Татарстанда балалар бакчалары өчен түләү 12 майдан исәпләнә башлаячак. Бу турыда Татарстан Мәгариф һәм фән министры урынбасары Илсур Һадиуллин белдерде.
⠀
Моңа кадәр, 3 апрельдә ата-аналар соравы буенча, президент Миннеханов ил җитәкчелеге игълан иткән «эшләми торган көннәр» өчен абонент түләвен бетерде.
⠀
Кайбер балалар бакчаларында балаларны педиатрдан сәламәтлек турында алынган белешмәләр белән китертергә сораганнар. Республиканың Сәламәтлек саклау министрлыгында аңлатуларынча, белешмәләрне дистанцион рәвештә алып булачак. Сездән авыру-авырмауны һәм чирләүчеләр белән контактта булу-булмауны сораячаклар. Соңыннан белешмәне электрон почтага яисә мессенджерлар аша җибәрәчәкләр. Белешмәне фотога төшереп һәм сканлап та җибәрергә рөхсәт ителә.
⠀
Кайбер балалар бакчаларында, соцчелтәрләрдәге язышулар скриннарына караганда, администрация 12 майдан балаларны медицина битлекләре һәм резин перчаткаларда китертүне сораган.