Гомер буйлап барам
Гомер буйлап барам
Барсын уйлап барам…
Уйлар бетмәле түгел…
Алай итеп карыйм,
Болай итеп карыйм –
Башың җитмәле түгел.
Акыллы да булдык
Ахмаклык та кылдык,
Барсы да булды инде.
Булды шатлыклары,
Авыр вакытлары
Булды да узды инде.
Шатлык-кайгылар да
Үземнеке бар да,
Үземнең юлдан барам.
Әлләкем түгелбез,
Әмма ким түгел без,
Әлләкем булганнардан.
Гомер буйлап барам,
Барсын уйлап барам,
Уйлар бетмәле түгел.
“Эз калдырып китәм
Бу дөньяда,” — дисәң,
Гомер җитмәле түгел.
2006
________________________________________________
Тал бөгелә җилләргә
Елгалары тар гына,
Елга яры — тал гына.
Ялгыз калган йөрәгемә
Сары сагыш сарыла.
Карыйм бөдрә талларга,
Карыйм агымсуларга.
Алар мине аңламаслар,
Калыр авыр суларга.
Карыйм бөдрә талларга,
Таллар елый таңнарда.
Әллә минем хәлләремне
Аңлый микән алар да.
Хәлем сөйлим кемнәргә —
Тал бөгелә җилләргә.
Парлылар да бөгелгәндә,
Ялгыз ничек түзәргә?!.
2008
________________________________________________
Агымсу
Күңелең китек булса да,
Булса да тирән яра,
Керфегең түбән кадама
Аккан суларга кара.
Сабырлыгыңны сындырма
Аккан суларга кара.
Никадәр авыр булса да
Агым су юлын таба.
Булыр инде бу дөньяның
Тетрәнеп алган чагы,
Дер селкенеп алган чагы,
Утларга салган чагы.
Дөньялар нинди булса да,
Бары чыдарга кала.
Сабырлыкларың сыңганда
Агым суларга кара.
Өметләрең өзелгәндә
Аккан суларга кара.
Никадәр авыр булса да
Агым су юлын таба.
________________________________________________
Син миңа кирәк әле
Күкрәкләрдә янар йөрәкләр бар,
Йөрәкләрдә — якты моңнар бар.
Бер-беребезне яктылыкка күмеп,
Бергә үтәр моңлы юллар бар.
Таулар-ташлар ярып узган чакта
Гомер дигән авыр юллардан,
Минем белән булсаң — югалмассың.
Синең белән булсам — югалмам.
Бер-беребезгә без кирәкбез әле,
Бергә яшик әле шуңа без.
Бергә булсак кына сынауларның
Ниндиен дә җиңеп чыгарбыз.
Күземә кара әле,
Күземә кара әле.
Сиңа булган сөю уты
һаман да яна әле.
Син миңа кирәк әле,
Мин сиңа кирәк әле.
Миндә һаман син яраткан
Шул моңлы йөрәк әле.
1996
________________________________________________
Китмик әле яшьлек иленнән
Еллар да һәм гасырлар да уза,
Картаябыз без дә, дисеңме?!
Ә мин бер дә картаймыймдыр кебек,
Яшәрәмдер генә шикелле.
Күзләреңне алма, алма күзләремнән,
Кулларыңны алма, алма билемнән…-
Гомер үтә бирсен, ә без синең белән
Китмик әле, китмик яшьлек иленнән.
Яшик әле яшьлек илләрендә,
Саф хыяллы гүзәл дөньяда.
Иртә язда уяналмый калган
Хисләр әле яңа уяна.
Яктылыклар алып яшик әле
Яңа туган һәрбер көннән без.
Без гомернең татлы мизгелләрен
Озайтырга җиргә килгәнбез.
1999
________________________________________________
Кораб
Әй, бу гомер елгалары…
Әй, тормыш диңгезләре…
Упкыннарның тирәннәре…
Давылның тиңсезләре…
Мең давыллар уртасында
Гомер корабы бара.
Кемнәрнедер упкын ала,
Кемдер дулкында кала.
Давылларны яра кораб,
Эзләп бәхет ярларын…
Ул үзе дә белми кайчак,
Кайда табан барганын.
Безнең гомер кораблары
Озын юл үтәр әле.
Ак бәхеткә илтер әле
Язмышның җилкәннәре.
2010
________________________________________________
Кичү
Бу ярлардан теге ярга
Йөзеп чыгалмаганнар.
Җиңәмен дип кергәннәр дә
Җиңеп чыгалмаганнар.
Бу ярлардан теге ярга
Чыгалыр сыман идем.
Беркем салмаган басманы
Мин салыр сыман идем.
Суы салкын. Кага дулкын.
Ник кердем бу суларга?!
Бер чылангач, кире юл юк –
Кала җиңеп чыгарга.
Бәхет сорамыйм ходайдан
Сорыйм чыдамлык кына —
Бу ярлардан теге ярга
Йөзеп чыгарлык кына.
2008
________________________________________________
Сандугач моңы
Сайрый да сайрый сандугач,
Үзәкне өзә инде…
Сагынганнар сабыр була,
Сабырлар түзә инде.
Сандугач моңы сузыла
Сиңа илткән юл сыман.
Синсез чакта мин үзем дә
Сагышлы бер моң сыман.
Беләм, җаным мин синең дә
Сагынган икәнеңне.
Сарыларга сабышсам да
Сабырлар итәм инде.
Саргаелды сайралды да…
Сабырлар ителде гел.
Бәлки, безнең йөрәкләр дә
Сандугач шикелледер.
Мәңгелеккә аерса да
Язмыш юл чатларында
Сандугач булып кайтырмын
Сагынган чакларыңда…
2001
