КПРФ Татарстан Президентын сайлауда үз кандидатурасын тәкъдим итмәячәк

Татарстан Дәүләт Советында КПРФ фракциясе беренче яртыеллык йомгаклары буенча матбугат конференциясе үткәрде.
Фракция җитәкчесе Хафиз Миргалимов республика массакүләм мәгълүмат чаралары журналистлары белән очрашуны ачып, ярты елда депутат-коммунистларның 4 утырыш, 4 матбугат конференциясе, торак-коммуналь хуҗалык һәм экология мәсьәләләре буенча 6 эшлекле киңәшмә үткәргәнлеге турында хәбәр итте. Ул КПРФның, коронавирус пандемиясе килеп чыгу сәбәпле, ЖКХ тарифларын 2019 елгы дәрәҗәдә саклау тәкъдиме белән чыгуларын искә төшерде. Хәзерге вакытта гади кешеләр дә бизнес та акча мәсьәләсендә кыенлыклар кичерә чөнки, дип искәртте фракция рәисе.
Хафиз Миргалимов сугыш чоры балалары буенча закон проектын эшләүнең дәвам иттерелүе турында да сөйләп үтте. Аның әйтүенчә, әлеге документның Бөек Җиңүгә 75 ел тулган елда федераль дәрәҗәдә кабул ителүе бик әйбәт булыр иде.
Татарстан бүлеге онлайн режимда КПРФ Үзәк комитеты җитәкчесе Геннадий Зюганов катнашында ТАССР оештырылуга 100 ел тулуга багышланган тантаналы чара үткәргән. Партия әлеге бәйрәм уңаеннан юбилей медален чыгарган. КПРФ эшчәнлегендә актив катнашучылар шушы медаль белән бүләкләнәчәк икән.
Хафиз Миргалимов журналистлар сорауларына җавап биреп, Татарстан Президентын сайлауда (быел сентябрь аенда узачак), Үзәк комитет карары буенча, КПРФның үз кандидатурасын тәкъдим итмәячәген билгеләп үтте. Аның әйтүенчә, партия муниципаль берәмлекләрнең вәкиллекле органнарына сайлауга бөтен көчен юнәлтәчәк. Бары тик эш һәм вакыт белән сыналган кешеләр генә партиянең хуплавына өметләнә ала, дип белдерде фракция җитәкчесе.
– Татарстанның бүгенге Президентының мөмкинлекләре, абруе һәм аңа карата ышаныч кайчандагыга караганда да зуррак, – дип билгеләп үтте ул. – Сайлауда катнашырга мөмкин дә булыр иде, әлбәттә. Тик без партия Үзәк комитеты кабул иткән карарны үтәргә тиеш.