Беренче сентябрьдә республика мәктәпләрендә йөздән артык укучы өйләренә кайтарып җибәрелгән. Сәбәбе – иртән аларда ОРВИ билгеләре ачыклану. Бу хакта “Роспотребнадзор” Татарстан буенча идарәсе җитәкчесе урынбасары Любовь Авдонина әйткән.
Санитар табиб билгеләп үткәнчә, 111 бала томау төшү, йөткерү һәм тән температурасы югары булу аркасында мәктәпкә кертелмәгән. “Беренче карашка, зур сан да түгел кебек – укучыларның нибары 0,2%ы гына. Әмма аларны мәктәпкә кертмәү 111 сыйныфтагы укучыны чирдән саклап калу мөмкинлеге бирә, дигән сүз бит”, – дип аңлатып үткән ул.
Авдонина ата-аналарга, салкын тидерү билгеләре булган баланы мәктәпкә җибәрү аркасында аның сыйныфташларына да чирләү куркынычы тудырасыз, дип искә төшергән. Шул ук вакытта ул Россия Конституциясендәге статьяны (ил гражданинының үз тирәсендәге кешеләрнең тормышы һәм сәламәтлегенә зыян салмаска тиешлеге турында статья) телгә алып үткән.
