Питрәч районының Богородское авылындагы бер гектар җирне биләп утырган зур теплицаны күргәч, гаҗәпләнүебезне яшереп кала алмадык.
– Бу теплица күптәнге. Колхозлар заманында ук булган. Дөрес, ул елларда болай ук зур түгел һәм үсентеләр дә аз иде. Биредә бары тик роза чәчәкләре генә үскән чор да булды. Теплицаның ябылып торган чаклары да бар иде. Берничә ел элек Павел Владимиров дигән эшмәкәр эшләрне үз кулына алып, тулысынча үсентеләр белән тутырды. Нинди генә күргәзмә, зур бәйрәмнәр булса да, аларның чәчәкләреннән башка булмый, – ди Богородское авыл җирлеге башлыгы Фәрит Фәизов.
Хәзер биредә нинди генә чәчәк үсентесе юк: күпьеллык, берьеллык бүлмә һәм бакча гөлләре, чәчәкләр. Агач үсентеләре дә күпләп сатыла.
Без барган көнне теплицада хуҗаның кызы Валентина каршы алды. Эшчеләр белән бергә хуҗалар да үсентеләрне күчереп утырту, сатып алучыларны каршы алу белән мәшгуль иде. Биредә утыз кеше эшли.
– Без теплица белән шөгыльләнүебезне кыяр, помидор, яшел суган үстерүдән башлаган идек. Соңрак әни, зур максатлар куймый гына, чәчәк үстерә башлады. Акрынлап үзебез чыбыклар ялгап, орлыкларны әзерли башладык. Шуннан соң зураеп, көчәеп киттек. 2013 елда без килгәндә ташландык хәлдәге бина иде бу. Бөтен гаиләбез белән көне-төне эшләп, аякка басканчы шактый вакыт кирәк булды. Файдалы һәм шул ук вакытта матур, рәхәт бизнес бит бу, – ди Валентина Владимирова.
Хәзер монда 100 төрле исемдәге чәчәк үсә. Һәр төрдәге чәчәкнең 50-60лап сорты бар.
– Шушы кадәрле күп чәчәкне ничек сатып бетерәсез? Ихтыяҗ, чыннан да, шуның кадәр зурмы? – дип сорадык хуҗабикәдән.
– Әйе. Чәчәкләрнең артып калганы юк. Безнең белән күптәннән эшләүче эшмәкәрләр бар. Теплицабызда үскән чәчәкләребез башкаланы гына түгел, республикадагы башка район үзәкләрен дә бизи. Шулай ук шәхси хуҗалыклар да, башка төбәкләрдән дә күп киләләр безгә, – ди ул.
Теплицада эшнең ел дәвамында туктап торганы юк. Шуңа күрә хезмәткәрләргә дә эш җитәрлек.
– Барысын да үзебез җитештерәбез. Чыбыкчаларны да үзебез ялгыйбыз. Җимешлек күптәннән сатып алганыбыз юк инде. Шунлыктан халыкка арзанрак бәядән сату мөмкинлеге бар. Барлык эшләрне дә химия кулланмыйча, кул белән башкарабыз. Шуңа күрә чәчәкләребезнең сыйфаты да яхшы, – ди Валентина.
Янәшәдәге бер блокта кабаттан кыяр үстерергә дә планнары бар икән.
– Эшләгән кешегә эшнең беткәне юк. Менә әле Татарстанда беренчеләрдән булып, суккуленты дигән чәчәкләрдән картиналар эшли башладык, – ди эшмәкәр ханым. – Алар бик чыдам. Иң зур картинабызга 600 данә чәчәк кирәк булды. Алар төрле күргәзмәләрне, биналарны, кабинетларны бизи. Ни генә эшләсәк тә, эшебезне яратып, рәхәт итеп башкарырга тырышабыз. Бары тик шул очракта гына ул матур нәтиҗәләрен бирә. Чәчәкләр бизнесында бу аеруча мөһим.
Зөһрә Садыйкова
Даут.Авылыбызда ике мәчет,ике имам, Бер берсен тыңлап,аңлашып эшлиләр иде.Халыкта канәгать иде.кайсы мәчеткә барасың килә шунда бара идең. Бу 5-6кешегә нәрсәгә…Чирмешәннең «Мөшбикә» мәчете тирәсендә ни сәбәпле шау-шу купкан?
Загрузка ...
