«Призвание» илкүләм премиясе лауреатлары булган Татарстан табиблары: «Элек йогышлы авыруларга карата караш башкача иде» 

Республика йогышлы авырулар клиник хастаханәсе табиблары Россиядә иң яхшылардан дип табылды. «Призвание» илкүләм премиясе лауреатлары – беренче бокс бүлеге мөдире Дина Семенова, табиб-инфекционистлар – Айнара Айсина, Ульяна Кошелева.

Татарстан табиблары коронавируслы авыруларга февраль аенда беренчеләрдән булып ярдәм күрсәтә башлады. Diamond Princess лайнерындагы кайбер пациентлар Казанга 14 көнлек карантинга кайтарылган иде. Шул уңайдан әлеге хастаханә белгечләре «Сугышлар, террористик актлар һәм чуалышлар вакытында зыян күргәннәргә ярдәм күрсәтүче табибларга махсус премия» номинациясендә бүләкләнде.

– Безнең һөнәр ничек кенә үзгәрмәсен, нинди генә яңа технологияләр килеп кермәсен, медицинаны һөнәрен яраткан, аңа бирелгән табиблардан башка күз алдына китереп булмый,  – диде чараны алып баручы Елена Малышева.

Республика йогышлы авырулар клиник хастаханәсе табиблары Мәскәүдә үткән әлеге бәйрәмгә сугыш кырыннан чыгып китте дисәң дә арттыру булмас. Биредә көн саен яңа коронавирус инфекциясенә каршы көрәш алып барыла. Менә ничә ай туктаусыз көрәш.

– Премиягә лаек булуыбызны берничә көн кала гына хәбәр иттеләр, – ди бүлек мөдире Динә Семенова. – Россиянең төрле төбәкләреннән җыелган атказанган табиблар янәшәсендә басып тору бик зур дәрәҗә иде. Күп хис-тойгылар белән кайттык.

Мәскәүгә барасын аларга 14 июньдә әйтәләр. Ике көннән  инде җыенып чыгып китәргә кирәк. «Яңа күлмәк алырга өлгердегезме соң?» – дип шаярттым. «Өлгердек!» – ди табибә, көлеп. Дөрес, аларда күлмәк кайгысы булмый. Һәркайсы таҗвирустан тикшеренү уза: мазок тапшыралар. Анализ нәтиҗәсе вируска тискәре булуын күргәч,  иркен сулыш алалар. Лайнердан кайтарылган туристлар безнең белгечләргә тәҗрибә тупларга мөмкинлек бирә. Ул чакта да, хәзер дә чир таралмасын өчен көчләрен кызганмыйлар. «Безне ел саен укыталар һәм аеруча куркыныч йогышлы чирләргә каршы әзерлиләр иде. Быел шул белемне тормышта кулланырга туры килде», – ди табибә.

Беренче авыруларны кабул иткәндә, яңа өйрәнелмәгән чир турында мәгълүмат аз була. Көн саен клиник тәкъдимнәр, мәгълүматлар арта. Белгечләребез чит ил чыганакларындагы яңалыклар белән дә танышып бара.

– Февральдә Кытайда халыкның күпләп авыруы хакында ишетеп кенә белә идек, – ди белгеч. – Хәзер аның белән үзебез дә, көн саен очрашкач, дәвалау һәм акцентлар гел үзгәреп тора. Кайсы очракта нинди өзлегүләр булырга мөмкин икәнен дә аңлыйбыз һәм аны булдырмау өчен эш алып барабыз.

Ковидка каршы госпитальләрдә эшләүчеләрне күп кеше замана геройларына тиңли. Динә Семенова фикеренчә, әлегә ул хакта уйланырга иртәрәк. Участок табиблары, «ашыгыч ярдәм» хезмәте, авыруларга планлы рәвештә медицина ярдәме күрсәтүчеләр – барысы да әлеге йогышлы чирне җиңү өчен тырыша. Шуңа күрә кемнедер алгы сафка чыгарырга, кемнедер икенче планга куярга ярамый. Бергәләп тотынганда гына җиңүгә ирешеп булачак.

Күптән түгел Татарстан сәламәтлек саклау министры Марат Садыйков соңгы дистә елда йогышлы авырулар өлкәсенә игътибар аз бирелгәнен әйткән иде. Хәзер инде киресенчә күбәеп китте кебек. Белгечләр моны сизәме соң?

– Элек йогышлы авыруларга карата караш башкача иде, – ди Динә Семенова. – Хәзер аңа йөз белән борылуны күрәбез. Шунсыз ярамый: юкса чир артачак, аңа каршы тору авырлашачак. Карантин чаралары, чикләүләр дә бер дә юктан гына кертелмәде.

Элек медицина хезмәткәрләре көне якынлашканда ел саен республика күләмендә «Ел табибы – Ак чәчәкләр» бәйгесе үткәрелеп килде. Быел ул булмады. Вазгыять андый түгел… Тантаналы чарада яхшылардан яхшы дип табылган белгечләрне сәхнәгә чакырып котлыйлар, бүләкләр тапшыралар иде. Бүләкләнүчеләр арасында табиб- инфекционистларны сирәк күрә идек. Менә аларга да сәхнә яуларга чират җитте.

– Мәскәүгә чакырып котлауларына бик сөендек. Финалга чыгуыбыз, лауреат дип танылуыбыз көтелмәгән куаныч булды, – ди Динә Семенова. – Ул номинациядә төрле шәһәрләрдән кеше күп иде. Кемдер лайнердагыларны аэропортта каршы алган. Без – авырулар белән карантин вакытында беренче аралашкан табиб-клиницистлар. Кубок төркемгә исәпләнгән иде.  Аны эшебезгә бик зур бәһа буларак кабул иттек.

Фәния Арсланова