Бу районнардагы икенче шундый кабинет инде. Беренчесе әле шушы араларда гына Саба районында пәйда булды. Районнарда паллиатив ярдәм бүлмәләре Казан хосписының Россия Президенты грантларына конкурста җиңүе нәтиҗәсендә булдырылды.
– Ике кабинет ачтык инде. Алар – пилот проектлары, максатлар һәм бурычларыбызга ирешүдә флагманнар булып торачак. Иң мөһиме – сырхаулар үзләренең ялгыз түгеллеген, янәшәләрендә туганнары кайгыртуын тоярга тиеш, – ди Анжела Вавилова исемендәге фонд идарәсе рәисе, Дәүләт Советы депутаты Владимир Вавилов.
Каты авырулардан интегүчеләрнең хәлен ничек тә җиңеләйтергә тиешле бүлмәләр кирәкле барлык җиһазлар – оргтехника, медицина приборлары, препаратлар һәм инвалид арбалары белән тәэмин ителгән. Белгечләр Казан хосписында укып-өйрәнеп кайткан. Табиблар авыртуны баса торган препаратларга рецептлар язып бирә һәм сырхауның туганнарын өйдә аны карау кагыйдәләренә өйрәтә.
Хәзерге вакытта Татарстанда яшәүче 20 меңгә якын кеше паллиатив-хоспис ярдәменә мохтаҗ. Шулардан күпчелеге авылларда яши.