Миңнеханов Сәламәтлек саклау министрына Diamond Princess пациентлары турында сөйләде

Татарстан Президенты Рөстәм Миңнеханов Россия сәламәтлек саклау министры Михаил Мурашко белән очрашты. Президент аңа Diamond Princess круиз судносыннан Казанга китерелгән туристларның (алар бүгенге көндә Республика клиник йогышлы авырулар хастаханәсендә карантин уза) хәле турында сөйләде. Бу хакта «Татар-информ» агентлыгына ТР Президентының матбугат хезмәте җитәкчесе Лилия Галимова хәбәр итте.

«Рөстәм Миңнеханов министрга Казанга эвакуацияләнгән гражданнар өчен тиешле санитария-эпидемиология чаралары һәм уңайлы шартлар тәэмин итү буенча республикада нинди эшләр оештырылуы хакында сөйләде. ТР Президенты үзенең һөнәри бурычын лаеклы төстә үтәгән медицина персоналының (алар 14 көн дәвамында паиентлар янында булып, аларга даими кайгыртучанлык күрсәтте) ролен аерым билгеләп үтте», — диде Галимова.

Үз чиратында, РФ сәламәтлек саклау министры республиканың санитария-эпидемиология чараларын тәэмин итүдә зур оешканлык күрсәтүен, шулай ук медицина персоналының югары квалификацияле булуын билгеләп үтте.

«Татар-информ» агентлыгы февраль ахырында Республика клиник йогышлы авырулар хастаханәсенә Гадәттән тыш хәлләр министрлыгының махсус очкычы белән Diamond Princess круиз лайнерыннан (анда берничә кешедә Covid-2019 коронавирусы ачыклана) Россиянең сигез туристын китерүләре хакында хәбәр иткән иде инде.