Ятимнәргә дигән фатирларны үзләштереп баеп буламы?

Россиядә күпфатирлы йортларга капиталь ремонт ясау белән бәйле җәнҗаллар гел чыгып тора. Ятимнәргә фатир бүлү дә – бик четерекле эш. Тикшерү комитеты соңгы көннәрдә менә шундый авыр мәсьәләләр белән шөгыльләнүче ике кешегә җинаять эше кузгатты. Дүшәмбе көнне, 28 сентябрьдә, Мәскәүдән Иркутскига төшүче очкычны махсус транспорт көтеп торды. Иркутск өлкәсенең элекке губернаторы Сергей Левченконың улы һәм депутат Андрей Левченконы шулай «хөрмәтләп» каршы алдылар. Андрей – өлкә парламентында төшеп калган кеше түгел, Россия Федерациясе Коммунистлар партиясенең фракция җитәкчесе. Дәрәҗәле әтинең улына Тикшерү комитеты алдау юлы белән күпфатирлы йортларны капиталь ремонтлау фонды акчасын аеруча зур күләмдә үзләштерү дигән гаеп тага.

Олег Хомуляк исемле эшмәкәргә инде 2019 елның февралендә үк җинаять эше ачылган булган икән. Левченко менә шул Хомуляк белән бергәләп ялган документлар ярдәмендә һәм ялган фирмалар оештырып капиталь ремонт ясау эшләрен үз өсләренә алганнар. Россия традициясе буенча, төзелеш эшләре тиешледән кыйммәтрәк бәягә башкарылган инде, билгеле. Бюджетка 185 миллион сум гына зыян салынган, диләр тикшерүчеләр. Менә шул барлы-юклы 185 миллион өчен әтиле-уллы Левченколарның яшәү урыннарында тентү оештырылды. Кече Левченконы сак астына алу мәсьәләсе хәл ителеп ята. Тикшерүчеләр җинаятьтә башка кешеләр дә катнашкан дип саныйлар, эзләү эшләре дәвам иттерелә. Бер карасаң, коммунистларның да тәмле ашыйсы һәм матур яшисе килә. Әмма халыкка гаделлек вәгъдә итеп, ничә еллар буе төрле дәрәҗәдәге парламентларда шактый күп урын биләп утырган оппозицион дип саналган партия вәкилләрен дөнья малына хирыслык бер дә бизәми.

Красноярск краеның көнбатышында урнашкан Ачинский район хакимияте башлыгы Евгений Розанчуговны ваемсызлык күрсәткән өчен дигән статья белән гаеплиләр тикшерүчеләр. Евгений ятимнәргә фатир бүлү мәсьәләсендә «янган». Чиновниклар ятимнәргә фатир тапшыруны ни өчендер бик төшемле эш дип саныйлар. Сәбәбе билгеле: федераль үзәк күп акча бүлеп бирә, ә ятимнәр гадәттә яклаучысыз була. Төрмә сәндрәләре менә шуннан файдаланып кесә калынайтырга теләгән түрәләр белән тулган, шуңа карамастан нәфесен ятимнәр өлешенә сузучылар саны кимеми.

Евгений Розанчугов 2016 елдан башлап 2018 елга кадәр ятимнәр өчен төзелгән фатирларга экспертиза үткәрүне таләп итеп мәшәкатьләнмәгән. Ә андый экспертиза закон буенча мәҗбүри икән. Хакимият башлыгын бу турыда белмәгән дип әйтеп булмый, мондый нәрсәләр гадәттә якын бизнес вәкилләре файдасына эшләнә дип саныйлар тикшерүчеләр. Ачинск бизнесы яшәргә яраксыз ике катлы йортны чүп кенә бәягә алып, ятимнәр өчен 8 фатирлы өйгә әверелдергән. Хәзер хакимият башлыгына җавап тотарга туры киләчәк.

                                      Рәшит Фәтхрахманов 

Фото: pixabay.com


Фикер өстәү