Режиссер Айдар Җаббаров бетеп баручы егермеләп авылда була, алтмыштан артык кешедән интервью ала, нәтиҗәдә “Хуш, авылым” дигән спектакль туачак.
Театр ни өчен янә авыл темасын кузгата соң?
Татар әдәбияты, драматургиясе һәм театры өчен авыл элек-электәннән төп темаларының берсе булып тора. Һәр тарихи чорның үз авылы һәм аның белән бәйле проблемалары, конфликтлары, геройлары һәм антигеройлары, сораулары һәм икеләнүләре бар.
Режиссер өчен дә авыл темасы чит түгел.
“Мин, күп кенә яшьтәшләрем кебек, каникулларны әбием белән бабаем яшәгән авылда үткәрә идем. Еллар үткәч, үсеп егет булгач, әби белән бабай инде бакыйлыкка күчкәннән соң, үзебезнең авылдагы өйгә кайттым һәм бер мизгелдә тетрәнеп куйдым: тиздән бу авыл бетәчәк, юкка чыгачак. Мине ниндидер сагыш басты, Чеховтагы сыман “әйтерсең, бөтен утлар сүнде…” Пандемия һәм үзизоляция вакытында миңа видео җибәрделәр, анда бер авыл агае гармунда уйный. Һәм янә авылым исемә төште, хисләр яңарды. Шунда бүгенге көндә авылларның ничек яшәве, авыл кешеләренең язмышлары белән якыннанрак танышу теләге уянды”, – ди Айдар Җаббаров.
Нәтиҗәдә алар 20дән артык “бетеп баручы”, кечкенә авылларда була, 50-60 тирәсе интервью эшли. Айдар Җаббаров әйтүенчә, ул кешеләр арасында ялгызлыкка исләре китмәүчеләр дә, үзгәртеп булмас тормыш шартлары колына әверелеп, соңгы көннәрен ташландык йортлар арасында яшәргә мәҗбүр булганнары да була. Авылның хәзергесе һәм үткәне турындагы бу тарихларны бергә туплагач, бик кызыклы гына контекст килеп чыккан.
Спектакль татар теле, ватаныбыз, тамырларыбыз, үткәнебез, бүгенгебез һәм киләчәгебез турында уйланырга чакыра.
Режиссер тамашачыга татар авылыннан — көч, ирек, яшәүгә сусау урыныннан мәхрүм калган киләчәгебез нинди булыр, дигән сорау куя.
Шулай итеп, 4, 5 һәм 6 декабрьдә Камал театрының кече залында «Хуш, авылым» спектакленең премьерасы була. Спектакльнең авторы һәм режиссёры — Айдар Җаббаров. Рольләрне Татарстанның атказанган артистлары Эмиль Талипов, Ләйсән Фәйзуллина, шулай ук, яшь артистлар Эльвир Сәлимов, Алинә Мөдәрисова, Алмаз Борһанов һәм Гүзәл Гюльвердиева башкара.
Фото: idel-tat.ru
