Чабаксардагы гимназияләрнең берсендә физкультура дәресендә йөзү белән шөгыльләнгән вакытта бассейнда 7нче сыйныфта укучы 13 яшьлек кыз батып үлгән.
Чувашстан буенча Тикшерү идарәсе белдерүенчә, дәрес вакытында укучының кинәт хәле бетә һәм ул судан чыгарга өлгерми, аңын югалта. Физкультура укытучысы аны судан тартып чыгара һәм “ашыгыч ярдәм” чакырта. Табиблар тырышлыгына карамастан, кыз вафат була.
Тикшерү органнары әлеге очрак буенча тикшерү үткәрә. Үлем сәбәпләрен билгеләү өчен суд-медицина экспертизасы билгеләнгән.
Шулай ук тикшерүчеләр укучыга сәламәтлеге буенча йөзү белән шөгыльләнергә ярау-ярамауны ачыклаячак, мәгариф учреждениесе һәм медицина хезмәткәрләренең гамәлләренә хокукый бәя бирәчәкләр.
