Бүген Татарстан Республикасы Президенты Рөстәм Миңнеханов Иран Ислам Республикасының Гилян провинциясе губернаторы Арсалан Заре белән видеоконференция элемтә режимында очрашты. Бу хакта республика җитәкчесенең матбугат хезмәте хәбәр итә.
«Рөстәм Миңнеханов бүгенге очрашуның эшлекле багланышларга яхшы импульс бирәчәгенә ышаныч белдерде», — диелә хәбәрдә.
Очрашуда билгеләнгәнчә, Татарстан һәм Гилян провинциясе авыл хуҗалыгын үстерү һәм Гилян провинциясеннән авыл хуҗалыгы продукциясе экспорты, Татарстаннан хәләл продукция кертү, Татарстанда Гилян провинциясе компанияләре тарафыннан теплица продукциясе җитештерү һәм балык үрчетү, сәүдә-икътисади делегацияләр алмашу, сәүдә-сәнәгать палаталары һәм сәнәгать зоналары хезмәттәшлеге кебек юнәлешләр буенча хезмәттәшлек итә алалар.
