим. Матбугат чаралары исә халыкка мәгълүмат биреп торуны тәэмин итәргә тиеш. «Республикада яшәүчеләр кайда, нинди корылма һәм кайчан сафка басуын, бергәләп нинди нәтиҗәгә ирешергә тиеш икәнебезне белеп торсын», – диде ул.
Дәүләт Советы Рәисе урынбасары Татьяна Ларионова сүзләренчә, илкүләм проект дигәндә төзелеш, ремонт эшләре генә күздә тотылмый. «Бу, иң элек, теге яки бу проект буенча максатчан күрсәткечләргә ирешү. Билгеле бер күрсәткечләргә үз тармагы буенча депутатларны беркетергә тәкъдим итәм», – диде ул.
Акчаның һәр тиене нәтиҗәле кулланылырга тиеш. Фәрит Мөхәммәтшин әйтүенчә, илкүләм проектларны тормышка ашыру өчен 2020 – 2024 елларда республикада 69 миллиард сум акча тотылачак. Шуның 40 миллиардтан артыгы федераль бюджеттан бирелә. «Илкүләм проектлар төрле дәрәҗәдәге җитәкченең эшендә үзәктә торырга һәм контролендә булырга тиеш», – диде ул.
Парламент җитәкчесе әйтүенчә, илкүләм проектларны тормышка ашыруны контрольдә тоту өчен республика министрлыклары, партия вәкилләре берләшеп эшләргә, җаваплылыкны һәркем тоярга тиеш.
Чулпан Гарифуллина
