25 июньнән Конституциягә төзәтмәләр кертү өчен тавыш бирү участоклары эшли башлады. Республика җитәкчелеге дә беренче көнне үк үз тавышын биреп куйды.
Татарстан Президенты Рөстәм Миңнеханов, гадәттәгечә, КАИ бинасында урнашкан участокта тавыш бирде. Президент Роспотребнадзор куйган таләпләрнең үтәлеше белән кызыксынды.
– Бүген безнең республика – күп күрсәткечләр буенча алдынгы төбәк. Конституциягә төзәтмәләр кертү – ирешелгән уңышларны ныгыту ул. Коронавирус пандемиясе шартларында сыйфатлы медицина ярдәме күрсәтү, гражданнарның социаль яклануы буенча кертелгән төзәтмәләр аеруча зур мәгънәгә ия, – диде Рөстәм Миңнеханов.
Башкаланың Карл Маркс урамы, 68 йорт адресы буенча урнашкан сайлау участогында (КНИТУ) Дәүләт Советы Рәисе урынбасары Марат Әхмәтов тавыш бирде. Сайлау участогына Марат Әхмәтов хәзерге вазгыять таләп иткәнчә битлек һәм пирчәткәдән килде. Ул махсус дезинфекцияләүче келәмнән узды, медицина хезмәткәре аның тән температурасын үлчәде. Паспортын депутат үз кулында гына ачып күрсәтте.
– Россия дәүләтенең 90 нчы еллар башында кабул ителгән Конституциясеннән соң илдә күп кенә үзгәрешләр булды, зур, катлаулы юл уздык. Хәзерге икътисад, дәүләтнең төзелеше, вазгыять, һичшиксез, Төп Законга да үзгәрешләр кертүне сорый. Илнең киләчәген ныклы һәм тотрыклы итү, икътисадын, үз халкының тормыш дәрәҗәсен социаль яктан гарантияләр өчен, Конституциягә төзәтмәләр кертү кирәк иде, минемчә, алар вакытлы, – диде Марат Әхмәтов үз тавышын биргәннән соң. – Төп Законыбызга керәчәк үзгәрешләргә ихлас күңелдән тавыш бирдем. Һичшиксез, илебез киләчәктә тагын да көчле, тотрыклы, халкының тормышын мул итәрлек сәясәт алып барыр дип ышанам.
Быелгы сайлау тавыш бирүчегә дә, участок вәкилләренә дә яңалыклар алып килде. Татарстанның Үзәк сайлау комиссиясе рәисе Андрей Кондратьев Россия Конституциясенә төзәтмәләр кертү буенча тавыш бирүнең беренче көне турында журналистларга сөйләде.
– Барлык участоклар да, Казанның Авиатөзелеш районы булсынмы ул, Әгерҗе булсынмы, саклану чаралары белән тәэмин ителде. Тавыш бирү көне килеп җиткәнче, без дә күнекмәләр үткәрдек. Мәсәлән, паспортны хәзер кулдан-кулга бирмибез бит. Быелгы сайлау сәяси активлыкны арттырды. Шәхсән мине әллә ничә партия матбугат очрашуына дәште. Моңарчы шулкадәр чакырулар кабул итүемне әле хәтерләмим. Халык арасында төзәтмәләр турында сөйләшәләр, фикер алышалар. Шуны әйтә алам: куркынычсыз һәм уңайлы тавыш бирү өчен тудырылган шартлар нәтиҗәле, – диде ул.
Андрей Кондратьев әйтүенчә, тавыш бирү вакытында куркынычсызлыкны тәэмин итү өчен күп көч куелган. Аның күзәтүләре буенча, тавыш бирүнең беренче көнендә үз ручкасы, үз битлеге һәм пирчәткәсе белән килүчеләр күпчелекне тәшкил иткән. Сайлаучыларны саклану чаралары белән тәэмин итәрлек запас бар анысы. Үзәк сайлау комиссиясе рәисе белдергәнчә, кирәк җиргә аларны китертергә дә мөмкин булачак.
Чулпан Гарифуллина
Фото:https://president.tatarstan.ru
